ألوان الحياة

روعة الحياة ....!!!

2010-10-19T23:44:00.000+02:00

الــــــحـــــيـــاه

روعـــــه بــــوجــــود من نــــــحــــــب .......فـــــــهـــــل
يـــــــعــــلـــم مـــــــن نـــــحــــــبــــهـــم انــــــهــــم
روعــــــــــــــــــه الــــــــحــــــيــــــاه.....!!!

جملة قريتها خليتنى افكر شوية ؟؟؟؟؟ هو فعلا الاشخاص اللى فى حياتنا هما اللى ممكن يخلوا حياننا روعة او العكس حسب وجودهم او لأ ؟؟؟؟

انا شايفة ان الناس حاجة مهمة جدا فى حياة كل انسان.....بس هل هما فعلا كل حاجة ؟؟؟؟

مهو ممكن يكون حد مش متوفرله الناس اللى تخليه حياته ....((( روعة ))) !!!

ده حتى دايما اما بتحصل مشكلة او اى موقف بيكون السبب شخص...!!! مش اى حاجة تانية

انا عن نفسى مع اعترافى بقيمة الناس فى الحياة الا انى مش متفقة مع الجملة دى وشايفه ان الانسان يقدر يخلى حياته روعة بطرق تانية مختلفة

ولا ايه رأيكم ....

وحشتونىىىىى

2010-10-15T01:35:00.003+02:00

وحشتونى فعلا كلكم بمدونتكم ببوستاتكم بسلطاتكم بباغنوجوكم :d

ادعولى ربنا يقدرنى واقدر استأنف نشاطاتى تانى...على الرغم من استراتجية القمع والتعذيب فى الكلية باعتبارها منشأة من منشآت البلد

واللى يمشى على الكل يمشى عليها

بس على الرغم من كده مازلنا صامدون للنهاية اما النصر او الاستشهاد فى سبيل العلم s:s:

بس انا بجد نفسى فعلا ارجع اتابع زى الاول واقرا كل الكلام اللى بتكتبوه واكتب كتييييير

محدش يزعل من عدم متابعتى .....وان شاء الله اقدر اتواصل معاكم اكتر من كده فى اقرب فرصة

دمتم سالمين ,,,,,,

جيوش الامن المركزى تمنع الصمت..الغضب..الاحتجاج !!!!

2010-07-10T00:47:00.001+03:00

آآآآآآآه عليكى يابلد لما تنزلى الف جندى امن مركزى او اكتر

عشان يخرسوا شباب اصلا مش نازل يخرب ولا يدمر....

نازل واقف صامت غاضب...

حتى الصمت ممنوع...

قالولنا اللى مش عايز يتهان يروح...

ولية الاهانة اصلا ؟؟؟

عشان بطالب بالحق

بهدوء وتحضر ؟؟؟؟

بس ده ان دل على شىء فيدل على ان كلمة الحق عالية اوووى

ليه هما خايفيين كده ؟؟؟

ليه ينزلوا كل دول علينا

ليه القمع والطغيان

ولسه فيه ناس ساكته !

ولسه فيه ناس خايفة !

لسه بتقول وانا مالى !!

مستنيييييين اييييه ؟؟؟

.اللهم انى أبرىء ذمتى امامك من السكوت عن الحق

والسكوت عن النظام الفاسد..

.نظام القمع والطغيان...

حسبى الله ونعم الوكيل

مغلق حتى اشعار آخر !!

2010-06-08T22:53:00.003+03:00

البحر اشتكى !

2010-05-11T00:47:00.005+03:00

فى يوم من الأيام

مشيت وسط الزحام

زحام الناس عليه مقدور

زحام القلب غير محتمل

هموم جواه بتتراكم

جروحه بتنزف مش سيباه

لقيت البحر قدامى

قلت احكيله واشكيله

يمكن بالدوا يبوح

اتارى البحر متكدر

سمعت آهاته بودانى

هموم الناس كتير وجعاه

ونفسه يداوى ويطيب

بموجه العالى بيجاوب

وكل كلامه مترجم

بكل لغات الكون مفهوم

دى موجه ترد تقول مظلوم

ترد التانية لا ظالم !!

لنفسك أو لناس حواليك

وليه ع الغدر كده ناوى

وترجع تبكى وتعانى !

كلام واضح كلام معقول

وللناس كتير مقبول

ياريتهم بس يلتفتوا

لأفعالهم ويكتشفوا

حلاوة طيب معاملاتهم

لا بينهم مهموم ولا مجروح

وحتى البحر بيهم يفرح

ويرجع للهدوء تانى !

ـــــــــــــــــــــــــــــــــــــــــــــــــ
أول اصدار اثناء مذاكرة الاورجانك

ربما ما يوريكوا و لا يحكمش بيها عليكوا

العيد ......نفرح بس ؟؟؟؟!

2009-11-25T19:29:00.002+02:00

السلام عليكم ورحمة الله وبركاتة

ازيكم جميعا عاملين ايه يارب تكونوا بخير

الموضوع ده مش انا اللى كاتباه لكنه أخ كريم جزاه الله خيرا هو اللى عامله عالفيس وانا بجد اتأثرت بيه جدا فحبيت انقلهولكوا

بسم الله الرحمن الرحيم والصلاة والسلام علي اشرف المرسلين سيدنا محمد صلي الله عليه وسلم وعلي آله وصحبه اجميعن
اقترب العيد وحلت البهجة في القلوب واستعد الجميع بالملابس الجديدة والاستعداد للتمتع بالعيد والشباب في انتظار العدية لكي ينفقوها في ما يسعدهم اللي هينفقها من اجل السينيما واللي هينفقها في سبيل الله
كل عاااااااااااااااام وانتم بخير وكل عاااااااااااااااااااام وانتم الي الله اقرب
اسمحولي اقطع عليكم هذه السعادة شوية او اجعل الحزن يخالط قلوبكم شوية اثناء هذه البهجة
اسمحولي افكركم باخوانكم في فلسطين وقد ضاق بهم الحال
انتوا عارفين يا جماعة احنا للاسف غالبيتنا مش متابع احوالهم الا من رحم ربي مع ان الرسول صلي الله عليه وسلم قد قال
من لم يهتم بامر المسلمين فليس منهم
تسمحوا نتابع شوية من اخبارهم من خلال هذه الفيديوهات التي ابكتني مع اني مش من السهل ابكي وجعلت قلبي ينتفض وجسدي يرتعش والعرق يتصبب مني
والله ده كان حالي لهول ما شاهدت
دلوقتي هفرجكم علي علي حالهم من خلال طفلة صغيرة جميلة جدااااا تحكي ان القذيفة سقطت علي بيتهم وان والدها قد اشتري لهم بيتا جديدا ولكنها لم تفرح به ووالدتها اشترت لها خواتم مفرحتش بيهم

ودلوقتي انظر الي فخر هذه الفتاة بكونها فلسطينية وهي تنشد اشعار وتبكي

والان مع تصوير لحصار غزة من فتاة صغيرة وقد سافرت والدتها مع جدتها من اجل العلاج ووالدها قد اخبرها بان الكهرباء سوف تنقطع فلابد ان لا تجزع كي لا يخاف اخوتها الصغار فانظر الي الحكاية

ودلوقتي مع طفل رجل فعلا هذا الطفل من سوريا ولكنه يهدد امريكا تهديدات مباشرة ويبكي من اجل اخوانه في غزة(فعلا حاسس باخوانه وفعلا رجل)

اضحك مع الطفلة الجميلة دي هي اردنية ولكنها تتعاطف مع غزة

ودي يا عيني ام غلبانة فقدت خمسة بنات وقت واحد معلش معلش تصحيح مفقدتش استشهد لها وبقي لها في الجنة ان شاء الله خمس بنات شوف مشاعرها كده

ودلوقتي ابكي دم ابكي من قلبك علي هذه المجزرة
الفيديو ده عبارة عن مجزرة باحد الاسواق في غزة ناس لا حول لها ولا قوة تقصف وتقتل ولذلك تجد عظمة الاسلام فلقد اعزنا الله بدين وبرسول صلي الله عليه وسلم
فقد امرنا الرسول صلي الله عليه وسلم الا نقتل شيخا ولا طفلا ولا امراة انظر الي المجزرة دي

اما الفيديو ده عبارة عن كلب يهودي يضرب شاب فلسطيني ولكن شاب اخر يضرب هذا اليهودي دفاعا عن اخوه

شوف هذه المعجزة شوف الجماااااااااال شوف الطفل الصغير ده وهو بيموت وبيرفع اصبع الشهادة سبحاااااااااااااان الله بجد انا بحس ان ده نصر

ودلوقتي مع فيديو لطفلة تموت امام التلفاز (حسبي الله ونعم الوكيل)حسبنا الله في قتلة الاطفال حسبنا الله في اعداء السلام

ودي صورة للطفل الشهيد الذي ابكي العالم بضحكته ونشيد مبكي بجد

ودلوقتي هسيبكم مع امسية من اجل نصرة غزة (والله ابكتنييييييييييييييييييييييييييي ابكتنييييييييييييييييييييييييييي)بجد حرام حرااااااااااام حراااااااااام والله انا اكتب والله اعلم بحالي شوفوا الاطفال شوفوا بيموتوا الناس ازاي واحنا بنتفرج بجد يا جماعة نفسي كلنا نبكي نبكي نبكي من اجل غزة ونتحرك بقي

وده الشيخ عبد الله الذي ولد اعمي وقد حفظ القران واصبح شيخا ما شاء الله ينشد نشيد مؤثر من اجل غزة بجد مؤثر جدااااااا جداااااااااا

بجد حسبنا الله ونعم الوكيييييييييييل حسبنا الله ونعم الوكيل وللاسف اللي يحزن ويبكي اكتر ما حدث من قبل المسلمين تجاه بعضهم البعض من اجل مباااااااراة من اجل مباراة ضربنا بعض وموتنا بعض ربنا يستر علينا بجد ويا رب يرد المسلمين لدينهم يا رب
لا تنسوا اخوانكم اثناء فرحتكم بالعيد من دعائكم لا تنسوهم بالله عليكم فهم في امس الحاجة لذلك
الله اكبر الله اكبر الله اكبر ........لا اله الا الله
الله اكبر الله اكبر ولله الحمد
الله اكبر الله اكبر الله اكبر .......لا اله الا الله
الله اكبر الله اكبر ولله الحمد

منقووووووول

ودمتم بكل خير

تى تريتيتى تريتيتى تريتيتى الماتش !!

2009-11-15T14:45:00.001+02:00

تحديث كبيييييييير

الف مليووون مبروك لمصر عالماتش وعقبال السودان

انا اتفرجت عالماتش كله والحمدلله فرحنا فى الاخر بعد ما ريقنا نشف

كان نفسى نكسب بس عشان الناس دى متروحش زعلانة

انا فرحانة اه بس برضه لازم ندى لكل حاجة قدرها من الفرح او الحزن او حتى التشجيع

زى ما وضحت فى البوست كده

وعقبال ماتش السودان

بس كده

ــــــــــــــــــــــــــــــــــــ

سلام عليكم ورحمة الله وبركاتة

وحشتونى وحشتونى وحشتونى جدااااااا جداااااااا بجد

عارفة انى مقصره معاكم بس ظروف الدراسة واخدينا قفش اكننا احنا السبب فى تاجيل الدراسة مثلا او ان انفلونزا الخنازير تدخل مصر

احنا بنشكل خطر على امن مصر القومى عشان كده بيعذبونا فى الكلية

ادعولى يا جماعة ربنا ييسر الحال

بقالى اسبوع طول مانا رايحة جايه والناس ملهاش سيرة غير الكورة وماتش يوم السبت

فلان هيلغى مواعيده عشان يشوف الماتش

والسواقييين هيخلصوا بدرى عشان يلحقوا الماتش

انا بقول اللى عندها مواعييد تخلصها وقت الماتش اهو الدنيا هتبقى فاضية والشارع مش هيبقى فيه صريخ ابن يومين

وبايعيين الأعلام ايه شغالين 100% اللهم لا حسد

مبشوفش حد حريص اوى انه بقى عنده علم الا وقت الماتشات

مش عارفة ليه حاسة ان الموضوع واخد اكبر من حجمه اووى اووووى اوووووى

الناس انفعلت بالماتش اكتر من اى حاجة تانيه فى بلدنا محتاجة وقفة ومحتاجه اوى حماس الماتشات ده

اشمعنى الانتماء الرهيب ده مبيظهرش الا وقت الماتشات

هتقوليلى انتى بتتكلمى كده ازاى داحنا لو كسبنا هنروح كاس العالم وانتى مش لازم تشجعى بلدك وبتاع

هقولكوا على عينى وعلى راسى بس لو كنا فعلا بنحب البلد دى اوووى كده فين اللى عملناه عشان نحسن اوضاعنا ونتقدم بيها ( ولا بلاش نتقدم بيها دى لا تقولى عليها حزب وطنى ولا حاجه )

اشمعنى اما بنتشتم فى اى حتة بنبقى زى الخرس تمام ولا بنتكلم ولكن لما الجزائر يحرقولنا علم نحرقلهم علم

عملوا اغنية وشتمونا

عملنا اغنية شتمانهم

احنا ناس متسيبش حقها اه محدش يدوسلنا على طرف

وفيه حاجة مش فاهمها الصراحة اصلى مش متابعة اوى

اشمعنى اى ماتش بينا وبين الجزائر او المغرب مثلا بيبقى فيه كل شد الاعصاب والقلق ده

وفيه حاجة ضحكتنى اوى الصراحة

حملة ال 80 مليون صائم يوم الماتش للدعاء للمنتخب

ههههههههههههههههه

هيصوموا مخصوص عشان الماتش !!!

يا جماعة طب ماشى بلدنا ونشجعها مقلتش اى حاجة

بس مش كده

عندنا بلاوى كتير نصوم وندعى ربنا ييسرهلنا اهم اوى من الماتش

طب احنا هنستفيد ايه لما يروحوا كاس العالم

انا كواحدة من الشعب ايه اللى هيعود عليا من ده !!!

ولا اى حاجه هما اللى هياخدوا ملايين وهدايا اللى هى اصلا هتبقى فائض عندهم هما مش محتاجين يعنى

لكن احنا اللى كل يوم بنتبهدل سواء فى دراسة تعليم بايظ من اوله لاخره تحت اعداد رهيبة وظروف صعبة

سواء ناس بتشتغل مواصلات وروتين ونظام متعب وفى الاخر ملاليم

احنا الى كل يوم بنعانى الميه مقطوعة النور مقطوع المجارى ضاربة الشارع مكسر الزبالة اكوااااااااام

انا عارفة ان الكورة اكتر حاجة بتفرح الشعب ده بس حساها بقت زيادة عن حدها اووى

واللى يزيد عن حده عمر ما ينزلنا الارض أده

ومع ذلك برضه اتمنى ان بلدى تكسب واهى تبقى حاجة انجزنا فيها

بس مش هو ده الانجاز اللى احنا مستنينه

ولا اية !

حدث ويحدث بالفعل......فى مصلى السيدات !!!!!!

2009-08-26T00:33:00.002+02:00

السلام عليكم ورحمة الله وبركاتة

ازيكم جميعا عاملين ايه ؟؟؟

رمضان اهو داخل فى الليلة الخامسة وبتجرى الايام والليالى الجميلة دى

اتمنى تكونوا بخير وتكونوا كلكوا بدأتوا تلتزموا فى الطاعات فى رمضان وربنا يتقبل من الجميع يااااااااارب

انا بصراحة مكنتش ناويه اكتب حاجه الشهر ده خالص

بس بقالى يومين مش عارفة اصلى التراويح واركز فى الصلاة من اللى بيحصل

هحكيلكوا وانتوا تحكموا

والدتى بتروح تصلى فى مسجد كبير عندنا وفيه كذا دور للسيدات

بس انا مبروحش معاها ليه بقى ؟

عشان اما كنت بروح كنت بااقى زحمه جداا وماشاء الله بيحجزوا الكراسى اكنهم رايحيين السينما

واحيانا بيتخانقوا عالكراسى !!!!

يعنى مش عارفه صراحه رايحيين يصلوا وياخدوا الثواب ولا يتخانقوا فى بيت ربنا

ده غير طبعا ان فيه ناس بتاخد فطارها معاها وتروح تفطر هناك

عشان تحجزش مكان او بيبقوا معتكفين هناك ايام الاعتكاف

مش المشكلة انهم بياكلوا هناك المشكلة انهم بياخدوا اكل اكنهم رايحيين الجنينة

صوانى بقى مكرونه بشاميل و وكل انواع الاكل اللى بتخلى المسجد مش نضيف

وطبعا مينفعش فطارهم يعدى الا لما يتبادلوا وصفات الاكل وانتى يا اختى عملتى دى ازاى دنا عندى العيال مش بتحبها تقولهااا اااااه تلاقيكى بتنشفيها فى الفرن ترد اصل الفرن مشحلو مع ان البوتجاز جديد يا اختى ولسه جايباه من عند الراجل اللى على اول الشارع تقولهاا ااااااه دى مراته صاحبتى وعنده عيلين العيل الاولانى .........الخ

فانا مبروحش المسجد ده !

فقلت اروح اصلى فى مسجد جنبنا صغير يمكن الوضع يكون اهدى

المسجد ده فيه مكانين لصلاة السيدات

مكان جزء من المسجد وهو صغير ومكان تانى فى الجهه المقابلة اوسع

فانا رحت امبارح الناحيه الواسعة

دخلت المسجد ولاحظت ان فيه اربع صفوف اطفال صغيرين سنهم من سنة لخمس سنين

وكانوا قاعدين هاديين فقلت خييير

اول ما بدات الصلاة قاموا كلهم

وجرى ولعب وعياااااااااط

وطالعين داخلين داخلين طالعين ومحدش عارف يركز فى الصلاة لا احنا ولا امهاتهم

وشويه كده وكسروا لمبة وقعدوا يلعبوا بالازاز

وبعد كده وقعوا الستارة اللى ادام الباب !!!!!

طبعا حسيت انى فى النادى بجد ومحدش عرف يصلى ولو حد حاول يسكتهم امهاتهم بتزعل !!!

فقلت اروح انهارده الجزء التانى الخاص بالسيدات يمكن يكون اهدى ونعرف نركز فى الصلاة

مكنش فيه اطفال الحمدلله بس كان فيه حاجه ضايقتنى اكتررررر

انا كنت رايحة بدرى ولقيتهم قافلين الباب بالمفتاح فخبطت ودخلونى وطبعا زى ما قلتلكم قبل كده ان المكان ده ضيق

بس مش معنى كده انهم يقفلوا الباب بالمفتح ويسبوا الناس تخبط بره ومش عايزين يفتحولهم عشان يبقى فيه مكان واسع ليهم

ده بيت ربنا مش بيتهم ومش من حقهم يمنعوا حد من الدخول

كل شوية الباب يخبط ناس عايزه تدخل نقلهم افتحوا طيب وقلولهم ان المكان ضيق والرجال يقولوا يا جماعة افتحوا حرااام

ودول مبيفتحوش الا بالعافيه ومحدش مستحمل التانى

انا مش عارفه الناس جرالها ايه ؟؟

رايحيين يصلوا ولا ايه بالظبط ؟؟

وليه دايما السيدات بيبقوا كده فى صلواتهم

انا وانا صغيره كنت بروح مع والدى اصلى الجمعة ومكنتش بلاقى كده ابداا

ولما كبرت كنت كل ما اروح اصلى مع السيدات الاقى فيه مشكل من النوع ده برضه

يا جماعة دى صلاة والكل يتمنى ان ربنا يقبلها مننا وننول ثوابها

المفروض السيدة اللى معاها اطفال صغيرين تصلى فى بيتها ولها الاجر والثواب باذن الله

لكن هى كده بتضيع تركيزها وتركيز الناس اللى معاها والاطفال كمان ميستحملوش وقت الصلاة الطويييل ده

ومفيش حجز فى بيت الله هى مش سينما !!!

وبيت الله بيبقى مفتوح للجميع مش بيتقفل فى وش الناس !!!

كل واحدة لو راحت الصلاة بنية صافيه كده انها تنول ثواب الصلاة وانها رايحة بيت ربنا هتحافظ عليه

مش هتخليه مش نظيف وهتستحمل غيرها

ياريت يا جماعة نحاول نحسن من تصرفاتنا وسلوكياتنا عشان ربنا يرضى عنا وميحرمناش من الثواب والحسنات والخير كله

والسلام ختام....

رمضاااااااان جانا .....أهلا رمضاااااان

2009-08-20T13:16:00.003+03:00

السلام عليكم ورحمة الله وبركاته

ازيكم جميعا عاملين ايه ؟

كل سنة وانتم طيبين جميعاا رمضان كريم عليكم جميعااا

حبيت اهنيكم بالشهر الكريم اللى بجد مش عايزين نضيع ولا لحظه فيه بدون عبادة او طاعة لله

واحنا صغيرين كان رمضان بالنسبة لنا فانوس جميل نلعب بيه واكل جميييل وطبعا بنبقى فى انتظار كحك العيد بعديه

ده حتى دلوقتى الفوانيس تكسف كده ووحشه خالث مش زى زماان

هو انا مش قديمه اووى بس برضه فانوسى زمان كان احلى من الفوانيس دلوقتى

مش عارفه كمان كام سنه هيحصل ايه للفانوس بس ؟

هيضحكوا عالعيال وينزلولهم عربيات بدل الفوانيس

كنت باحب اوى ساعة الفطار اتفرج على بوجى وطمطم ومعاها شوربة لسان العصفور

بعديها بشويه بقيت بتفرج على بكااار مع شوربة لسان العصفور برضه

اصل الناس كلها كانت بتفطر على تمر بالبن وانا بفطر على شوربة

مش عارفه ليه مش باحب التمر باللبن لحد دلوقتى مع انه واضح انه لذيذ

كنا زمان ماخترعوش الصواريخ العبيطه تى اللى بتخض

كان فيه بارود احمر كده صوته مش بيفجع كده بيتحط فى المسدس

كنا بنستنى نسمع مدفع الافطار فى التلفزيون

هو لسه بيضرب دلوقتى ولا ايه مش عارفة ؟

كان اخويا يفضل واقف فى البلكونه اول ما يسمع الاذان يجرى يضرب المسدس بتاعة ال يعنى مدفع الافطار

اول يوم صيام ليا كنت فى تانيه حضانه

هههههههههههه

كان معايا سندوتشات عادى بس مأكلتهاش لما الميس سألت مين صايم رفعت ايدى

ولما ماما سألتنى مأكلتيش ليه قلتلها اصلى صايمه D:

بس انا فيه حاجتين نفسى افتكرهم

مش فاكرة اذا كنت شربت حاجه الصبح ولا لا ؟ ومش فاكرة برضه اذا كنت كملت اليوم ولا لا ؟

وعلى اخر رمضان بقى كنا بنبدأ نعمل كحك العيد

كنت بحب اوى اساعد ماما وابوظلها الدنيا

ونرص الكحك والبسكوت فى صاج الفرن ونكتب عليه الاسامى ونروح نوديه الفرن

أخويا كان بيشيلهم وانا كنت باروح معاه مش فاكرة كنت باشيل ولا لا بس غالبا لا

بس مكنتش افهم بقى يعنى تراويح وان رمضان ده فرصة كبيرة اوووى للعبادة والدعاء

بس اما كبرت شوية بدأت افهم قيمته واقدرها

خاصة لما تلاقى ناس وشباب مبيلحقهوش للاسف

مش معقول نسيبه يعدى مننا بالطريقة دى

يمكن كتير من الناس رمضان بالنسبة لهم عبارة عن ياميش ومكسرات وأكل

والباقى رمضان بالنسبة لهم مسلسلات وبرامج وسهرات

انا عن نفسى مش قادرة افهم ازاى اسمها (مسلسلات رمضان )

بقى رمضان بالنسبة لهم يعنى تكثيف المسلسلات ورا بعض بحيث ميسبوش فرصه للناس تصلى ولا تعمل اى حاجه

بدل المسلسل يبقوا 10 وبدل البرنامج 100

يعنى ما شاء الله الاعلام بيقوم بدور الشيطان فى رمضان بالذات

ياريت نبدأ من رمضان السنه دى نحس بالنعمه اللى احنا فيها

كفايه كل الرمضانات اللى ضيعناها قبل كده فى المسلسلات والاكل

اول نعمه وخير هو مجرد اننا ندركه غير كل الخيرات اللى فيه

ياريت نقدر نستغله ونطلع منه كلنا وربنا كاتبلنا الرحمة والغفران و العتق من النار

ودى بعض اقتراحات للعبادات اللى ممكن نقوم بيها و أفضالها خلال الشهر الكريم

يوم في حياة صائم ( مشاريع رمضان )

بسم الله والصلاة والسلام على رسول الله –صلى الله عليه وسلم - ... أخي الحبيب ... كل عام وأنتم بخير ...

* هل تريد أن تحمي نفسك من عطش 50.000 سنة يوم القيامة ؟؟

عندما تصوم يوما في رمضان فإنك تصوم 14 ساعة أي =50000 ثانية تقريبًا فهل تتخيل أن صوم 50000 ثانية في رمضان يقيك عطش 50000 سنة يوم القيامة ؟؟؟
أي ان الثانية الواحدة في رمضان بسنة كاملة من سنوات الحر والعطش يوم القيامة !!!!!

* أخي الحبيب ... إذا فاتك رمضان ....لن يعوض ... ألا يكفي كل رمضان ضاع في حياتك من قبل ...إذا وقعت فقم ... لا تيأس... اجعله كأنه آخر رمضان في حياتك واشحذ عزمك وانطلق معنا

في هذه المشاريع قدر وسعك:-

** مشروع كيف تربح المليار في 30 يوم:

هل تعلم أن حسنات ختمة قرآن واحدة في الأيام العادية = 3,3 مليون حسنة إذا تقبلها الله – سبحانه وتعالى - ( أي تمحو 3,3 مليون سيئة ) ... ومضاعفة الحسنات في رمضان جعلت ثواب العمرة في رمضان = ثواب الحج مع رسول الله !! ...
فما بالك بثواب ختمة القرآن في رمضان ؟؟؟ مئات الملايين من الحسنات بين يديك فهل ستضيعها ثم تندم على الحسنة الواحدة يوم الفزع الأكبر ؟ هكذا رصيدك أعلى من رصيد أصحاب شركات المحمول والملتي ناشيونال جروبز !!

** مشروع ضربة البدء :

اجعل بداية الشهرهي أقوى مافي الشهر كله .. فور بداية أول ليلة في رمضان .. اشحذ عزمك وصمم أن تكون هذه الليلة هي ليلة العتق من النار ... من أول ليلة بإذن الله ..وكل ليلة فور الإفطار اعزم أن تكون هذه الليلة هي ليلة العتق من النار ...( إن لله تبارك وتعالى عتقاء في كل يوم وليلة ) صححه الألباني..أمامك 60 فرصة للعتق من النار في كليوم فرصة وفيكل ليلة فرصة ... يعني في رمضان :- إذا صحت ليلة واحدة .....انقاذ لمصيرك كله ... إذا صح يوم واحد ..... إنقاذ لمصيرك كله .

** مشروع رمضان غيرني (مشروع التحضير للتراويح )

قم بتحضير الجزء الذي ستسمعه ليلا في صلاة التراويح بقراءته بعد العصر بتدبر وخشوع .. وسترى الفارق الكبير في خشوعك في التراويح ( هكذا أنت تسير في ختمتين معا .. ختمة سماع في التراويح و ختمة تلاوة بعد العصر) ... وإن استطعت أن تقرأ في تفسير هذا الجزء أو تسمع شريطاً في تفسيره لنلت ختمة نَدَرَ ... من يطبقها اليوم !!! ... وهي ختمة المدارسة .... وهكذا حقا ...... يأتي التغيير في رمضان ...( متوسط تفسير الجزء في تفسير السعدي29 صفحة فقط للجزء الواحد )

** مشروع مفاتيح خزائن الله

·هل تعلم أن لك في رمضان 60 دعوة مستجابة يعنى أن 60 مشكلة من مشاكل حياتك يمكن أن تحل , 60 حلمًا من أحلام حياتك يمكن أن يتحقق ...( ولكل مسلم في كل يوم وليلة دعوة مستجابة ) صححه الألباني... لو أن أغنى أغنياء العالم أعطاك 60 شيك على بياض – كيف يكون فرحك ؟_ولله المثل الأعلى_ الله أعطاك 60 دعوة مستجابة لكل يوم وليلة ·غير حياتك في نصف ساعة : ( احتفظ بكتيب دعاء في جيبك واقرأ فيه بتضرع كل يوم ولا تضيع مفاتيح خزائن الله في حياتك )

** مشروع حج مع رسول الله –صلى الله عليه وسلم-:

( عمرة في رمضان كحجة معي ) لا يوجد عمل يجعلك مع رسول الله كالصحابة مثل عمرة في رمضان** مشروع زيادة الأرزاق وتوسيعها :عندك مشكلة في الرزق ؟؟ تريد وظيفة مجزية ؟؟ تريدين زوجًا ؟؟ تريدين ذرية وأولاد؟؟ تريد زوجة ؟؟؟ (من أراد أن يبسط له في رزقه وينسأ له في أثره فليصل رحمه )...لاتنسى عزومة على الإفطار لرحمك وجيرانك .

** مشروع 30 قصر في الجنة:

ليس 30 قصرًا في الساحل الشمالى أو سواحل هاواي أو نيس الفرنسية ... بل في الجنة... حافظ كل يوم على 12 ركعة سنة رواتب ( 2 قبل الفجر/ 4 قبل الظهر و 2 بعده / 2 بعد المغرب / 2 بعد العشاء)

** مشروع 7 حجات يومياً في رمضان :

5 حجات : هل تعلم أنك إذا سمعت الأذان فقمت فوراً فتوضأت وانطلقت فوراً إلى المسجد فصليت فيه الفريضة لك ثواب حجة ( من خرج من بيته متطهرا إلى صلاة مكتوبة فأجره أجر الحاج المحرم )صححه الألباني .. (( وللنساء نفس الأجر في منزلها إن شاء الله إذا صحت نيتها بطاعة الله ورسوله بالقرار في البيت وهي راضيه )
حجة أخرى: ( من صلى صلاة الغداة " أي الفجر" في جماعة ثم جلس يذكر الله حتى تطلع الشمس ثم قام فصلى ركعتين انقلب بأجر حجة وعمرة ) صححه الألباني ...... جلسة الضحى وحدها تفوز بسببها بأجر 30 حجة وعمرة في رمضان .
حجة أخرى ..صح عن رسول الله أن حضور درس علم له أجر حجة ... صلى التراويح في مسجد فيه كلمة بين الركعات فهي تقوم مقام درس العلم بإذن الله.... هل هناك عاقل يضيع سبع حجات يومياً !!!

** مشروع الكنز الضائع :

غالب الناس يضيع الساعة التي بعد الإفطار رغم أنك لو قرأت فيها جزءاً من كتاب الله لقرأت فيها على مدى الشهر ختمة كاملة ؟؟؟ فماذا يعطلك عن ثواب ختمة كاملة ؟؟!! هل يعوضك عن ذلك برنامج كوميدي ؟؟ أو حوار مع فنان ؟؟

** مشروع رهبان الليل ( فرسان التهجد )

اقرأ هذا الحديث المبهر ( إن الله ليمهل في شهر رمضان كل ليلة حتى اذا ذهب ثلث الليل الأول هبط إلى السماء ثم قال هل من سائل يُعطى هل من مستغفر يُغفر له هل من تائب يُتاب عليه ) صححه الألباني .... أكثر مايبهر هنا أن الله ينزل في غير رمضان على أشهر الأقوال كل ليلة في الثلث الأخير من الليل أما في رمضان فيتنزل في آخر ثلثين من الليل , فمعظم الليل في رمضان فرصة هائلة لتفريج الكربات ونيل العطاءات فيا لها من فرصة لا تعوض ؟؟... نم .. لو لم يكن عندك ذنب .. نم ..لو لم تكن محتاجاً لأي شيء من الله.. نم .. لو لم تكن مشتاقا الى جوار الله في الفردوس.

** مشروع ليلة العمر :

ليلة القدر 12 ساعة خيرمن ألف شهر ... أي خير من 720.000ساعة أي ( 3/4 مليون ساعة ) ... إذا ساعة فيها أفضل من 60.000 ساعة ...آية القرآن فيها أعلى من 60.000آية والركعة فيها أعلى من 60.000 ركعة و تفطير صائم فيها أعلى من 60.000 تفطير صائم في غيرها. ..حقا ..( من حرم خيرها فهو المحروم ) حديث صحيح ...إنها حقاً ليلة العمر ... فطر فيها الصائمين …وصل رحمك ولو بالهاتف .... وصالح كل من بينك وبينه مشاحنة ولو بالهاتف ... واقرأ القرآن …وصلى فيها حتى تتفطر قدماك كرسول الله صلى الله عليه وسلم … ومن أفضل العبادات فيها أن تعفو عن كل من ظلمك ... وسل الله العفو فإن الجزاء من جنس العمل ( اللهم انك عفو تحب العفو فاعفو عنا )

** مشروع التأمين على الصيام:

كل صائم تفطره كأنك صمت يوماً آخر من رمضان واليوم بعشرة ( فلو فطـّرتَ 36 صائما كأنك صمت 360 يوما أي جعلت السنة كلها رمضان ( لا تنسى : شنطة رمضان , وضع علب التمر في المسجد , تفطِير الصائمين بالتمر وأنت ذاهب للمسجد , مشروع التفطير على الطرق السريعة والمواقف بالمال والجهد ) وأبشر بعدة رمضانات فيميزانك .

** مشروع فرسان الدعوة :

أخطر موسم يريد كل من له معصيه سماع الدين فيه هو رمضان فيجب أن ننتهز الفرصة.. جاهد بمالك وجهد كفي توزيع الأشرطة وCD على غير الملتزمين والسائقين والمواقف وأصحاب المحلات (عاهدهم أن يسمعوها )... وزع المصاحف الصغيرة الفاخرة في رمضان مقابل القراءة فيها... ادعو 2 من أصحابك طيلة الشهر ليضاف حسناتهم في ميزانك .

** مشروع فرسان رمضان :

عاهد الله في رمضان أن تتوب كل يوم من ذنب معين لا تعود إليه بعدها أبدا بإذن الله ... فأول يوم .. عاهد الله على ترك التدخين , وثاني يوم .. عاهد الله على ترك الإختلاط كله , وثالث يوم .. عاهد الله على ترك الأغاني المحرمة كلها....طهر محمولك والهارد ديسك من أي شيء يغضب الله ... وهكذا ....( لتنفذ كل هذا قاطع الشاشتين في رمضان .. شاشة النت وشاشة الدش )

** مشروع فارسات رمضان :

لابد من ارتداء الحجاب الكامل في رمضان , الحجاب الشرعي حجاب عائشة وفاطمة ..اذا لم تدخلي في رحمة الله وأبواب الجنة كلها مفتوحة وأبواب الرحمة كلها مفتوحة .. وأبواب السماوات السبع مفتوحة .... فمتى ستدخلين؟؟؟

** مشروع العناية المركزة (اعتكاف العشر الأواخر )

كم من شباب رأيناهم تغيرت حياتهم تماما بسبب الاعتكاف وكاتب هذه السطور واحد منهم ... اعتكف في مسجد فيه دعاة متفرغين لتربيتك في هذه الأيام . ( احرص على الاعتكاف ولا تتركه )

** مشروع فرسان الذكر :

( سبحان الله والحمد لله ولا إله إلا الله والله أكبر ... أحب الكلام إلى الله ) كل كلمة بشجرة في الجنة ... كل كلمة أعظم عند الله من جبل أحد ... كل كلمة تصعد إلى العرش ستذكر بها عند الله ... قل هذه الكلمات في جلسة الضحى , وأثناء سيرك في الطريق ... ولا تضيع ثوابها العظيم

** ماذا بعد رمضان ؟؟

عاهد الله في الإعتكاف على عبادة لا تتركها أبدًا بعد رمضان ( صيام , قيام ساعة كل ليلة , ورد قرآن ثابت ) ... وعاهده على ثغر من ثغور نصرة الإسلام انذر حياتك لنصرة الدين من خلاله .. حتى يصبح كل رمضان نقطة تغيير حقيقية في علاقتك بالله .

أحبابنا من المسلمين والمسلمات في بلاد الغرب .. لاتدعوا أي شيء يشغلكم عن الله في رمضان .. ولا تنسوا دعوة غير المسلمين إلى الإسلام بأقوالكم وأخلاقكم ودعائكم لهم .موقع الطريق إلى الله http://www.way2allah.com/

اتمنى أكون أفدتكم وان شاء الله يكون رمضان كله خير علينا جميعا

اللهم بلغناااا رمضان يارب

وكل سنة وانتوا طيبين....

قرأت لكم.........

2009-08-16T03:20:00.002+03:00

السلام عليكم ورحمة الله وبركاتة

ازيكم جميعا نفر نفر ونفراية نفراية

يارب تكونوا بخير جميعا

انهارده جايبلكم قصص قصيرة ولكن العظه منهم كبيرة

عجبونى جدا وقلت اشاركم معايا وان شاء الله يعجبوكم

القصة الأولى........

منذ زمن بعيد ولى...كان هناك شجرة تفاح في غاية الضخامة...
كان هناك طفل صغير يلعب حول هذه الشجرةيوميا....
كاني تسلق أغصان هذه الشجرة , يأكل من ثمارها...وبعدها يغفو قليلا لينام فيظلها...
كان يحب الشجرة وكانت الشجرة تحب لعبه معها...
مر الزمن... وكبر هذاالطفل...
وأصبح لايلعب حول هذه الشجرة...
في يوم من الأيام...رجع الصبي وكان حزينا...!
فقالت له الشجرة : تعال والعب معي...
فأجابها الولد : لم اعد صغيرا لألعب حولك...
أنا أريدبعض اللعب وأحتاج بعض النقود لشرائها...
فأجابته الشجرة : لا يوجد معي أيةنقود!!!
ولكنيمكنك أن تأخذ كل التفاح الذي لدي لتبيعه ثم تحصل على النقود التيت ريدها...
كانا لولد سعيدا للغاية...
فتسلق الشجرة وجمع ثمار التفاح التي عليها ونزل سعيداً...
لم يعد الولد بعدها...
كانت الشجرة في غاية الحزن بعدها لعدم عودته...
في يوم ما رجع هذا الولد للشجرة ولكنه لم يعد ولداً بل أصبح رجلاً...!!!
كانت الشجرة في منتهى السعادة لعودته وقالت له : تعال والعب معي...
لكنه أجابها و قال :
لم أعد طفلا لألعب حولك مرة أخرى فقد أصبحت رجلاً مسؤولاً عن عائلة...
وأحتاج لبيت ليكون لهم مأوى...
هل يمكنك مساعدتي بهذا؟
آسفة!!!
فليس عندي لك بيت ولكن يمكنك أن تأخذ جميع أفرعي لتبني بها لك بيتاً...
فأخذ الرجل كل الأفرع وغادر الشجرة وهو سعيد...
كانتا لشجرة سعيدة لسعادته ورؤيته هكذا...ولكنه لم يعدإليها...
أصبحتالشجرة حزينة مرة أخرى...
وفي يوم حار...
عاد الرجل مرة أخرى وكانت الشجرة في منتهى السعادة ...
فقالت لهالشجرة : تعال والعب معي...
فقال لها الرجل أنا في غاية التعب وقد بدأت في الكبر...أريد أن أبحر لأي مكان لأرتاح...
هل يمكنك إعطائي مركباً؟؟؟
فأجابته يمكنك أخذ جزعي لبناء مركبك...بعدها يمكنك أن تبحر به أينماتشاء...وتكون سعيداً...
فقطع الرجل جذع الشجرة وصنع مركبه!!!

فسافر مبحراً ولم يعد لمدة طويلة جداً...
أخيرا عادالرجل بعد غياب طويل وسنوات طويلة جداً...
لكن الشجرة أجابت وقالت له : آسفة يا بني الحبيب لكن لم يعد عندي أي شيء لأعطيه لك...
قالت له : لا يوجدتفاح...
قال : لاعليك لم يعد عندي أسنان لأقضمها بها...
لم يعد عندي جذع لتتسلقه ولم يعد عندي فروع لتجلس عليها...
فأجابهاالرجل لقد أصبحت عجوزاً اليوم ولا أستطيع عمل أي شيء!!!
فأخبرته : أنا فعلاً لا يوجد لدي ما أعطيه لك...
كل ما لدي الآن هو جذور ميتة...أجابته وهي تبكي...
أجابهاوقال لها : كل ما أحتاجه هو مكان لأستريح به...
فأنا متعب بعد كل هذه السنين...
فأجابته وقالت له : جذور الشجرة العجوز هي أنسب مكان لك للراحة...
تعال...تعال واجلس معي هنا واسترح معي...
فنزل الرجل إليها وكانت الشجرة سعيدة به و الدموع تملأ ابتسامتها...
هلت عرفون من هي هذه الشجرة؟؟؟

إنها أبواك!!!
قدّر أبويك اللذين لطالما بذلا حياتهما ووقتهما وما يملكان من أجلك

أحسن إليهماكما أمرك الله تعالى واتبع وصية رسول الله فيهما

القصة الثانية

منذ زمن طويل كانت هناك مدينة يحكمها ملك وكان أهل هذه المدينة يختارون الملك بحيث يحكم فيهم سنةواحدةفقط, وبعد ذلك يرسل الملك إلى جزيرة بعيدة حيث يكمل فيها بقية عمره ويختار الناس ملك آخر غيره وهكذا.

أنهى أحد الملوك فترة الحكم الخاصة به وألبسه الناس الملابس الغالية وأركبوه فيلا كبيراً وأخذوا يطوفون به في أنحاء المدينة قائلين له وداعاً.... وكانت هذه اللحظة من أصعب لحظات الحزن والألم على الملك وجميع من كان قبله. ثم بعد ذلك وضعوه في السفينة التي قامت بنقله إلى الجزيرة البعيدة حيث يكمل فيها بقية عمره.

ورجعت السفينة إلى المدينة... وفي طريق العودة اكتشفوا إحدى السفن التي غرقت منذ وقت قريب ورأوا شاباً متعلق بقطعة من الخشب عائمة على الماء فأنقذوه وأخذوه إلى بلدتهم وطلبوا منه أن يكون ملكاً عليهم لمدة سنة واحدة ولكنه رفض في البداية ثم وافق بعد ذلك.

وأخبره الناس على التعليمات التي تسود هذه المدينة وأنه بعد

مرور 12 شهراً سوف يحمل إلى تلك الجزيرة التي تركوا فيها

ذاك الملك الأخير. بعد ثلاث أيام من تولي الشاب للعرش في هذه

المدينة سأل الوزراء هل يمكن أن يرى هذه الجزيرة حيث أرسل

إليها جميع الملوك السابقين ووافق الوزراء وأخذوه إلى الجزيرة

ورآها وقد غطت بالغابات الكثيفة وسمع صوت الحيوانات الشريرة

وهي تنطلق في أنحاء الجزيرة.
نزل الملك إلى الجزيرة وهناك

وجد جثث الملوك السابقين ملقاة على الأرض وفهم الملك القصة

بأنه مالبث أن ترك الملوك السابقون في الجزيرة أتت إليهم

الحيوانات المتوحشة وسارعت بقتلهم والتهامهم... عندئذ عاد الملك

إلى مدينته وجمع 100 عامل أقوياء وأخذهم إلى الجزيرة وأمرهم

بتنظيف الغابة وإزالة جثث الحيوانات والملوك السابقين وإزالة

قطع الأشجار الصغيرة وكان يزور الجزيرة مرة في الشهرليطلع

على سير العمل وكان العمل يتقدم بخطوات سريعة فبعد مرورشهر

واحد أزيلت الحيوانات والعديد من الأشجار الكثيفة. وعند مرور

الشهر الثاني كانت الجزيرة قد أصبحت نظيفة تماماً. ثم أمرالملك

العمال بزرع الحدائق في جميع أنحاء الجزيرة وقام بتربية بعض

الحيوانات المفيدة مثل الدجاج والبط والماعز والبقر ... الخ.

ومع بداية الشهر الثالث أمر العمال ببناء بيت كبير ومرسى للسفن.

وبمرور الوقت تحولت الجزيرة إلى مكان جميل وقد كان الملك ذكياً

فكان يلبس الملابس البسيطة وينفق القليل على حياته في المدينة

في مقابل أنه كان يكرس أمواله التي وهبت له في إعمار هذه الجزيرة.

وبعد مرور 9 أشهر جمع الملك الوزراء قائلاً أنه يعلم أن الذهاب للجزيرة

يتم بعد مرور 12 شهر من بداية حكمه. ولكنه يود الذهاب إلى

الجزيرة الآن.... ولكن الوزراء رفضوا قائلين حسب التعليمات لابد أن

تنتظر 3 شهور أخرى ثم بعد ذلك تذهب للجزيرة. مرت الثلاثة شهور

واكتملت السنة وجاء دور الملك لينتقل إلى الجزيرة ألبسه الناس الثياب

الفاخرة ووضعوه على الفيل الكبير قائلين له وداعاً أيها الملك. ولكن

الملك على غير عادة الملوك السابقين كان يضحك ويبتسم وسأله الناس عن ذلك

فأجاب بأن الحكماء يقولون " عندما تولد طفلاً في هذه الدنيا تبكي بينما جميع من حولك يضحكون فعش في هذه الدنيا واعمل ما تراه مناسباً حتى يأتيك الموت وعندئذ تضحك بينما جميع من حولك يبكون "

فبينما الملوك السابقين كانوامنشغلين بمتعة أنفسهم

أثناء فترة الملك والحكم كنت أنا مشغولاً بالتفكير في المستقبل وخططت

لذلك وقمت بإصلاح وتعمير الجزيرة وأصبحت جنة صغيرة يمكن أن

أعيش فيها بقية حياتي بسلام. والدرس المأخوذ من هذه القصة الرمزية

أن هذه الحياة الدنيا هي مزرعة للآخرة ويجب علينا ألا نغمس أنفسنا في

شهوات الدنيا عازفين عن الآخرة حتى ولو كنا ملوك.

فيجب علينا أن نعيش حياة بسيطة مثل رسولنا محمد صلى الله عليه وسلم ونحفظ متعتنا إلى الآخرة.

ولا ننسى قول رسولنا الكريم صلوات الله وسلامه عليه " لن تزولا قدما عبد يوم القيامة حتى يسأل عن أربع عن عمره فيما أفناه وعن شبابه فيما أبلاه وعن ماله من أين اكتسبه وفيماأنفقه وعن علمه فيما عمله به".

وصدق رسولنا الكريم قائلاً " كن في الدنيا كأنك غريب أو عابرسبيل".

اللهم أحسن خاتمتنا وأسكنا جنات الفردوس

ولا تصلح دنياك بخراب آخرتك

فالدنيا مزرعة الآخرة

القصة الثالثة

وقع حصان أحد المزارعين في بئر مياه عميقة ولكنها جافة، وأجهش الحيوان بالبكاء
الشديد من الألم من أثر السقوط واستمر هكذا لعدة ساعات كان المزارع خلالها يبحث
الموقف ويفكر كيف سيستعيد الحصان؟ ولم يستغرق الأمر طويلاً كي يُقنع نفسه بأن
الحصان قد أصبح عجوزًا وأن تكلفة استخراجه تقترب من تكلفة شراء حصان آخر، هذا
إلى جانب أن البئر جافة منذ زمن طويل وتحتاج إلى ردمها بأي شكل. وهكذا، نادى
المزارع جيرانه وطلب منهم مساعدته في ردم البئر كي يحل مشكلتين في آن واحد؛
التخلص من البئر الجاف ودفن الحصان. وبدأ الجميع بالمعاول والجواريف في جمع
الأتربة والنفايات وإلقائها في البئر.

في بادئ الأمر، أدرك الحصان حقيقة ما يجري حيث أخذ في الصهيل بصوت عال يملؤه
الألم وطلب النجدة. وبعد قليل من الوقت اندهش الجميع لانقطاع صوت الحصان فجأة،
وبعد عدد قليل من الجواريف، نظر المزارع إلى داخل البئر وقد صعق لما رآه، فقد
وجد الحصان مشغولاً بهز ظهره كلما سقطت عليه الأتربة فيرميها بدوره على الأرض
ويرتفع هو بمقدار خطوة واحدة لأعلى!

وهكذا استمر الحال، الكل يلقي الأوساخ إلى داخل البئر فتقع على ظهر الحصان فيهز
ظهره فتسقط على الأرض حيث يرتفع خطوة بخطوة إلى أعلى. وبعد الفترة اللازمة لملء
البئر، اقترب الحصان من سطح الأرض حيث قفز قفزة بسيطة وصل بها إلى سطح الأرض
بسلام .

وبالمثل، تلقي الحياة بأوجاعها وأثقالها عليك، فلكي تكون حصيفًا، عليك بمثل ما
فعل الحصان حتى تتغلب عليها، فكل مشكلة تقابلنا هي بمثابة عقبة وحجر عثرة في
طريق حياتنا، فلا تقلق، لقد تعلمت توًا كيف تنجو من أعمق آبار المشاكل بأن تنفض
هذه المشاكل عن ظهرك وترتفع بذلك خطوة واحدة لأعلى.

يلخص لنا الحصان القواعد الخمسة للسعادة بعبارات محددة كالآتي-:

1. اجعل قلبك خاليًا من الكراهية
2. اجعل عقلك خاليًا من القلق
3. عش حياتك ببساطة
4. أكثر من العطاء
5. توقع أن تأخذ القليل
وقبل هذا كله العمل بما يرضي الله

..................................................

أخر قصة عشان مطولش عليكوا

في إحدى المرات كان يوجد مجموعة من الضفادع الصغيرة
كانوا يشاركون في منافسة
والهدف كان الوصول إلى قمة برج عالي

مجموعة من الجماهير تجمعوا لكي يتفرجوا على السباق ويشجعوا المتنافسين

وانطلقت لحظة البدء.....
بصراحة لا أحد من المتفرجين اعتقد أن الضفادع الصغيرة تستطيع أن تحقق إنجازا وتصل إلى قمة البرج

وكانت تنطلق من المجماهير عبارات مثل
أوه، كم هي صعبة... لن يستطيعوا أبدا الوصول إلى أعلى
أو..لا يوجد لديهم فرصة ... البرج عالي جدااااا

واحد تلو الآخر، بعض الضفادع الصغيرة بدأت بالسقوط
ما عدا هؤلاء الذين كانوا يتسلقون بسرعة إلى أعلى فأعلى

ولكن الجماهير استمرت بالصراخ
صعبة جداً !!! .. لا أحد سيفعلها ويصل إلى أعلى البرج

عدد أكبر من الضفادع الصغيرة بدأت تتعب وتستسلم ثم تسقط

ولكن أحدهم استمر في الصعود أعلى فأعلى
وكان من الواضح انه مستمر في ذلك التحدي ولم يكن الاستسلام وارداً في قاموسه

في النهاية جميع الضفادع استسلمت
ماعدا ضفدع واحد هو الذي وصل إلى القمة

بطبيعة الحال جميع المشاركين أرادوا أن يعرفوا كيف استطاع أن يحقق ما عجز عنه الآخرون

أحد المتسابقين سأل الفائز: ما السر الذي جعله يفوز؟

الحقيقة هي
:
الفائز كان أصم لا يسمع
************
الدرس المستفاد
:
لا تستمع أبدا للأشخاص السلبيين واليائسين
سوف يبعدونك

سوف يبعدونك عن أحلامك المحببة والامنيات التي تحملها في قلبك
دائما كن حذرا من قوة الكلمات؛ فكل ما تسمعه وتقرأه سيتدخل في أفعالك
لذلك
كن دائما إيجابيا
وضع اصبعك في أذنيك لكي لا تسمع ذلك الشخص الذي يخبرك أنك لا تستطيع أن تنجز أحلامك
وضع في اعتقادك أنك تستطيع النجاح دائماً

طبعا القصص دى منقولة بس فعلا كل قصة فيهم تحمل منفعه وقيمة جميلة وكلها حاجات نقدر نستفيد منها فى حياتنا

اتمنى يكونوا عجبكوا

والسلام ختام

د/زويل.......نورت اسكندرية بجد !!!

2009-07-30T01:21:00.003+03:00

السلام عليكم ورحمة الله وبركاتة

ازيكم ازيكم ووحشتونى وحشتونى وكل الكلام اللى بيبقى فى الاول ده

انهارده كان يوم جميييييييييل

وانا قاعدة لا بيا ولا عليا وكنت شوية وبفكر انزل اتمشى فى محطة الرمل شوية عشان الدنيا حر ورطوبة وزحمة والمصيفيين عندنا منورين طبعا واحنا لسه مصيفناش

المهم مطولش عليكوا - لا طولى- صاحبتى كلمتنى وقالتلى ان فيه مؤتمر لد/زويل فى مكتبة اسكندرية ورايحيين وتعالى وبتاع المهم انا صراحة كنت مكسلة فى الاول بس بعد كده قررت اروح قلت محطة الرمل متلقحة طول السنة انما دى مرة كل عشر سنين و لا حاجه

ولو مكنتش رحت بجد كنت هازعل اوى من نفسى لانها بجد كانت حاجه جميلة جدااا

كان وقتها الساعة لسه 5 والمفروض المعاد 7 واللى ينزل الساعة 5 المفروض يروح يلاقى مكان يقعد فيه وقدام كمان

ده طبعا محصلش....

رجت لقيت زحمه فظيعة جدا متخيلتش بجد ان كل دول يجوا يحضروا وطلعوا كمان دول اللى مش عارفين يدخلوا وجايين متأخر زى حلاتى كده

والباقى دخلوا القاعة الكبيرة وقفلوها كمااان وقرروا ينقلوا الباقى لقاعة تانية اصغر

وطبعا لان الراجل مش بروحين فبتالى هيبقى موجود فى القاعة اللى فوق والناس التانية اللى هو احنا هنشوفة فى الشاشة بسسسس

بجد زعلت اوووى انى مش هاشوفه فيس تو فيس واسلم عليه وازي عامل ايه والغربة عامله معاك ايه والنظام ايه

بس يلا اهو احسن برضه من الناس اللى روحوا وملحقوش مكان فى القاعة ام شاشة

كانوا المفروض يعملوا شاشات عرض بره للمؤتمرات عامة ولا هو حلو للماتشات بس

وبدأ المؤتمر بكلمة الدكتور اسماعيل سراج الدين مدير المكتبة ورحب بالحضوروبالدكتور زويل وسط تصفيق حاد وزغروته من احدى الحاضرات D:) وبعدين جه رئيس جامعة اسكندرية ورحب بالناس برضة

وبعد كده جه طالب بالفرقة الثالثه كليه العلوم وقال كلمة لذيذة برضه

واخيييييييرا وبعد انتظار صعد الدكتور زويل ليلقى كلمته عالمنصة وسط تصفيق الحضور (مكنش فيه زغروتة تانى )

واول حاجه قالها انه فرح اوى بالزغروته D:

وبدأ يتكلم عن طفولتة وجزء من شبابه

وانه كان فى مدرسة حكومى عادية وعلى ايامه كانوا بيعتبروا اللى بيروح مدرسة خاصة يبقى فافى واى كلام

وان مدرستة كانت جميلة جدا وفيها انشتطة مش موجوده حتى فى مدارس امريكا دلوقتى

وانه بيته والدته بالذات كانت بتحافظ على صلاة الفجر وبتهيىء له جو مناسب

وكانت القيم موجوده فى شارعهم وحوالينهم فى دمنهور المكان اللى اتربى فيه يعنى كان مثلا لما كان جار ليهم يتوفى ميفتحوش الراديو بعدها لمدة اربعين يوم مش زى دلوقتى ):

واتكلم عن البيروقراطية المصرية والصعاب اللى قابلتة حتى لما جاتله المنحة للسفر

المفروض ان مدة الماجستير ياخد سنتين وهو خلصه فى 8 شهور تقريبا ولما جاتله المنحة كان لازم يجيب شهادة من الوزيرلا بانه ياخد اجازه لحد ما السنتين يخلصوا

وياريت على كده وبس لكن كمان رغم انها منحة من امريكا ومش بعثة من مصر معنى كده انها مش هتكلف البلد حاجه لكن رغم ذلك الحكومة المصرية رفضت ان الجواب يبقى باسم واحد بس وانما يبقى حاجه عامة

وكان عليه ساعتها انه ياخد الجواب يمرره على الدفعة كلها يمضوا انهم رافضين المنحة دى !!!!!!!!

وطبعا هما كانوا زمايل وكانوا مش بيزنقوا على بعض فى الحاجات دى بس دى لوازم التزنيق والخنقة !!

وطبعا كافح لحد ما وصل لمركز استاذ فى جامعة كالتاك

وقال ان امريكا نفسها بتواجه مشاكل فى التعليم

وان الحل مش فى ان اى بلد تنشىء مدارس وجامعات خاصة لازم يكون فيه نظرة شاملة وتقييم وانضباط اللى طالع من المصادر دى

وحاجه تانية اللى هو التعليم الاسرى انه ياخد قيمه من الاسرة نفسها والام ليها دور كبيير جدا لان دلوقتى السيدات بتعمل والحضانات غاليه وبعيدة ومفيش اهتمام بالاطفال زى زمان

وقال كمان عن مشكلة كبيرة جدا وهى الغزو الالكترونى حتى فى امريكا مشكلة لان لازم مثلا تحديد عدد الساعات والحاجات المفيدة واللى لا

وقال انه من اهم مقومات الابداع عدم الخوف السياسى او الثقافى بأى معنى لان لو انسان خايف لا يمكن يبدع وكمان طبعا الحياة الكريمة لان مفيد حد يبقى جعان ويقدر يبدع

وقال انه خلال تجاربه والدول اللى بيروحها

لاحظ تناقضات غرييبه جدااا

مثلا لقى تقدم علمى رهيب وفى برضه فقر رهيب

لقى أعلى ديموقراطية فى العالم وفى نفس الوقت اكتر عدد ديانات (200 ديانة)

معنى كده ان مش شرط يبقى معاك كل حاجة عشان تحقق حاجة

واتكلم عن مصر شوية وقال انه متابع الاخبار كويس وشايف انه اكتر حاجه منتشرة فعلا بين الناس وهى الشكوى وفقد الامل

وان فقد الامل مش المفروض يبقى موجود فى بلد زى مصر و ادى مثال على ده انه ايام الحكم التركى العثمانى كانت اوروبا واخده كل الترجمات والعلوم من الحضارة الاسلامية فى الاندلس

يعنى هما استفادوا مننا وبدأت هى تبنى منشأتها علميه وفى الوقت ده بدأت الدولة العثمانية انها تحس انها عملت اللى عليها ووقفت عن البحث العلمى وبدأ الوضع ينحدر ومازدهرش تانى الا فى عهد محمد على لما بدأ يهتم بالتعليم والبحث العلمى وارسال البعثات

وده معناه اننا عندنا القدرة اننا نقوم تانى ومفيش داعى لفقد الامل ده اللى موجود ده

واتكلم شوية عن اصلاح التعليم وانه من رأية انه من اهم الحاجات اللى لازم تتنفذ انه ميبقاش فيه تعامل متساوى لجميع عقول الطلبة ومستوياتهم

لازم يبقى فيه اهتمام وتحفيز للوهبين وتوفير الفرص ليهم وبرضه محاولة الرقى بالطلبة العاديين

وان النهضة لا يمكن تحصل الا لما يحصل تطوير للعلم والتكنولوجيا

وقال كمان انه فيه ناس ممكن تقول عليه متفاؤل او ساذج بعض الشىء نتيجة لنظرته المتفائلة دى

لكنه قال ان سبب ده نابع من عقيدة عنده وهى انه لو بصينا لاى حضارة هنلاقى ان الفلوس تيجى وتروح والموارد تيجى وتروح الا الموارد البشرية موجوده على طووووول

وان مصر غنية جدا بمواردها البشرية وفيهم ناس ممتازه فكريا وعلميا وسياسيا

وبيقول ان مصر عندنا فلوس كتير بدليل الفيلات والعربيات فى الساحل الشمالى (للاسف فى دى فعلا مش شايف الناس الحقيقة )

وبعد كده خلص وجت جزئية الاسئلة وكانت معظمها بتدور عن كيفيه تطوير التعليم ومجالات البحث العلمى

وللاسف الوقت مكفاش لكل الاسئلة

بس بجد كان وقت ممتع جدا وكنا نتمنى انه ميخلصش ونقدر نستفيد من كلامه اكتر من كده

مممممممممممممممممم وايه كمان

اعتقدطولت عليكوا وايدى وجعتنى اصلابس اتمنى اكون قدرت انقلكم اللى حصل فى اليوم ده

واللى حابب يسمع المؤتمر بنفسه ادخلوا عاللينك ده (لو كنت لقيته من الاول مكنتش رغيت كل ده بس قلت ادردش معاكوا D:)

http://webcast.bibalex.org/Cast/Video.aspx?ID=baJOBuFcF3qFua6PZljcvA

الليك مش هايشتغل غير من الاكسبلورورD:

بس كده....

وتصبحوا على خيييييييييييير.......

أحلامنا ...بين اليقظة.....و النوم !!!!

2009-07-09T19:10:00.002+03:00

السلام عليكم ورحمة الله وبركاتة

ازيكم كلكم نفر نفر ونفرايه نفرايه ؟؟؟؟ يارب تكونوا بخير جميعا

انهارده عايزه اتناقش معاكم فى موضوع يهمنى ويهم شريحة عريضه من أبناء جيلى ان لم يكن يهم جميع الاجيال

أحلام اليقظة!!!!

يعنى اما تبقى صاحى تماما فطرت وشربت الشاى وكمان نزلت وقاعد فى مكان

بس نايم وبتحلم كمااااااااان !!

ومش حاسس باللى بيجرا ادامك عالواقع انما عايش فى دنيا تانية انت اللى صنعتها لنفسك ؟؟

الدنيا دى انت اللى اختارت كل تفاصيلها واشخاصها واماكن احداثها

الدنيا دى ممكن تكون مبهجة بالنسبة لك وتكون مصدر سعادة ليك وفى نفس الوقت ممكن تكون مصدر تعاسة وده لما تتخيل حاجات بائسة وكئيبة

بس هل الاحلام دى سواء مبهجة او كئيبة تعتبر هروب من الواقع وعدم قدرة عن المواجهة ؟؟

مهو اكييد فى وقت ما احنا بنحلم بنضييع وقت من الوقع الل احنا عايشينه فعلا وخلال كده تركيزنا بيضيع فى اى حاجه المفروض نقوم بيها فى حياتنا ؟؟؟

الافكار دى دايما بتدور فى ذهنى عشان كده دورت على اصل الحكاية دى وقلت اشوف بتوع علم النفس قالوا ايه عن الموضوع ده

تبدأ أحلام اليقظة منذ فترة الطفولة يكون الطفل فيها خصب الخيال ، ولكن يجب أن تنتبه الأمهات إلى أن رؤية الطفل لأفلام الرعب أو العنف تجعل الطفل يخلط بين الأطفال ما بين ما يحدث فى الخيال مع الواقع خلال المعايشة الأمر الذي يجعله يعيش أحلام يقظة مخيفة، أما الأشخاص الأسوياء البالغين فسرعان ما يعودين إلى الواقع, أما الاستغراق الشديد والإسراف فيها يستنفذ جزء كبير من الطاقة النفسية مما يؤدي إلى العجز عن التمييز بين الواقع و الخيال.

يعنى فعلا اى حاجه بنشوفها سواء فيلم مسلسل اى حاجه بتأثر على احلامنا دى وبتساعد على رسم العالم البديل اللى بنعيش فيه

وقالوا كمان .....

ومن أكثر الفئات التى تلجأ لهذا النوع من الأحلام هم المراهقين فمن خلال هذا العالم يتمكنون من تهيئة أنفسهم بتحقيق شئ ما سواء كان إيجابي أو سلبي ، منهم من يخرج منها بسلام وآخرون يعيشون فى غيبوبة ويصدقون ما تم نسجه بالخيال .

طيب انا فى الحتة مش قادرة افهم اشمعنى سن المراهقة هو اكتر فترة بيتعرض خلالها الشخص لأحلام اليقظه ؟؟؟

هل ده راجع للفراغ مثلا ؟؟ ومين قال ان المراهقيين عندهم فراغ كبييير مش موجود عند اى شخص فى اى فترة عمرية مختلفة ؟؟

وبعد جابولنا بعض الامثلة لحالات بتحكى عن احلامها وايه اللى بتشوفه اثناء يقظتها

تقول رانيا فودة 22 سنة : أحلام اليقظة لا تنتهي فعقلي ملئ بالأفكار
يتربع فوقها فارس الأحلام ، ابدأ القصة بكفاح البحث عن عش الزوجية واختيار الديكورات ورومانسية لا تنتهي إلى أن يجمعنا سقف منزل واحد ، هذا بالنسبة إلى حلمي الأول ، أما الثاني هو تأثري بالشخصيات النسائية الناجحة كالمذيعة الناجحة مني الشاذلي وحوارتها الجريئة مع ضيوفها أحياناً أحاول أن اتقمص دورها وشخصيتها فى الواقع ، أما الأحلام الأخري تتعلق بالمشاهد الرومانسية فى المسلسلات التركية ، واقتنائي لسيارة نوع "هامر" مع اتقاني لفنون القيادة المتهورة.

والنوع ده من الاحلام منتشر جدا فعلا خاصة بين الفتيات ودايما بتتراوح احلامهم بين فارس الاحلام الرومانسى او الاطفال وطريقة تربيتهم او هتصرف فلوسها فى اية ؟؟؟

وانا برجح النوع ده من الاحلام لانعدام الحاجات دى فى مجتمعنا للظروف الصعبه فمبقاش فيه لا رومانسيه ولا فلوس اصلا ولا بتاع فى البتاتيع

وهل اجدادنا ايام زمان كان عندهم النوع ده من الاحلام ولا الظاهرة دى زادات دلوقتى ؟؟

وهل فعلا احلام اليقظه فى مجملها ظاهرة سلبية ولا ايجابية ؟؟

وجاوبت على سؤالى الاخير ده د/جزويت ناصحة بضرورة التفكير في المقتطفات التى تخص الموضوع أو المشكلة لتكون مفيدة ، وأيضاً بإمكان الإنسان أن يلقي الضوء على جميع الجوانب بتعدد أفكاره ولا يركز تفكيره على نقطة واحدة فقط وذلك بإنطلاق الأفكار بدون تقييد فى موضوعات مختلفة فتتبلور فكرة محددة فى المخ عن طريقها يمكن أن تصل بالفرد الإبداع فى الموسيقي ،الفن أو أي علم من العلوم.

بس هل فعلا احنا نقدر نتنشل انفسنا من احلام اليقظه وندرسها ونحاول نطلع منها بحاجة مفيدة ؟؟

ولا بيبقى مجرد وقت بنقضيه فى العالم البديل ده ؟؟

وليه اصلا بنحلم واحنا صاحيين ؟؟؟ ليه منكتفيش بالحلم واحنا نايميين ؟؟

طب هل الاسباب اللى بتخلينا نحلم واحنا نايمين هى نفسها اللى بتخلينا نحلم واحنا نايميين ولا بتختلف الاسباب والتأثيرات والنتائج ؟؟

من الاخر هل فعلا احلام اليقظه دى نعمة لينا ولا نقمة علينا ؟؟

ازاى نقدر نواجهها او نستفيد منها ؟؟؟

أسئلة كتيره محتاجة أجابة ..........

فى انتظار مشاركتم ومناقشتكم.........

أقوم انا بقى احلملى ساعتين تلاتة كده عشان اكمل باقى المغامرات D:D:D:

والسلام ختام .....

الخيانة......لية ؟؟؟؟

2009-06-26T18:48:00.002+03:00

السلام عليكم ورحمة الله وبركاتة

ازيكم كلكم عاملين ايه ؟؟اتمنى تكونوا بخير ؟؟؟

انهارده عايزه اكلمكم فى موضوع لاحظت انه انتشر اوى اليومين دول

هتقولولى وهو ايه اللى منتشرش اليومين دول ما الكدب انتشر والغش انتشر والاسعار غليت والناس مش لاقيه تاكل والدنيا باظت

هقولوكوا بس ليه الخيانة تنتشر بين الناس ؟؟

الخيانة دى بجد بعتبرها اسوء الصفات واكتر حاجة بتجرح الانسان

الخاين كداب & الخاين غشاش & الخاين منافق

ليه الراجل يخون مراته عشرة عمره

للدرجة دى بقينا بننسى لبعض اى لحظه حلوة حصلت فى الحياة ونخون اللى حبيناه فى لحظه ونطعنه فى ضهره

ليه الصديق يخون صديقه ويبيعه

نفسى اعرف ايه الدوافع القويه بجد اللى تخلى انسان يعمل كده ؟؟؟

قد كده الشيطان عماه وخلاه ينسى كل الخير ويبادر بالشر وانه يجرح الانسان اللى فاكره اخلص انسان ليه فى الدنيا

نفسى بجد اتكلم مع حد خاين اعرف هو ليه عمل كده ؟ مش عايزه اعرف المبررات الواهيه اللى بيقولها ادام الناس عشان يبرر فعلته

عايزه اعرف هو كده بينه وبين نفسه مرتاح ؟؟؟

لما الراجل بيخون مراته ويتزوج من وراها بيبقى مرتاح

وقد كده مش قادر يواجهها و يصارحها بعيوبها او حتى يقولها انه هيتجوز

مش احسن ما يطعنها فى ضهرها ويسببلها صدمه هى ولاده لما تكتشف لوحدها

ويبقى شكله ايه ادام ولاده بعد كده ؟؟ هيحترموه ازاى ؟؟

مع انه لو كان قال من نفسه كانوا ممكن يتفهموا الموقف ويفضل ابوهم اللى بيحبوه ويحترموه فى نظرهم

طب والست اللى الراجل بيتجوزها على مراته دى ؟؟ بتراضاها على نفسها ازاى انها تشارك فى الجريمة دى ؟؟مهى ممكن جدا تكون مكان مراته الاولانيه فى يوم من الايام

من مده سمعت حكايه ست بتحكى عن جوزها واللى عمله فيها

الست دى فى قمة الجمال والثقافه والنظام وكل الصفات الحلوة فيها

الست دى كانت عندها خدامة بتشتغل عندها كل يوم

قامت فى يوم قالتلها انا هاتجوز وهاسكن عالبحر ومش هاقدر اجى تانى

قامت الست بحسن نية باركتلها وادتلها مكأفاة الف جنيه عشان الجواز والخدامه مشيت

جوز الست دى كان مفهمها انه بيسافر فى شغل وكده وبيقعد فترات بره البيت

والست طبعا مش مديه خوانة

قامت فى يوم من الايام الست دى كانت ماشيه عالبحر لقت عربيه جوزها راكنة ادام عمارة

سألت البواب قالها ده ساكن فوق

طلعت لقت جوزها هو العريس اللى اتجوز الشغالة ومعاهم ابن !!!

نسيت اقولكم ان اليوم ده كان بعد سبع سنيييييين !!!!

تخيلوا !!!!

قعد يخونها سبع سنين بحالهم

انا مبقلش ان الست ده خاليه من العيوب لانها اكيد فيها العيوب والمفروض منسمعش من طرف واحد

بس برضه مهما عملت متستحقش منه الخيانة الفظيعه دى

انا نفسى بجد اسمع من الراجل ده دوافعه ليه عمل كده ؟؟ وايه احساسه طول سبع سنين خيانة ؟وطول المدة دى ضميره كان فين

وغيرها وغيرها من الحايات اللى بستعجب انها بتحصل

ولا استعجب ليه ما احنا فى زمن العجايب

طبعا الخيانة اللى قاصده اوصلهالكم مش مقتصره على الزوج والزوجه وبس ده الموضوع كبييير اوى

بس هى القصه دى اللى اثرت فيا بجد ومش قادره استوعب بجد ازاى ده حصل

انا خلصت كلامى ......ومستنيه كلامكم

والسلام ختام......

ايه ده ؟؟؟ دى بتكتب عالنت !!!

2009-06-17T01:37:00.003+03:00

السلام عليكم

اخيييييييييييييييييييرا خلصت امتحانات

يا ساتر ده كان هم وانزاح فعلا

تخيلوا امتحانا 32 امتحان السنه دى

كانت حاجه مرهقه بجد ده بدل ما يدلعونا كده واحنا لسه صغيرين وفى اول سنه

هههههههههههههههههه

يلا الحمدلله انها عدت وفى انتظار النتيجه ادعولى بقى ربنا يوفقنى واطلع بتقدير كويس

ــــــــــــــــــــــــــــــــــــــــــــــــــ

بقالى مدة فى موضوع مضايقانى وقلت اشوف الناس هنا رأيها ايه ؟؟؟

يعنى معظم البنات دلوقتى عندهم نت ومشتركين فى منتديات وفيس بوكات وعندهم مدونات

وبالتالى اكيد بيشاركوا برأيهم فى مواضيع كتيره ومختلفة

سواء بقى سياسية اجتماعيه ومواضيع ترفيهيه

وده طبعا بينمى كتير من ثقافتها ومتابعتها للى بيحصل فى الدنيا

وبما ان مفيش نت للبنات ونت للولاد

فبتالى فيه اختلاط بينهم وبيتكلموا مع بعض عادى جدا

مع ان ممكن البنت دى تكون مبتكلمش ولاد فى الحياة الواقعيه بس بتكلمهم عالنت ؟؟

طيب دلوقتى عندنا شاب بيكلم بنات عالنت وبالتالى بنت بتكلم شباب عالنت

طيب عالواقع البنت مبتكلمش والشاب ممكن وممكن ؟؟؟

الشاب عالواقع شايف البنت اللى قدامه محترمه جدا مبتكلمش غير محارمها وملتزمه جدااا

هل لما يعرف انها بتكلم شباب عالنت نظرته واحترامه ليها هيقل ؟؟

طب ليه ؟؟؟ عشان بتشارك برايها مع الناس ؟؟

طب مهواو غيره من الناس دول اللى هى بتكلمهم

وهو نفسه عالنت بيتناقش معاها وبيهزر معاها وبيبعتلها رسايل خاصه وعاجبه شخصيتها ودماغها

يعنى البنت تعمل ايه عشان تعبر عن نفسها وعن شخصيتها مع الناس وبتلاقى قبول على افكارها وارائها عالنت وعلى نقيض تلاقى نفور منها عشان هى بنت وحشه وبتتكلم عالنت !!!

طب معنى كده ان البنات كمان المفروض ترفض الشاب اللى بيعبر عن رأيه على النت

مهو اكيد برضه بيرد على فلانه ويشكر علانة

هل فعلا انت كشاب ترفض مثلا ترتبط ببنت عشان بتكتب وبتشارك عالنت او حتى ممكن تقل من نظرك ؟؟

وهل هتسمح لزوجتك انها يبقى عندها مدونه وتشارك عالنت وترد على ده وتنتقض ده وتشكر ده

وايه هى ببقى الحدود اللى المفروض البنوته عشان تبقى حلوة وشاطورة تعملها عشان تبعبر عن رأيها (وش متغاظ)

مستنيه اتصالتكم وارائكم على 09001234 وابقوا قابلونى لو حد رد D:

والسلام ختام ;

يحسبهم الجاهل أغنياء من التعفف

2009-05-28T13:08:00.004+03:00

السلام عليكم

انهارده بجد مش عارفة اتكلم اقول ايه بجد

أد ايه احنا بجد بقينا مش حاسيين بقيمه النعم اللى فى ايدينا وبنتبطر عليها

كل واحد فينا بس اهم حاجه عنده نفسه ثم نفسه مبقناش حتى حاسيين بالناس اللى حوالينا ولا نعرف جيرانا عاملين ايه

منعرفش عايشيين ازاى بياكلوا ويشربوا ولا مش لاقيين بيتعالجواولا مش طايليين عايشيين اصلا ولا ميتيين

ازاى تبقى ست كبيرة ضريرة وحدش بيخدمها

لا اولادها ولا جيرانها

بجد مش عارفة ولادها دول بيجيلهم نوم بليل ازاى وهما سايبهم امهم كده

المسجد بيديها 10 جنية فى الشهر تعيش منهم !!! ودخلها كله على بعضه 60 جنية

60 جنيه بتاكل ولا تشرب ولا بتتعالج منهم

واحنا عندنا كل حاجه ومش عاجبنا !! والست راضيه جدا بحالها وبتلتمس العذر لولادها اللى سايبنها كده

بجد الست دى بطلة انها عايشة فى الظروف دى وبتحمد ربنا وبتشكر فضله على نعمه الكتير عليها

ياريتنا حتى ربعها فى الرضا ده

دى حتى كلمة ربنا طالعة منها مختلفه عن اى حد بيقولها !!

الست دى مجرد حالة من مئات الحالات واكتر كمان من الناس حوالينا وعايششيين وسطينا واحنا مش حاسيين

ياريت فعلا نبص حوالينا ونساعد الناس اللى زيها وموجودين كتييير ونتعلم منها الرضا ده

انا بجد اتأثرت بيها جدا زى ناس كتيير اتأثرت بس يكون النتيجه بعد ما تشوفها تأثر يتبعه تغيير ايجابى فى تصرفاتنا وحياتنا مش نسيان وتلاهى فى الدنيا تااانى

واسيبكم مع الست البطلة دى وهى بتحكى حالها ومش بتشكى

ربنا معاها ومع اللى زيها وربنا يهدى ولادها يروحوا يزورها ويساعدوها والناس تحس شوية بالنعم اللى هما فيها ويساعدوا غيرهم

يارب لك الحمد كما ينبغى لجلال وجهك وعظيم سلطانك

ازاى نفرق بين لحم الخنزير واللحوم الاخرى ؟؟؟

2009-05-24T20:48:00.010+03:00

السلام عليكم ورحمة الله وبركاتة

ازيكوا يا جماعة عاملين اية يارب تكونوا بخيييير

وربنا يوفق اللى بيمتحنوا زى حلاتى كده ومتكعبلين فى المزاكرة واللى مش بيمتحنوا برضه ربنا يوفقهم (:

ـــــــــــــــــــــــــــــــــــــــــــــــــــــــــــــــــــــــــــــــــ

انهارده لقيتلكم كلام مهم اوى عن ازاى نفرق بين لحم الخنزير واللحوم الاخرى

بجد الحكاية دى مهمة جدا لان الخنازير تلات تربعها ادبحت وممكن جدا تنزل الاسواق على انها لحوم عادية

وبما اننا مش بناكله فانا جبتلكم الطرق المختلفه اللى نقدر نعرفه بيها وميضحكش علينا

ياريت يا جماعة تنشروا الصور دى

ومتنسوووش تدعولى

فى رعاية الله

ارض بما قسمَ اللهُ لكَ تكنْ أغنى الناسِ

2009-04-25T17:50:00.005+03:00

السلام عليكم ورحمة الله وبركاتة

ازيكوا جميعا ؟؟يارب تكونوا بخير

كتير مننا بيفكر دايما انه معاه القليل وغيره معاه الكتير

وكل واحد باصص للى فى ايد غيره

ودايما نسمع اللى بيقول مثلا :

بس لو كنت غنى شويه

انا ناقصانى السعاده وراحه البال

بس لو كنت جميله شويه كان زمانى اتخطبت

مش كان زمانى متجوزه دلوقتى

انا ايه اللى خلانى اتجوز دانا كنت فى بيت ابويا ملكة

بس لو كان عندى اطفال

جتها نيله اللى عايزة خلف تيجى تتفرج

يعنى من الاخر محدش عاجبه حاله

مع ان لو كل واحد فكر فى اللى ايده هو بس هيلاقى عنده نعم كتير اوى ربنا اداهاله وتستهال اننا نحمد الله عليها ونشكره كتيييييير عليها

وهيبقى سعيد وفى حاله رضا وسلام داخلى مع نفسه

بخصوص الموضوع ده كتب الشيخ الرائع/عائض القرضى كلام مقنع جدا وجميل جدا

هو من كتابه لا تحزن والكتاب ده انا بجد حبيته جدا فيه كل حاجه باسلوب مقنع ومريح ورائع جدا وفيه كذا حاجه فيه شدتينى وحابه ابقى اتناقش معاكوا فيها باذن الله

وده كلامه فى الجزئيه دى

عليكَ أن تقْنع بما قُسِمَ لك من جسمٍ ومالٍ وولدٍ وسكنٍ وموهبةٍ ، وهذا منطقُ القرآن ﴿ فَخُذْ مَا آتَيْتُكَ وَكُن مِّنَ الشَّاكِرِينَ ﴾ إنَّ غالبَ علماءِ السلفِ وأكثر الجيلِ الأولِ كانوا فقراء لم يكنْ لديهم أُعطياتٌ ولا مساكنُ بهيةٌ ، ولا مراكبُ ، ولا حشمٌ ، ومع ذلك أثْروُا الحياة وأسعدوا أنفسهم والإنسانية ، لأنهم وجّهوا ما آتاهمُ اللهُ من خيرٍ في سبيلِهِ الصحيحِ ، فَبُورِكَ لهم في أعمارِهم وأوقاتِهم ومواهبهم ، ويقابلُ هذا الصنفُ المباركُ مَلأٌ أُعطوا من الأموالِ والأولادِ والنعمِ ، فكانتْ سببَ شقائِهم وتعاستِهم ، لأنهم انحرفوا عن الفطرةِ السويَّةِ والمنهجِ الحقِّ وهذا برهانٌ ساطعٌ على أن الأشياءَ ليستْ كلَّ شيءٍ ، انظرْ إلى من حمل شهاداتٍ عالميَّةً لكنهُ نكرةٌ من النكراتِ في عطائهِ وفهمهِ وأثرهِ ، بينما آخرون عندهم علمٌ محدودٌ ، وقدْ جعلوا منه نهراً دافقاً بالنفعِ والإصلاحِ والعمارِ .

إن كنت تريدُ السعادةُ فارضَ بصورتِك التي ركبَّك اللهُ فيها ، وارض بوضعكِ الأسري ، وصوتِك ، ومستوى فهمِك ، ودخلِك ، بل إنَّ بعض المربّين الزهادِ يذهبون إلى أبعدِ من ذلك فيقولون لك : ارض بأقلَّ ممَّا أنت فيهِ ودون ما أنت عليهِ .

هاك قائمةً رائعةً مليئةً باللامعين الذين بخسوا حظوظهُمُ الدنيوية :

عطاءُ بنُ رباح عالمُ الدنيا في عهدهِ ، مولى أسودُ أفطسُ أشَلُّ مفلفلُ الشعرِ .

الأحنفُ بنُ قيس ، حليمُ العربِ قاطبةً ، نحيفُ الجِسْمِ ، أحْدَبُ الظهرِ ، أحنى الساقين ، ضعيفُ البنيةِ .

الأعمش محدِّثُ الدنيا ، من الموالي ، ضعيفُ البصرِ ، فقيرُ ذاتِ اليدِ ، ممزقُ الثيابِ ، رثُ الهيئةِ والمنزلِ .

بل الأنبياء الكرامُ صلواتُ اللهِ وسلامُهُ عليهم ، كلٌّ منهم رعى الغنَمَ ، وكان داودُ حَدَّاداً ، وزكريا نجاراً ، وإدريس خياطاً ، وهم صفوةُ الناسِ وخَيْرُ البشرِ .

إذاً فقيمتُك مواهبُك ، وعملُك الصالحُ ، ونفعُك ، وخلقك ، فلا تأس على ما فات من جمالٍ أو مالٍ أو عيالٍ ، وارض بقسمِة اللهِ ﴿ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا ﴾ .

****************************************

يعنى لو كل انسان فكر فى استغلال امكانياته كويس هيوصل للى هو عايزه واحسن كمان بسهوله جدا ان شاء الله

واتمنى اكون افدتكم ومستنية ارائكم

عااااااااااجل من حكمدار العاصمه !!

2009-04-25T00:33:00.000+03:00

تحديث :حبيت بس أقولكم انى غيرت اسم المدونه من رودى هانم الى ألوان الحياه عشان احس انه بيعبر عن محتوى المدونه لانى بكتب فى كل الالوان ولان الاسم الاولانى كتبته وانا لسه بعمل المدونه ومفكرتش فى اسم ساعتها يعنى فطلع كده وخلاص انا كنت ناويه اغير اللينك كمان بس قولت بلاش عشان ميبقاش فيه لغبطه والناس تعرفنى ومحدش يجى يقولى انتى مييييييييين ؟؟

بس كده ........

____________________

سيداتى انساتى سادتى :

اسعد الله صباحكم ومساؤكم

نعلمكم انه فى اليوم 20/4/2009 قام بعض الارهابين بقطع كل كابلات النت وشبكات التليفون المحمول والتليفونات الارضيه وشبكات الكهرباء فى جميع انحاء العالم سواء كابلات بحريه بتجنيد الضفادع البشريه والاسماك المتوحشه او كابلات بريه جويه زراعيه صحروايه كله كله ولم يكتفوا بذلك بل قاموا بتدمير كل محطات البنزين اللى يقدروا عليها وفى طريقهم لتدمير كل الطرق الصالحه لسير السيارات والقطارات ولن يكون هناك اى وسيله اتصال اخرى سوى السفر على الجمال او المشى وسوف يتم تدبير جمل لكل مواطن حتى يتم تيسير عمليه الانتقال وفى شريط مسجل للجماعه الارهابيه -جماعه العوده للبدائيه- بررت الجماعه موقفها برغبتها فى العوده لحياه البدائيه واجبار الشعوب على التخلى عن وسائل التكنولوجيا الحديثه لما لها من اضرار الانعزال عن العالم الحقيقى وتقليل الترابط الاسرى واضرار ماديه حيث تسنزف اغلب دخول المواطنين فى وصلات النت والسيبر الساعه بجنيه ونص وكروت الشحن المختلفه وسوف يكون هذا اليوم هو اخر يوم للتعامل مع العالم الالكترونى هذا وقد اعذر من انذر واى حد هيحاول يوصل النت بتاعه او يتكلم فى التليفون باى طريقه من الطرق الملتويه هنعرفه شغله

انتهى البياااااان

ايه رأيكوا فى البيان ده ؟؟؟

تخيلوا فعلا لو قمنا يوم من النوم ملقيناش اى وسيله اتصال الكترونيه ولقينا مفيش نت ولا تليفون ولا اى حاجه ؟

طب لو قالولكم ان انهارده اخر يوم هتستخدم فيه الحاجات دى وانها ادامك لحد مهله معينه هتعمل ايه فى المهله دى ؟؟

هنعمل ايه مع الناس اللى بنتعامل معاها عالنت بس ما احنا مش هنعرف نكلمهم تانى

ولا اللى بنكلمهم عالتليفون بس هنوصلهم ازاى ؟؟

هل كل واحد هيقدر يتأقلم مع حياته الجديده ؟ وهل الوقت هيبقى ممل فعلا ؟؟

وهل فعلا احنا قصرنا فى حياتنا الحقيقيه والحياه الالكترونيه احتلت اهتمام اكبر عندنا ؟

وهل احنا فعلا أساءنا استخدان التكنولوجيا ؟؟

انا عن نفسى مش متخيله وضع زى ده ممكن اعمل فيه ايه ؟

بس حاسه ان الحياه هتبقى ضيقه اوى ؟؟

انتوا ايه رأيكوا ؟ وكل واحد هيعمل ايه لو ده حصل ؟؟

كويس ان النت شغال عشان اعرف اسئلكم وتردوا عليا :D

ايه رأيكوا تفضفضولى ؟؟

2009-04-14T13:26:00.003+02:00

السلام عليكم ورحمه الله وبركاته

كيف حالكم جميعا ؟؟

جايه انهارده وجايبلكم فكره اتمنى ان تحوز -حلوه تحوز دىD:- رضاكم

دلوقتى يا جماعه انا بدأت تظهرلى تمحورات فى سخصيتى وقلت لازم اجربها عليكوا

يعنى فى كتير من اصحابى بقوا دايما بيجوا يحكولى على مشاكلهم او حتى مش مشاكل بتبقى فضفضات وده لاحساسهم انى مريحه مثلا فى الكلام او بخفف عنهم كتير فيحبوا يجوا يستشيرونى

وبجد دى حاجه بتخلينى فى قمه السعاده بجد ان حد يحكيلى عن اى حاجه وانا احاول اساعده ولو بمجرد الكلام واقتراح حلول مناسبه او حتى انى اخليه يفك عن نفسه الضيق شويه

ده غير انى فعلا بستمتع بالاجتماعيات وانى داينا بحب اقرا المشاكل وافكرلها فى حلول وبحب برضه اقرا فى علم النفس كتير

وبما انى بعتبر الالم النفسى ولو بسيط بيبقى اكثر تأثيرا على الانسان من الالم العضوى

ومن هنا جت لى الفكره دى

وهى انى حابه اعمل ركن هادىء للفضفضات واى مشاكل او حتى اى حاجه ولو بسيطه مضايقه اى حد يكتبها وانا بخبراتى الصغيره ومؤهلاتى المتواضعه دى احاول اساعده

فانا بفكر اعمل مدونه تانيه لو حابين الفكره تبدءوا تبعتولى مشاكلكم وانا انشرها وباذن الله اقدر احلها

وممكن عشان ميبقاش حد محرج انه يتكلم عن مشكلته ممكن تبعتولى المشاكل على شكل تعليقات بغير معرف او انا ممكن اعمل التعليقات بموافقتى وتعليقات المشاكل والفضفضات موافقش عليها وانشرها عالمدونه كبوست عادى بدون ذكر اسم صاحب المشكله وتبعا هيبقى مرحب بتعليقات المشاهدين قصدى المستمعين يوووووه تعليقلتكم يعنى وتقدروا تشاركونى فى حل المشاكل والفضفضات

انا بصراحه لسه ما استقريتش على طريقه الارسال او التواصل لانى مستنيه ارائكم الاول فى الفكره لانها ليكوا وانتوا اللى هتنشطوها واللى عنده اى اقتراحات جديده ياريت يقولها واللى مش عاجبه الفكره خالص يقول برضه وانا لو لقيتكم كتير مش موافقين هرجع الشزلونج للراجل واخد القسط اللى دفعته وأمرى لله

فى رعايه الله وأمنه........

تصدقوا ان الانسان الطيب مش أهبل !!!

2009-03-20T17:10:00.003+02:00

ازيكوا يا جماعة عاملين ايه كلكوا يارب تكونوا بخير يارب............

بعتذر عن اغيابى وعدم متابعتى ليكم بس مشغوليات والله

ان شاء هحاول اتابعكم أول بأول باذن الله

ندخل فى الموضوع بقى وكفاية رغى عليكوا
ـــــــــــــــــــــــــــــــــــــــــــــــــــــــــ

والله الشخص الطيب ده مظلوم معانا أوى دايما تلاقيه موصوف بالعبط والهبل والسذاجة او انه مش ابن الزمن ده على اساس انه مولود سنه 1899 وجه بآلة الزمن عندنا مثلا

بقى الشخص اللى بيعامل غيره كويس بحسن نية وصفاء وايثار يبقى اهبل والانسان الخبيث اللئيم اللى بيضحك على مخاليق ربنا يبقى هو ده الفلتة اللى محصلش وده اللى نعجب بيه ؟؟ سبحان الله بجد على ده زمن مقلوب

مش عارفة ليه كلنا او معظمنا بنستغرب الانسان الطيب اوى واحيانا كمان بنتريق عليه عشان خدم حد او جه على نفسه عشان يساعد غيره ونقول لاااااااااا ده أهبل

مع ان الطيبه والهبل ملهمش علاقة لغويا ولا سلوكيا ولا باى نوع تانى من انواع العلاقات

من كتر مانا مستغربة من ارتباط المعنى ده فى ذهن الناس جيت على نفسى اوى واتحركت من مكانى وقمت كمان جبت المعجم الوسيط -اللى عمرى ما فتحته ولا فكرت افتحه شان اشوف فيه كلمه واقفه معايا-عشان اشوف ايه علاقه الطيبة بالهبل لقيت الآتى:

(هـ .ب.ل) : فلان......أى فقد عقله وتمييزه

(ط.ي.ب): كل ما خلا من الأذى والخبث

اهو يا جماعة ملهمش علاقة خااااااااااالث المعنى الاول يعنى الانسان بيكون عقليا غير متزن عنده خلل عنده هسهس يعنى بيكلم نفسه وهو مااااااشى

التانيه يعنى شخص كريم محترم لا بيتخابث ولا بيتلائم على حد وعمره ما كلم نفسه وهو ماشى فى الشاعر ولا بيغنى انا عندى شعره ساعة ترووح وساعة تيجى.......

بقى بذمتكم دى فيها ايه تزعل الناس منه او تخليهم يسخروا منه ويتهموه بفقدان العقل وانهم هم اللى جايبين الديب من قفاه

ده حتى البنى آدم الطيب دلوقتى من كتر اللى بتقاله بقى بيحب ينفى عن نفسه التمهة ولو حد مدح فيه فيه طيبته تلاقيه بيقول انا طيب اه لكن مش عبيط

طيب وهو حد جاب سيرة عبط لا سمح الله ...........

خلاص بقت الاخلاقيات الجميلة وصمة عار بنحاول نداريها ؟؟

ليه منمدحش الطيب لطيبته وحبه للخير وحبه مساعدتنا ولا احنا لازم ناخد على دماغنا ونتعامل مع ناس ميعرفوش يعنى ايه خير ولا يعنى ايه مساعدة او ايثار ونرجع نقول اييييييييه دنيا فين ايام الناس الطيبين والزمن الجميل ؟؟

اهم الناس الطيبين ركبوا آلة الزمن ورجعوا تانى عاجبكوا كده.............

بين الآباء والأبناء

2009-02-20T16:45:00.003+02:00

امبارح وانا فى الكلية لقيت واحدة صبحتى مسنتحه كده ومسبهلة على غير عادتها فقل متجيش برضة اسيبها فى حالها لازم اروح انكشها شويه واعرف مالها , المهم مكدبتش خبر وروحتلها

أنا : ايه يا بنتى مالك كده ضاربه الوش الخشب كل ده عشان هنشرح فرافييير وارانب الترم ده , عادى يعنى لا داعى للقلق كلنا هيغمن علينا فى اول سكشن ده قدرنااااا

هى : لا عادى انا مستغنيه عن العشر درجات بتوعهم اصل الحكايه مش ناقصة

انا : قولتييييييلى بقى ايه هى الحكاية اللى مش ناقصة دى

هى :مفيش !!

انا :ايه يا بت انتى يابت !!قولى قولى متخافش سرك فى بير مخروم ان شاء الله .

هى :دماغى وجعتنى من كتر التفكير مش عارفة اعمل ايه ؟

انا :فى اية ؟!!

هى : فى اى حاجه وكل حاجه مش عارفة اخد اى قرار فى اتفه الامور فى حياتى , حاسه انى تايهه مش عارفة ابقى ازاى ؟عايزة اعمل اللى يرضى ربنا ويرضينى ويرضى اللى حواليا

انا : وايه اللى مخليكى مش عارفة تاخدى قرار ؟؟

هى : مجربتش قبل كدة اخد اتصرف فى حياتى بطريقتى , من وانا صغيرة ولحد دلوقتى كمان وماما وبابا هما اللى بيتصرفوا فى كل شئونى ولما كنت بطلب انى أنا اللى اتصرف فى حاجة بيبقى دايما الرد انى هيضحك عليا ومش هاعرف اعمل حاجه وهما ادرى

انا :معظم أبهاتنا وامهاتنا بيحبوا يكونوا المسئولين عننا مهما كبرنا لاننا فى نظرهم بنفضل صغيريين وهما بيفضلوا اكثر خبرة مننا

هى : بس انا نفسى اجرب واغلط واتعلم , مهما اما كانوا فى سننا كانوا بيجربوا عشان كده اخدوا الخبرة دى ، امال احنا هنتعلم امتى ناخد قراراتنا بنفسنا ومش بيدونا الفرصة نعبر عن نفسنا برؤيتنا احنا مش برؤيتهم هما ؟؟

انا : مهو ده برضة نابع من حبهم لينا وانهم مش عايزينا نقع فى نفس غلطاتهم زمان فالهدف صح وان كان فى بعض الاوقات الاسلوب غلط

هى : انتى عندك حق بس مهو الاسلوب ده هو اهم حاجه وحسب الاسلوب بختلف رد فعل الشخص يعنى لو كان الاسلوب مقنع اكيد هقتنع وهنفذ اللى هما عايزينه برضا وقناعه منى انما اسلوب العافيه اللى بيتبعه اغلب الاباء مع اولادهم ده بيزيدهم عند وبيعملوا الحاجه وهما حاسين انها مفروضه عليهم حتى لو كانت صح فيها ايه لما الام بدل ما تهدد بنتها مثلا انها لو عملت كذا مثلا هتوريها وهتسوى وهتخلى مهى لو قعدت معاها وفهمتها المزايا والعيوب وسابتلها حرية الاختيار فى الاخر هيبقى افضل كتيير

انا : هرجع واقولك ان برضه الام بتخاف على بنتها وهتخاف انها تختار غلط وبعدين اللى انتى بتكلميه فيه ده مشاكل جيل بحاله من الابناء مه جيل كامل من الاباء ومتهيألى اما نبقى زيهم كده هنخاف على ولادنا برضه بس اعتقد انه هيبقى مع اختلاف الالوب اللى ميخليهمش يفقدوا الثقه بنفسهم وعموما يعنى متأزميش نفسك وخدى الموضوع بالتدريج يعنى تقدرى تتناقشى معاهم بهدوء وتحاولى تزودى مساحه حريتك وتوسعى قرارتك

هى : ياريت بجد اقدر اوصل لحل يريحنى ادعيلى بس انتى

انا : ربنا معاكى ومعانا يستى , يلا اسيبك انا بقى عشان عندى سكشن بعيد عنك

هى : عندك سكشن فيراااااااان ولا ايييييه ؟؟

انا : لااااااا حرام عليكى يا شيخة لسه بدرى يا بارده انتى

هى : طويب عموما مسيرك هتقابليهم روحى بقى عشان مش تتاخرى

انا :طيب سلام بقى

هى : سلام

مشيت انا بقى وبتها تكمل سنتحة ورحت لقيت مفيش سكشن حمدت ربنا وانا فى السكة للبيت قعدت افتكر الحوار اللى دار بينى وبينها .ياترى فعلا سيطرة الام والاب على افعال اولادهم صح ولا غلط , بيفيدهم ولا بيضرهم ؟؟امتى فعلا بيحسوا انهم خلاص اتعلموا ويقدروا يعتمدوا على نفسهم ؟

انتوا ايه رأيكوا بقى فى المناقشه والكلام ده ؟؟؟

زياره لمعرض الكتاب

2009-02-06T21:32:00.013+02:00

اول امبارح اللى هو 4/2/2009 كان يوم ممتع جدا بالنسبه لى بجد استمتعت بيه جدا وكان نفسى يطول اكتر من كده لانه كان زياره للقاهره ومعرض الكتاب وطبعا دى تعتبر اول مره اروحها وانا كبيره فكانت حاجه مشوقه بالنسبه لى

بعد ما دوخنا _انا واخويا_فى المقارنه بين المواصلات المختلفه عشان نختار حاجه نروح بيها تكون سريع وامنه فى نفس ذات الوقت استقرينا عالقطر اللى بيروح للقاهره مباشره من غير ما يقف فى النص

كنا فى محطه سيدى جابر مستنين قطر الساعه 7 من الساعه 6.30 وده طبعا نتيجه لالحاح ماما فى النزول بدرى وبالتالى كنا اول ناس فى المحطه

جه القطر وركبناه وكنا رقم كرسينا 57/58 _متسالوش ايه اهميه المعلومه دى عشان هتعرفوا بعدين_وبجد السفر فى القطر ده ممتع جدا عن اى طريق تانى يعنى قدرنا نتفرج عالطريق والمدن المختلفه من الشباك وبجد المناظر كانت روعه فعلا ولسه المساحات المزروعه كتيره وجميله والبيوت الصغيره ادام المزارع والهوا النقى بجد احسن كتير من عماراتنا العاليه وهوانا الملوث والزحمه والخنقه وطبعا اى سفر لازمله السندوتشات والميه وجريده الدستور اللى متقلش اهميه عن الاكل والشرب بالنسبه لاخويا واللى مفرقتهوش طول المشوار

وصلنا القاهره الساعه 10 وده لان القطر اتملكع فى السكه وكنا ممكن نوصل قبل كده بكتير واول منزلنا حجزنا رحله العوده على قطر السابعه مساء

بعد كده روحنا نشوف هنركب ايه عشان نوصل ادام الباب الرئيسى للمعرض وربنا رزقنا بمينى باص ابن حلال ركبناه ووصلنا هناك واول منزلنا كنت انا متفقه مع بنات صحباتى من هناك يقابلونى عند البوابه الرئيسيه

وعلى الرغم من تاكيدات ماما على اخويا انه ميبش ايدى طول الرحله الا انه اول ما وصلنا فص ملح وداب وراح يدور على صاحبه وسابنى

بعد ما تم الاتصال بينى وبين البنات وفضلنا نص ساعه نوصف لبعض احنا لابسين ايه وانا ولا شايفاهم ولا هما شايفينى اكتشفت انى واقفه الناحيه التانيه خالص عند البوابه 5/6 وهما عند البوابه الرئيسيه
بعد كده دخلت اقابلهم واتقابلنا فى نص المسافه

لفينا شويه فى المعرض وطبعا كبير جدا وهما بقى كانوا عارفين مداخله ومخارجه وكل حاجه اكنهم بيباتوا فيه وبالتالى كنت انا ماشيه على اساس معلوماتهم

بعد كده اتجهنا للمقهى الثقافى عشان نحضر الندوه لبعظيمه بتاعه د/نبيل فاروق ود/احمد خالد توفيق ود/تامر ابراهيم ود/محمد سليمان عبد الملك وكانت فعلا ندوه قيمه اوى دارت حول عنصر الاثاره فى الادب العربى وانه ايام زمان كانت الاثاره موجوده بس مش بالمقدار الموجود دلوقتى لان زمان كان ايقاع الحياه بطىء وبالتالى كانوا محتاجين يشغلوا وقتهم بقصص ايقاعها بطىء انما دلوقتى مثلا محدش هيصبر على قصه ايقاعها بطىء لان ظهرت حاجات كتير تشغل الفراغ زى النت والتلفزيون وحاجات كتير نقدرنشغل بيها وقت فراغنا فاصبح عنصر الاثاره والسرعه بارز اكتر .

وطبعا كان الندوه زحمه جدا وعرفت بعد كده ان دى اعلى ندوه من ناحيه نسبه الحضور تم تنظيمها خلال ايام المعرض

بعد كده بدانا نكمل جولتنا وروحنا سور الازبكيه بجد مكان تحفه فعلا مليان كتب قيمه جدا ومراجع علميه ورخيصه فى نفس الوقت اشترينا بعض الكتب والروايات والقصص الاجنبيه

بعد كده اتجهنا للمؤسسه العربيه اللى بتصدر روايات نبيل فاروق واحمد خالد توفيق وكتاب تانيين كتير واشترينا روايات كتييييييييير لان ده نوع القرايه اللى بيستهوينى اللى جانب المجالات الاجتماعيه والعلميه والدينيه

وكانت المفأجاه اننا لقينا د/نبيل فاروق ادام باب المؤسسه وكانت فرصه كويسه اوى اننا نقدر نقف معاه شويه واخدت توقيعه على اربع روايات واخدناله صورتين جامدين كمان

كملنا تجولنا فى المعرض الواسع ده اللى مبيخلصش واشترينا كتب كتير وبعد كده كنت بدور على روايه يوتوبيا ومش لاقياها وكتاب خالد كساب بس لقيت اخويا بيكلمنى كانت الساعه بقت 5.30 وكان بيقولى استعد عشان نمشى وكان بيقولى انه واقف دلوقتى ادام خالد كساب واحمد خالد توفيق

وانا رايحه عشان اقابله كنا ادام دار ميريت ببص ادامى لقيت احمد خالد توفيق ادامى انا هو وخالد كساب ومحمد فتحى وهو صحفى شاب بيكتب لجريده الدستور وكتب برضه روايات كتير وكان هو اللى بيقدم الندوه اللى حضرناها الصبح وبالتالى لقيت اخويا واقف ادامى وانا بكلمه فى التلفون عشان اعرف مكانه
وكانت بجد مسك الختام للرحله انى جبت يوتوبيا واخدت توقيع د/احمد خالد توفيق وبرضه وقفنا نتكلم معاه شويه

بدأنا رحله العوده وكانت الساعه بقت 6 وادامنا ساعه عشان نلحق القطر وطبعا هو المعرض مكنش بعيد اوى عن المحطه بس احنا مكناش عارفين المواصلات هتبقى عامله ازاى ولا نركب ايه ولا اى حاجه

وقفنا شويه وبرضه الحمد لله ربنا رزقنا بمينى باص ابن حلال وصلنا المحطه وركبنا القطر وبرضه لقينا مكانا رقم 57/58 وفى نفس الزوايه اخر كرسيين فى القطر زى ما كنا رايحيين تماما فكانت صدفه لذيذه وكان المكان محجوز لنا

وصلنا فى امان الله الساعه 9 عشان تعرفوا ان قطر الصبح كان بيتملكع فى السكه وكانت فعلا رحله جميله اوى واتمنى تتكر تانى

عارفه انى رغيت عليكوا كتير اوى بس حبيت اعرفكوا تفاصيل يومى الجميل لانى كنت مبسوطه اوى ساعتها

واسيبكوا بقى مع شويه صور

دى واحنا رايحيين الصبح فى القطر

وده طبعا د/ نبيل فاروق

ودى د/احمد خالد توفيق

وده عبد الملك عسول اوى مقدرناش نسيبه فى حاله وهو بيلعب ادامنا كده

وكل معرض وانتوا طيبين :)

وهنيالك يا فاعل الخير _و_ الثواب !!

2009-02-02T18:05:00.006+02:00

اولا من قبل ما ندخل فى الموضوع

مكنتش عارفه اسميه ايه

مش عارفه اسمها هنيالك يا فاعل الخير الثواب اللى هتاخده يعنى

ولا هنيالك يا فاعل الخير والثواب

اصلى مجربتش اشحت قبل كده D:

ما علينا يعنى متخدوش فى بالكم

نبدأ بقى

ـــــــــــــــــــــــــــــــــــــــــــــــ

السلام عليكم

ازيكوا يا جماعه عاملين ايه ؟ يارب تكونوا بخير

كان فيه حاجه بقالها مده شغالانى ومش لاقيه لها اجابه

هعرضها عليكوا من خلال موقف حصلى قريب

من مده كده كنت لسه جايه من بره وداخله بيتنا

لقيت الباب خبط

وغالبا ماما بتقولى متفتحيش لحد لان عندنا بيبقى فيه مندوبين مبيعات رخمين وناس غريبه كده بتخبط

وبما ان مفيش بواب ولا أمن عالعماره فاحنا مش بنفتح لاى مندوبين مبيعات

فانا اما الباب خبط الاول مفتحتش

لكن لما لقيت اللى عالباب مستمر برضه انه يضرب الجرس فكرت يمكن تكون واحده جارتنا عايزه حاجه او كده

فتحت لقيت واحده واقفه

هى كانت شكلها عادى يعنى مش مبهدل ولا حاجه

انا كنت لسه برضه بحسبها واحده ساكنه معانا

بس انا لقيتها بتعيط وقربت من الباب اوى اكنها هتدخل

انا اصلا خفت منها

وفضلت تحكيلى على حاله وفاه وحد اتوفى وهى معهاش فلوس

فانا بصراحه مكنتش عارفه اتصرف لانى كنت قلقانه منها اصلا وفى نفس الوقت كانت صعبانه عليا

انا اصلا مكنتش سامعه هى بتقول ايه بس لانى كنت وقتها مركزه فى انى مش عارفه هى بتضحك عليا ولا نصابه ولا ايه؟؟؟

اقفل الباب ولا ادخل اساعدها؟؟

طب مانا لو دخلت ممكن تدخل ورايا ولا حاجه وفكرت كمان انها ممكن تكون بتمثل عليا

المهم انى قلتلها انا اسفه بس مفيش حد موجود دلوقتى

اللى استغربتله بقى انها مثلا مزودتش فى الكلام لا دى قاللتى حاضر حاضر واختفت

وده اللى ضايقنى اوى وحسيت انها كانت محتاجه فعلا وانى مش ساعدتها وانى كنت قاسيه اوى لان غالبا الناس اللى بيطلبوا مساعده بيبقوا كثيرى المحايله

بس هى كانت بتقول انها ساكنه فى منطقه تعتبر بيعيده عننا شويه

معقول تكون لفت عالبيوت دى كلها لحد ما وصلتلنا ومحدش ساعدها

انا بجد ببقى محتاره فعلا ادام الناس دى

هما فعلا بيبقوا محتاجين ولا بيبقوا بيمثلوا؟؟

يعنى الناس اللى بتبقى فى الشوارع قاعده تطلب المساعده

بتبقى فعلا محتاجه ؟؟

طيب ليه ميشتغلوش اى حاجه معقوله فيه حد يقعد طول اليوم يطلب المساعده من الناس

ويوميا كمان

هى دى بقت وظيفتهم

طيب والناس اللى بتمشى تنادى فى الشوارع واحيانا بالميكروفونات كمان

معايا ابن مريض وكذا كذا كذا

دول برضه بيبقوا محتاجين ؟

دول احيانا بيبقوا مأجرين تاكسى وحاطين الميكروفون فوق وبينادوا

معقوله دى يعنى ؟؟

ده حتى اى انسان محتاج بيبقى محرج يقول انه محتاج

ومفيش حد بيحب يقلل من نفسه بل بالعكس كله بيبقى عايز يظهر فى احسن صوره واحسن حاله

ده حتى بابا مره بيحكيلنا

انه مره كان فى المحطه

فلقى واحده بتطلب منه فلوس عشان تسافر لجوزها فى بلد تانيه

قام بابا مساعدها

بعديها باسبوع لقى نفس الست بتطلب منه فلوس عشان تسافر لجوزها

قام بابا قالها هو انتى لسه مسافرتيش؟؟؟

تفتكروا الناس دى محتاجه مساعدتنا ليهم ولا لا ؟؟

عدنااااااااااااااااااا

2009-01-30T13:25:00.006+02:00

خلاوييييييييييص

الحمدلله خلصت امتحانات اخيرا

بعد عناء شهرين ونص تقريبا

بجد افتقدكم جميعا

وانتوا اكيد نسيتوا شكلى اصلا

دانا اصلا مكنتش بدخل عندى

معلش ان شاء الله هلف عليكوا كلكوا اقرا كل اللى كتبتوه فى غيابى

_________________________________________

المهم مطولش عليكوا

لا طولى......

انهارده وانا نايمه بعد الامتحان قعدت افتكر وانا صغيره _هو فيه حد بيفتكر وهو نايم يا بت _معلش عدوها
المهم

قعدت افتكر وانا صغيره حاجات كده رفنعه يمكن مكنتش هافتكرها لو كانت حصلت لى وانا كبيره

يعنى مثلا مره وانا وانا فى الحضانه

كانوا حطينلنا لعب كتيره اوى

مرصوصه

بنلعب بيها يوم الخميس بس

ولعب معينه كمان عشان العلب الغاليه متبوظش

واللى يبوظ لعبه كان بيبقى يا ويله يا سواد ليله

فاكره اول يوم فى اولى ابتدائى

كنت رايحه بقى لابسه اليونيفرم الجديد

ومعايا مصروفى وسندوتشاتى فى شنطى وشنطتى على ضهرى

فاكره ميس منى بتاعه العربى كنت بحبها وكنت بتقعد تحفظنا النصوص بطريقه حلو اوى

كنت بحفظ بسرعه اوى وانا صغيره

كان يبقى بابا بيحفظ اخويا الكبير وانا قاعده القط منهم واحفظ قبليه

دلوقتى طبعا كله ضايع فى الزهايمر اكيد

عشان كده دايما بينصحوا بحفظ القرآن فى السن الصغيره

عشان كده كمان المفروض فى مدارس الابتدائى وقبل كده كمان

يستغلوا الميزه الرهيبه دى فى الاطفال

ويحفظوهم ويدربوهم على مهارات كتيره من صغرهم

فاما يكبروا تكبر معاهم وعمرهم ما ينسوا حاجه ابدا

و ده طبعا لازم يكون بمراعاه مواهب كل طفل وميوله

يعنى اللى بيحب العلوم والرياضه ينموه فى المجال ده والللى بيحب الخرايط والجغرافيا يحفظوه الخرايط والاماكن باسلوب سهل وجميل

عشان عمره ما يتنسى

انا بقى اصلا برغى عليكوا كل الرغى ده ليه

عشان تشوفوا الفديو ده

اهى الطفله دى اما تكبر هتبقى بوصله متحركه

عمرها ما هتنسى اى مكان وهتبقى ضليعه فى الجغرافيا

وهتنمى موهبتها لما تكبر كمان لو هى حبت المجال ده

ذاكره الاطفال دى بجد كنز لازم نستغلها كويس لصالح مستقبلهم وحياتهم

بدل الزهايمر اللى احنا فيه ده...........

مش انتوا عايزين تساعدوا غزة ؟ طب تعالوا اقولوكوا عالفكره دى

2008-12-28T16:42:00.008+02:00

طبعا كلنا شايفين مأساه أهل غزه وزعلانين عشانهم

بس زعلنا لوحده مش كفايه

هتقولوا احنا مش بايدينا حاجه نعملها

اقولوكوا لا طبعا بايدينا ومش حكامنا بس اللى هيتحاسبوا عشان سايبينهم يتعذبوا ويموتوا

لا احنا كمان هنتحاسب عشان سايبين اخواتنا كده من غير مساعده

مش عايزين نعمل زى ما كل مره بنعمل ونفضل نتكلم كتير وقت الحاثه وشويه شويه الكلام يقل واللى ماتوا يتنسوا

طيب ايه رأيكوا بكره ان شاء الله نصوم كلناوندعي وقت الافطار لاهل غزة واكيد ان شاء الله مش

هيرد دعائنا

ويا ريت كمان كلنا نوحد الدعاء لأهل غزة فى صلاة القيام

ياريت نبلغ كل اللى نعرفهم بصيام بكره من اجل غزه والدعاء لأهلها

ولو وحدنا صيام يوم الاتنين والخميس يكون افضل برضه

‏اللهم إنا ‏نشكو ‏إليك ‏اليهوداللهم ‏إنا ‏نشكو ‏إليك ‏اليهود ‏فإنهم ‏لا ‏يعجزونك ‏يا ‏جبار ‏السموات ‏والأرض

‏اللهم ‏إحصهم ‏عددا ‏واقتلهم ‏بددا ‏ولا ‏تغادر ‏منهم ‏أحدا .‏وأنزل ‏عليهم ‏عاجل ‏نقمتك ‏اليوم ‏أوغدا‏اللهم ‏أحزنهم

كما احزنونا وآسفهم كما آسفونا

اللهم ‏يتّـم ‏أطفالهم ‏ورمّـل ‏نساءهم ‏وعقّـم ‏أرحامهم ‏وأرّق ‏نومهم

‏اللهم ‏اجعل ‏بيوتهم ‏عليهم ‏ردما

‏اللهم ‏اجعل ‏قنابلهم ‏عليهم ‏دمدما ‏وعويل ‏نساءنا ‏عليهم ‏همهما

‏اللهم ‏اجعلهم ‏عبرة ‏للمعتبرين

اللهم ‏ومن ‏أرادنا ‏والإسلام ‏بخير ‏فوفقه ‏لكل ‏خير‏ومن ‏أرادنا ‏والإسلام ‏بسوء ‏فاقسم ظهره ‏واجعل ‏كيده

‏

فى نحره ولا تمهله بين يوم وامسه

اللهم ‏حرر ‏المسجد ‏الأقصى ‏من ‏دنس ‏اليهود ‏المعتدين .

‏اللهم ‏اكتب ‏لنا ‏الصلاة ‏فيه والشهادة ‏على ‏بابه.. ‏اللهم ‏اكتب ‏لنا ‏الصلاة ‏فيه ‏والشهادة ‏على‏بابه ..‏اللهم ‏اكتب ‏لنا

الصلاه فيه والشهاده على بابه

اللهم آميييييييييين آميييييييييين يا أرحم الراحمين .

اصابه ...قتل ....حرق....تحرش...أحمدك يا رب

2008-11-01T15:27:00.002+02:00

*حريق مجلس الشورى والمسرح القومى
* انهيار صخور الدويقه ومازال الضحايا تحت الانقاض
* تحرش ظباط شرطه بشقيقتان
*مدرسان يعتديان بالضرب على ولى امر أمام أبنائه الاربعه
* مقتل الطفل اسلام على يد مدرسه
*اصابه 15 طالب ضربهم مدرسهم (بالمقشه )
*مقتل واصابه35 سائحا اوروبيا اثر انقلاب حافله جنوب مصر
*مدرس ابتدائى يغتصب تلميذا فى دوره مياه المدرسه
*فقدان مركب امام سواحل رشيد على متنه 200 شاب كانوا فى طريقهم للهجره الى ايطاليا
*موظف يقتل طالبا بسبب خلاف شقيقيهما الصغيرين فى الشرقيه

كفايه كده عشان لو فضلت اكتب من هنا للسنه الجايه مش هخلص

انا بس عايزه افهم ايه اللى بيحصلنا ده ؟؟

ايه كميه المصايب اللى عماله ترف على دماغنا دى

كل يوم بنسمع عن ناس ماتنوا او اتحرقوا او اتقتلوا

كنا الاول لما تحصل حادثه قتل غريبه او حريق بنستغرب وبتبقى حاجه مش معتادين عليها

لكن احنا خلاص سمعنا اعتاد على اخبار القتل والمصايب

متهيألى لو يوم محصلش فيه حاجه كده هنستغرب

ازاى يوم يعدى من غير ما يحصل حاجه

وهل لو الوضع استمر على كده هيبقى فيه ضحايا وقتلى كل خمس دقايق ولا ايه ؟؟

ليه الناس بقت بتتصرف تصرفات غريبه وبقت تعتبر مالوفه وعاديه

يعنى اللى بيقتل ده بقى متعود خلاص ولا ايه

مش بعيد بعد كده كل واحد يصحى من النوم الصبح يقول اه انا ما اقتلتش حد امبارح يبقى انهارده باذن الله هقتلى اتنين كده عشان اعوض

انا مش عارفه احنا رايحيين على فين ؟

الناس بقت بتخاف تمشى فى الشارع او تنزل من بيتها

انعدم الامن والامان والاطمئنان واى حاجه ليها علاقه بالهدوء

ولسه.....

المواجهه المنتظره !!!

2008-10-24T11:42:00.005+02:00

اخييرا بعد تفكير طويل ومباحثات مريره وحجج واهيه ...قررت اخد الضفدعه معايا البيت, بعد ما توصلت الى انى لو اعتمدت عالسكشن فقط يبقى هشيل الضفادع السنه دى .

وقلت فرصه برضه اخدها ومحدش موجود فى البيت منعا لاى تريقه او ازعاج , خاصه ان ماما كانت حذرتنى من دخول الضفدعه البيت لأنها مش بتحبها . وأنا مالى بقى يعنى هى متحبهاش وأنا أسقط مثلا.

بعد المحاضرات رحت للراجل بتاع الضفادع وأنا بقدم خطوه وبأخر خمس خطوات , ووصلت عنده لقيت عليه زحمه وكله بيشترى ضفادع, وأل ايه الضفدعه الوسط ب 3 جنيه والجامبو ب 3.5 ,دانا كده هخلص مصروفى عالضفادع السنه دى .

حتى الراجل ده طلع مادى اوى بيشيل الضفادع الكبيره عشان يتاجر فيها والصغيره اللى مش باينه يديهالنا فى السكشن , قررت اشترى ضفدعه وسط عشان اعرف الاول اتعامل معاها ازاى لانها اول مره ليا وبعدين ابقى اشتغل عالجامبو .

حطيت الضفدعه بكيسها فى جيب خارجى للشنطه _ الجيب ده المفروض بحط فيه الموبايل على طول بس شلته حطيته فى جيبى _ وسيبتيلها فتحه صغيره تتنفس منها مع ان الكيس اصلا مقفول بس قولت اريح ضميرى وخلاص .

لقيت الترام اللى بدورين جت قولت اما اركب فوق وبالمره افسح الضفدعه وافرجها الدنيا فى لحظاتها الاخيره . وكل شويه بقى وانا قاعده انسى وافتح الجيب عشان اطلع الموبايل الاقى الضفدعه قاعده اقوم قافله بسررررعه احسن تنط ولا حاجه واكييد مش هعرف اجيبها تانى .

كنت لسه ما جبتش سبرتو عشان التخدير فقلت اجيب وانا فى السكه و دخلت اول محل بقوله : عندك سبرتو احمر ؟! قام بصلى كده وقاللى : سبرتو !!! احنا ناس بنصلى وبنعرف ربنا سبرتو ايه ؟؟ و اخذ يقهقه كثيرا
رحت لواحد تانى : عندك سبرتو احمر ؟! فابتسم ابتسامه عريضه وقاللى : لا طبعا !! مش فاهمه طبعا ليه يعنى محسسنى انى هاخده اشربه !!!
روحت منغير ما اجيب سبرتووكلى حزن على مصير الضفدعه المجهول وكلمت بابا فى التلفون بصوت اقرب للبكاء : يا بابا هاتلى معاك سبرتو احمر عشان مش قادره اتفاهم مع الضفدعه ! وتبعا لم أسلم من بعض التريقه من نوعيه : تحبى اجبلها اكل كمان ؟؟ أنا : هو انا هاربيها هات سبرتو بس ومتنساش .

شويه كده وبابا جه وجاب السبرتو معاه والضفدعه لسه قاعده فى العلبه اللى حطيتها فيها وهى جوه الكيس برضه وقمت كبيتلها سبرتو من الازازه جوه العلبه وبرضه غرقت قطنه وحطيتها لها زياده تاكيد يعنى عشان أضمن انها مش هاتصحى ابدا وانا بشرحها .

سيبتها عشر دقايق كده و رحت فاتحه العلبه بعد كده لقيتها يعينى مزرقه كده ومسبهله عالاخر!! قلت ايه ده دى ماتت ولا ايه ؟!! زعلت اوى اوى كان نفسى تموت على ايدى مش قبل ما اعمل فيها حاجه كده .

بدأت اشرحها بدون أمل وعماله اقطع فيها براحتى بقى مهى مش عايشه يعنى مش هتحس بحاجه.

بعد ما وصلت للقلب كده , لقيت المفأجاه .......قلبها لسه بينبض هيييييييييييه لسه عايشه , فرحت اوى اوى اكنى كنت بعملها عمليه قلب مفتوح ونجحت .

ازدادت الحماسه جوايا وشلت بقى الكبد والقلب والمعده والمرىء والمراره وكله كله وشوفت اللى عايزه اشوفه وفضيتها عالاخر .

بعد ما خلصت لميت اثار الجريمه دى بسرعه ورميت الضفدعه ولا اكن حاجه حصلت , بس لسه بقى عايزه اجيب واحده تانيه عشان ابقى جاهزه من الاول بالسبرتو والذى منه , مانا خلاص بقيت خبره فى الضفاديع .

وكل ضفدعه وانتوا بخير ..........

الرجاله ماتوا فى الحرب خلاص......

2008-10-12T23:14:00.003+02:00

انهارده بس صدقت ان الرجاله ماتوا فى حرب اكتوبر

بعد اللى سمعته من واحده صاحبتى وهى بتحكى الموقف اللى شافته بعينيها واللى بتقسم انه لو كان اتحكالها مكنتش صدقته

أنا نفسى مش متخيله ازاى ده حصل

بجد انا اتضايقت واتنكدت ان ده بيحصلنا

ليه بقت الاخلاقيات فى النازل وقله الادب فى الطالع ؟؟

ده اكييد غضب من ربنا علينا عشان بعدنا عن دينا ؟

لو مكنش كده هيبقى ليه ؟

انا فعلا مش لاقيه كلام اقوله بس هسيبكوا مع اللى البنت حكته بلسانها :

بسم الله الرحمن الرحيم
كنت بسمع الكلمة دى كتيييييييييير اوى
بس مفهمتهاش غير النهارده بجد
(( ماتوا الرجالة فى حرب 1973 ))
بجد
والله العظيم شئ محزن جدا
مصر واللى اولادها كانوا معروفين بالجدعنة والاخلاق والرجولة
معرفش ايه حصلهم
لنخوة انعدمت مبقيتش تلاقى راجل فى الزمن ده
والموقف ده حصلي النهارده
كنت راكبة الميكروباص عودة من الجامعة وبعد رحلة شاقة فى المترو
وحصل شد ما بين اتنين .. واحدة كبيرة فى السن قد جدتى ،، والتاني راجل عادى
الخناقة كانت ما بينهم هما الاتنين فقط لا غير
الست دى قاعدة جنبى
معرفش فجأه
لقيت شاب عمره ما بين ال 20 و ال 25
قام شاتم الست دى شتيمة قذرة
قامت الست شاتماه شتيمة اقذر
قام قالها ....... ده يبقي جوزك
قامت قالتله بس يا ...... يا ابن الـ ........
لقيت الراجل قالها متغلطيش ف امى
ده انا هربيكى
والاقى الراجل نزل فى الست ضرب
والناس تهدى فيه وهو لو طال يخرملها عين كان عمل
الست مسكتتش وهاااات يا صويت و قلعت النضارة وشمرت اكمامها و فضلت تضرب فيه وتشتم
انا كنت جمبها كل اللى قدرت اعمله انى مسكتها بجد وكنت بشدها وكنت عمالة اقول اعوذ بالله من الشيطان الرجيم واقولها اهدى يا امى
لست كانت عمالة تقولى حاسبى كده بس بجد مكانش ينفع اسيبها كانت هتتبهدل
لمهم الواد مسبهاش
واول مرة ف حياتى اسمع واحد بيشتم ف دينه .. ايه ده هو فى ناس كده بجد
وبما ان الرجالة كانت ماسكة ايده لقيت الراجل طالع برجله معرفش ازاى و هات يا ضرب ف وشها و ف جسمها
بجد كان نفسي اخد الست دى ف حضنى انا مش عارفة ازاى فى بنى ادم كده
انا راجعة البيت وايدى واقفة تماما مش قادرة احركها و مليانة كدمات زرقة والله وخربشة
فما بالكوا بيها
وهى انسانة كبيرة فى السن
والبنى ادم ده مش راضي يعتقها
هل بجد وصلت بيه البجاحة لكده ؟
فعلا انا مستغربة اوى
وحزينة اوى اوى اوى
والست بعد ده كله لما هديت
فضلت تحسبن وتعيط
وانا اقولها معلش يا امى حقك عليا يا امى
والاقى الحقير ده نازل عليها ضرب تانى
انا بجد معرفش اتكلمت ازاى بس لقيت نفسي بقوله ميصحش كده ع فكرة عيب اوى اللى انت بتعمله ده
كل اللى انا فاكراه انى لقيت ناس بتضحك عليا
الحمد لله ان الواد مقلبش عليا
بس قسما بالله انا فعلا كان نفسي انزل فيه ضرب وخاصة اننا كنا اتعلمنا ان فى كذا منطقة ضعيفة فى الجسم بتضعف اللى قدامك اوى وممكن كمان تخدره لمدة بس لو الضربة طلعت صح
بس بجد كنت خايفة اوى
الست وهيا بتعيط جنبى والناس ماسكة الراجل
بجد صوتها والبهدلة اللى شافتها والله خلونى اعيط جنبها
كيد الناس دى مش بشر عادية
مينفعش ده يكون انسان
والله انا مش مصدقة ان ده حصل ولو حد كان حكهولى مكنمتش هصدق
انا اعرف ان مش من الرجولة ولا الدين ولا الاخلاق ولا اى الانسانية انى امد ايدى ع واحدة
وكمان كبيرة فى السن !!!!!!
لا تعليق
(( فعلا لقد استنوق الجمل !! )

خلص كلام البنت وخلص كلامى انا كمان

هو احنا أصحاب بجد ؟؟

2008-10-04T02:11:00.008+02:00

السؤال ده بيدور فى دماغى كتير أوى.ناس كتير لما تسألها عن الصداقه الحقيقيه يقولك :صداقه مين يا عمونا متصلى عالنبى احنا فى زمن المصالح , واللى يقولك : لاااااااااا الصداقه دى كانت زمانلكن دلوقتى بقت تحفه أثريه تتحط فى المتحف وندفع التذكره عشان ندخل نتفرج عليها .
طيب لما كل الناس كده , زمايلنا وجيرانا وكل اللى حوالينا شايفين ان الصداقه بقت عمله نادره فى الزمن ده ,لما احنا نبقى مش لاقيين الصديق الجدع اللى بجد , اللى يبقى موجود وقت الخنقه والضيق قبل وقت الهزار والتهييس , وفى نفس الوقت غيرنا برضه مش لاقيه . امال مين اللى لاقيه ؟؟وكده يبقى العيب فين ؟؟كده العيب يبقى فينا وجوانا , ليه دايما بنقول انا مش لاقى الصديق اللى بجد , اللى يفهمنى ويقف جنبى , اللى اول ما ابقى مضايق يبقى هو الوحيد اللى ادامى , المفروض نقول : انا مش الصديق اللى ممكن اللى حواليا يحتاجوه .

ليه الثقه انعدمت بين الناس ؟؟ليه المصالح الشخصيه عمت الناس ؟ وليه الكل اقتنع بمبدأ يلا نفسى ؟

ليه كل واحد بقى شايل للتانى سكينه ورا ضهره ومستعد يطعن أخوه فى اى فرصه وفى نفس الوقت متوقع طعنه مشابهه من أخوه ؟؟
وليه بقى الخبت والمكر متوقع قبل ما يكون الحب والتسامح متوقع ؟ليه كل انسان بيعتبر نفسه مجنى عليه وانه ملاك طاهر لا يمكن يكون الجانى ؟ليه كل واحد ميقدرش ظروف اللى ادامه قبل ما يحكم عليه بانه ظالم وجانى ومفترى ؟

بستعجب كتيير على زمن بقت الطيبه فيه عيب والطيب بقى الانسان الاهبل اللى فى نظر الناس ممكن يضحك عليه بسهوله , لأ لازم يبقى الخبث فى دمنا عشان الناس تقول علينا مدردحين وفاهمين الدنيا

بستعجب اكتر على زمن بقى الايثار فيه شىء مريب مشفتوش ومسمعتش عنه غير فى الروايات والافلام زى قصص الحب الاسطوريه.

وبستعجب أكتر وأكتر على زمن فيه الصديق الوفى بقى كنز مفقود ,والصداقه خزينه ومحدش لاقى مفتاحها ولا حتى عارف أرقامها .

عيد سعيد

2008-10-01T04:28:00.003+02:00

كل سنه وانتوا طيبين وعالسفره ملمومين وعالكحك والبسكويت مخلصين

فشخره ومحسن....... ايه المناظر دى ؟؟

2008-09-27T00:52:00.002+02:00

وأنا قاعده ادام التلفزيون مستنيه فاصل المسلسل خلال فقره الاعلانات جه الاعلان المستفز بمعدل مرتين بين كل اعلان , هتقولولى طويب ما كل الاعلانات مستفزه جبتى ايه من عندك ؟اقولوكم لا , ده كل الاعلانات كوم والاعلان ده بالذات كوم تانى خالص.

الست فشخره وجوزها محسن زفت منظر واقفين يطلبوا سحور يكفى مصر بحالها , هما بصراحه طيبين شويتين يعنى بيبدأوا بالساقع زى الخروب والتمر الهندى وقمر الدين ويدخلوا بعد كده فى التقيل زى الحمام المحشى والخروف والديك الرومى والفول .....باللحمه المفرومه واوعوا تنسوا سرفيس المحشى أحسن الصيام ميتقبلش ولا حاجه . وبعدين الحلو بقى أمال ايه أم على وبلح الشام والبسبوسه اللى نصها ساده و....ونصها بالمكسرات ولسسسه استنوا البطيخ بيهضم والبنانا سبليت بتمسك-اللهى يمسك فيهم حريقه والمطافى تكون اجازه يارب-
وال ايه بقى اللى يولع الاسعار ويخرب البيوت هى الفشخره والمنظره يا حبوب -حبك برص يا شيخ

بقى هو ده سبب غلاء الاسعار؟هما شايفينا هبل ولا ايه ؟يعنى ايه علاقه ان ناس بتأكل اكل المنطقه كلها بغلاء البصل والثوم ؟عايزين يفهمونا ان اشعب المصرى كله بيأكل بالمنظر ده ؟؟دى الناس مش لاقيه رغيف العيش ابو شلن.أمال مين بقى اللى بيموتوا بعض فى طابور العيش .يكونش بتوع الصومال جايين ياخدوا عيش من عندنا ؟وأما الناس مرتاحه كده ليه مبيأكلوش جاتوه وبسكويت هو لازم عيش يعنى؟؟

طويب مش هما مش بيأكلوا غير لحمه وديوك رومى ؟؟كيلو العدس ب 12 جنيه لييييييه ؟؟أظن ده بقى مش بياكلوه.
ده لو واحد مش من هنا وشاف الاعلان دههيقول علينا شعب مفترى وعينه فارغه وعايش فى النعيم .و مش بعيد يفتكر ان بابا حسنى بيعدى علينا وقت السحور عشان يطمن ان كل واحد معاه الديك بتاعه وسرفيس المحشى والبنانا سبليت عشلن تمسك .

واللى يغيظ أكتر وأكتر بقى , أنهم بيرموا أطباق الاكل وهى مليانه أصلا. ده احنا لو افترضنا يعنى وده من عاشر المستحيلات ان فيه ناس بالطفاسه دى مش هيهون عليه يرمى الاكل ده . يأما هيشيله مثلا ياما هيديه للبواب , ده لو اداه لقطه ...شوفوا قطه..هيكسب فيها ثواب.

هو فيه كده ؟ للدرجه دى الاستخفاف بعقول الناس ؟
ناس مستفزه

كل واحد يخلى باله من موبايله وفلوسه وسندوتشاته وكراسة محضاراته

2008-09-25T20:56:00.005+02:00

معلش اتأخرت عليكم مش بايدى يعنى النور كان قاطع والنت كان فاصل و التلفون عطلان والميه بتقطع برضه يعنى كنت هبعتلكوا البوست على ضوء الشمعه مثلا عموما شكلنا كده هنعزل من البيت

زى ما حكيتلكوا قبل كده احساسى ليله دخول الجامعه يعنى كنت قلقانه شويه وده طبعا مخلانيش أنام غير ساعتين تقريبا , هو مكنش قلق اوى يعنى قد ما كان تشوق لمرحله جديده وحياه وجو تانى خالص. صحيت اول واحده فى البيت مع انى محضره هدومى من الساعه 10 بليل بس قولت اقوم يمكن يحصل حاجه طارئه ولا حاجه _يمكن الاقى الطرحه مش لايقه مع الهدوم ولا فيه حاجه محتاجه تتكوى تانى الاحتياط واجب برضه_بدأت ألبس بتأنى شويتين على غير العاده مهو انهارده مش اى يوم يعنى وخلصت لبسى وماما كانت صحيت ومنستش تبعا اخد فلوس المواصلات ونزلت بدرى جدا تحسبا لأى طوارىء برضه عشان احتمال كبير اوى اتوه فى السكه وانزل قبل المكان او بعده .
وأنا ماشيه بقى فى شارعنا لقيت العيال الصغيره لابسين لبس المدرسه ورابطين الكرافت وشايلين الشنط الكبيره دى كان شكلهم تحفه اصلا عاملين زى لعب الاطفال ياااااه ,هو انا كان بيبقى منظرى كده ؟ الحمد لله ان ربنا رحمنى من القميص البمبى والجيبه الرمادى مش عارفه كنت بلبسهم ازاى ؟؟قابلت واحده صاحبتى على اول الشارع وكان معاها واحده صاحبتها كمان وركبنا فى طريقنا الى الهدف المنشود
وصلنا عند الكليه من غير توهان الحمد لله لقينا زحمه كتير اوى عالباب ووقفنا كتير شويتين علشان كانوا بيعدوا واحد واحد ويشوفوا بطاقته ورخصته ...قصدى ..وصل مصاريفه كانوا محسسنى اننا فى لجنه مرور .دخلنا اخيرا وقابلت ناس صحابى ورحنا على شئون الطلبه عشان نشوف اسامينا ومجموعتنا ونعرف راسنا من رجلينا فى الكليه دى .لقينا ورق الاسامى متعلق واللى كان معلقه بجد كان انسان نبيه اوى ,كان حاطط الورق مش مترتب على حسب الحروف ولا المجموعات يعنى مثلا بدأ بالالف عادى و هوبا لقيناه دخل عالدال وقام مكمل الف تانى وأسهم بقى طالعه ونازله و أنا كل ده مش لاقيه اسمى نوهائى . رحت اسأل عند الست بتاعه شئون الطلبه _ست رخمه اوى على فكره-لقيت كارنيهى لسه مطلعش قلت قشطه اوى كده يبقى انا اروح اقعد فى بيتنا ومفيش كليه السنه دى .قابلت واحده تايهه كده زيى قمت خدتها تدور معايا على اسمى يمكن نلاقيه هنا ولا هناك .قامت البنيه لقيته اول اسم خالص فى ورقه كده مع نفسها مش باين عليها انهى مجموعه مش مشكله يعنى مش هنختلف عالمجموعه احنا كنا فين وبقينا فين ؟؟. مشينا انا والبنيه من الزحمه دى ولقينا سلم كده بيدخل على مدرج 3والناس عماله تدخل تدخل اكنهم بيدخلوا من ناحيه ويخرجوا من الناحيه التانيه مهو لا يمكن يكون كل دول بيدخلوا يقعدوا جوه , احنا مكناش مصدقين اننا المفروض ندخل معاهم بس افتكرنا ان الجدول كان مكتوب فيه اول محاضره م3 واحنا مكناش فاهمين يعنى ايه ؟ انا عن نفسى معرفش غير م5 (المغامرون الخمسه)دخلنا م3 وياريتنا ما دخلنا,لقينا البنى ادمين فوق بعضهم واحنا ماشيين لا اراديا بقوه الدفع فقط , ايه ده هو كله داخل صيدله زيى ,للدرجه دى أنا بقيت قدوه بقى وبيقلدونى ؟؟أنقذتنا العنايه الالهيه ولقينا مكان نقعد فيه,شويه كده والمدرج اتردم ناس الى قاعدين عالارض وعالسلالم والى عالشباك بيتفرجوا من بره مش عارفه ملهوفين على ايه كده دى محاضره يعنى مش ماتش الاهلى والزمالك .دخلنا واحد بتاع فيزيا-أكتر ماده بحبها-بس مقربش من الفيزيا نوهائى . اكتفى انه يكلمنا عن ذكرياته ايام ما كان قدنا - واحنا مالنا احنا-وقبل ما يمشى رصلنا اسامى 7 مراجع الى جانب كتاب القسم المفروض اننا نذاكر منهم والى عايز يتوسع يقدر يروح المكتبه,على اساس اننا هنذاكر للماجستير مش لاعدادى صيدله دخلنا واحد بعديه بتاع نبات تقريبا مش فاكره يعنى وكان بينهم شبه كبير اوى شكلا ومضمونا بس ده بقى محكلناش عن ذكرياته لانه كان كبير شويتين فكان ناسى يعنى بس فضل يوعينا ويدينا خبرته الطويله فى مجال التدريس (كل واحد يحط عينيه فى راسه ويخلى باله من موبايله وفلوسه وسندويتشاته وكراسه محضاراته وكراسه العملى بتاعته عشان الحراميه كتير )ده كان كلامه الى طمنا عالاخر.مش عارفه هنخلى بالنا من كل الحاجات دى ازاى؟ لازم بقى كل واحد وواحده ياخدوا مطوا تهم فى جيبهم عشان يحموا نفسهم(وبالنوسبه للشباب اللى مكنش معاهم بنات فى المدرسه بلاش تركنوا كتير عند الكافتيريا تبصبصوا للبنات عشان مش هينفعوكوا وهتلاقوهم هما نقلوا للسنه الى بعديها وانتوا لسه فى اعدادى )ده كان كلامه برضه , راجل كبير بقى وخبره , المهم انه رمى الكلمتين الى عنده ومشى .
بعد كده خرجنا من المدرج وقولنا نروح نشوف الكارنيهات خلصت ولا لأ , هما وقفوا بره وانا الى دخلت أسال فلقيت طابور طويل اوى كالعاده , خرجت قولتلهم مش هنقدر ندخل .قلنا خلاص نلف شويه فى المكان عشان نستكشفه ونبقى نرجع كمان شويه قبل ما نمشى تكون الزحمه خفت شويه .لفينا كتير وجالنا صداع من الشمس ورجعنا تانى عند الزحمه ودخلت برضه لقيت الطابور متحركش خرجت قولتلهم زحمه برضه مش هنقدر ندخل احنا نمشى بقى انهارده ونبقى نيجى وقت تانى . قالوا احنا ندخل ناخد دورنا فى الطابور أحسن ,دخلنا لقينا الزحمه مش عالكارنيهات اصلا وشباك الكارنيهات فاضى خالص ههههههههه -كانوا هياكلونى ساعتها-المهم ان هما اخدوا كارنيهاتهم وانا الست قالتلى لسه مخلصش مع انى مقدمه قبليهم اصلا , مش قولتلكوا انها رخمه ومستقصدانى من يوم التقديم بس انا مش هاسيبها ليها يوم اخد منها حقى .بس خلصنا الى احنا عايزينه وكل واحد اخد طريقه
وانا ماشيه قابلت واحده قعدت تسلم عليا ربع ساعه وتحضن بقى وازيك وعامله ايه وأنا اصلا كنت عايزه أنام ونفسى أسالها انتى مين اصلا؟الاخر خالص افتكرت انها كانت معايا فى درس فى تانيه ثانوى وطلعت معايا كمان فى الكليه وقابلت البنات الى كنت جايه معاهم وانا مروحه مع انى مشفتهمش طول اليوم وركبنا ووصلت البيت وجريت عالسرير عشان كنت هاموت وانام ونمت على طول قبل ما اوصل للسرير ومش رايحه لا بكره ولا بعده .وده كان اول يوم ليا فى الجامعه عقبال ما احكيلكوا كده على يوم تخرجى كماااان 5 سنين باذن الله

بكره اول يوم ليا فى الجامعه يا جدعان

2008-09-20T20:04:00.004+02:00

دلوقتى بكتبلكوا ليله دخولى الجامعه - يعنى بكره اول يومى لسه -مش عارفه اوصفلكوا انا حاسه بايه بالظبط
يعنى شويه قلقانه على فرحانه على مش عارفه اعمل ايه بالظبط وواحده صاحبتى كل شويه تسأ لنى هتاخدى ايه معاكى بكره ؟؟
أقولها ايه دى مش عارفه ؟ هاخد السندوتشات مثلا والمصروف اكييد مممم وايه تانى هاخد قلم مثلا وهاخد اسكتش .... مش عارفه اخد البالطو ولا ايه ....انا لو عليا نفسى البسه وانا نازله ونفسى اخده مع انى واثقه انى مش هاستعمله قبل العيد ....بس هيقولوا عليا هبله وماله بقى مهم هيكتشفوا ده بعد كده لوحدهم عاتى يعنى وهروح الساعه كام بقى .. انا بقول اصلى الفجر وانزل عشان انا عارفه انى هتوه هناك كتير يبقى اتوه بروقان بقى خاصه ان الكليه كبييييييره و المدرسه متجييش فيها حاجه وخاصه برضه انهم لمينا احنا واسنان وعلوم فى مكان واحد عشان نتوه ونخبط فى بعض براحتنا . ربنا يستر بس ومروحش احضر مع بتوع اسنان ولا العلوم . يارب وفقنى فى الكليه دى الى دخلتها بكامل قواى العقليه وباختيارى التام ومتشمتش حد فيا خاصه ان عندى فى البيت كل شويه يرموا كلام من نوعيه اما نشوف هتعملى ايه -على اساس انى صمصمت على صيدله و رفضت الطب بتاعتهم دى -اكتر حاجه قلقانى من الكليه دى حكايه الضفاضع والكائنات و الحشرات الزاحفه التانيه الى هنشرحها مش فاهمه احنا مالنا اصلا . انا مش متخيله نفسى اصلا وانا بشرح ضفدعه ....عاااااااااااااا.....انا ممكن اخبطها فى نافخوها عشان يغمى عليها وبعد كده ابقى اشرحها براحتى بقى . بس برضه اهو ارحم من جثث البنى ادمين .
اول ما ارجع بكره من الكليه هحكيلكوا عملت ايه
سلملم مؤقتا بقى

انتوا معايا ولا مع الناس التانيين ؟؟؟

2008-09-20T01:02:00.004+02:00

انهارده يا جماعه قمت من أحلاها نومه على تليفون من واحده صاحبتى وفضلنا نلك كالعاده لحد ما اتكلمنا فى موضوع خطير خطير يعنى واختلفنا فيه بخطوره وهى فضلت مصمصمه على رأيها وانا حاولت ابعدها عن الخطر بس معرفتش متيجو احكيلكوا على الخطر ده ...ااا ..قصدى الحوار ده ونشوف مين الى معاه حق فى الكلام
هى : الو ازيك عامله ايه ؟

أنا: تمام الحمد لله ؟

هى :شوفتى يا بنتى واحده صاحبتى جايبه مجموع طب وهتروح علاج طبيعى شوفى الهبل ؟

أنا : معلش مش مركزه هو فين الهبل فى كده ؟؟

هى :ازاى يعنى تبقى جايبه مجموع كليه قمه وتروح كليه تانيه ؟

أنا :مش هى اساسا كانت بتذاكر عشان تروحها يبقى لما تجيب مجموع كبير تروح كليه تانيه ليه يعنى ده يبقى هو ده الهبل على أصله ؟؟

هى:يا بنتى تسيب كليه قمه وتروح كليه اى كلام؟

أنا :اولا انا اساسا مش مقتنعه ان فيه حاجه اسمها كليه قمه.يعنى ايه قمه؟عشان بتاخد اعلى مجموع يعنى؟ طيب وايه يعنى ؟هى بتاخد مجموع عالى عشان تتحكم فى العدد الى داخلها مش اكتر ؟

هى:يعنى هى مش تعبت فى الدرجات دى والمفروض تستغلها ؟

أنا:طيب مهى تستغلها فى الكليه الى نفسها فيها ايه الى يخليها تروح كليه اقل ولا هى لازم كانت متتعبش نفسها عشان الكليه الى داخلاها بتاخدمجموع قليل

هى:لا تذاكر برضه

أنا :وبعدين لما تجيب مجموع عالى تروح كليه اعلى من الى بتذاكر عشانه والا تبقى هبله مش كده ؟

هى :اه تبقى هبله

أنا : يا سلام . وافرضى بقى طلعت دكتوره فاشله فى مجالها استفادناايه بقى احنا ولا هى استفادت ايه غير وجع القلب عالفاضى .انتى عارفه دفعه كليه الطب فى كل جامعه بتطلع كام دكتور فى السنه ؟كتير مش كده ؟

هى :اه

أنا :مين فيهم دكتور شاطر ناجح فة مجاله يتعد وا على الصوابع

أنا :طيب ماهى لو دخلت عاج طبيعى ونجحت فيها تبقى حاجه كويسه ولا ايه ؟؟

هى :مش عارفه بقى بس انا مقتنعه ان فى حاجه اسمها كليا قمه ميختلفش عليها اتنين

أنا :طيب حاجه تانيه

أنا :معنى كده ان اى حد فى ادبى المفروض ميتعبش نفسه وميذاكرعشان الكليات بتاخد مجموع قليل وبلاش بقىالشاطر يجيب 97 و 98 خساره بقى كان دخل علمى احسن مش كده ؟؟

هى : اه كان دخل علمى احسن

أنا : يا سلام . وانتى مين قالك انه بيحب الكيميا الفيزيا مش يمكن بيحب التاريخ ولو كان اخد كيميا كان سقط فيها وبعدين هو لا زم البلد كلها تبقى دكاتره ايه مفيش محاميين ومحاسبين وكل ده ؟

هى :.............

أنا : انتىبتفكرى زى جدتى وجدى وبرضه مقتنعتيش بكلامى

هى : بصراحه مقتنعش . وبعدين اختلاف الرأى لا يفسد للود قضيه

أنا : لا هيفسد بقى

هى : خلاص غيرى الموضوع

أنا : ما علينا . انتى صحتينى من النوم وخلاص

هى : طب روحى نامى بقى

أنا : أفيد برضه سلام

هى : سلاااااام

يوم ان وقفت امام البرجكتور !!

2008-09-18T22:34:00.004+02:00

مغامراتى ايام ثانوى متنتهيش طبعا كنت باخد دروس فى كله وكنت اكتر واحده بتنزل الشارع كنت بحس ان سواقين المواصلات بقوا عارفنى اصلا.يااااه كانت ايام الحمد لله انها عدت على خير.بس لما بقعد افتكر الى كان بيجرالى بضحك اوى مع انه فى وقته كان بيضايقنى اوى اكتر درس كان بيضايقنى الفيزيا. المستر كان صوته وااااااااااااااطى اوى والتكييف شغال بقى واحيانا كان بيضلم القاعه علشان نتفرج عالبرجكتور على اساس اننا نفهم اكتر يعنى بس ولا كان ليه اى اثر غير اننا كنا بنااااااااااام لحد ما يخلص. مره من المرات كنا اول السنه ومكناش فاهمين حاجه منه المهم هو كان مشغلنا البرجكتور وعمال يفرجنا على حركه الجزيئات فى الموجات يعنى وهو مصمم انها بتمشى فى اتجاه معين بس انا عن نفسى مش شايفه كده خالص . كنت شايفها ماشيه الاتجاه التانى سألت صاحبتى الى جانبى :يبنتى هى دى ماشيه ازاى ؟؟؟قالتلى : كده ( وشاورت فى اتجاه تانى خالص) واضح انها كانت فاهمه زياده عن اللزوم المهم انا قعدت اجيبها شمال اجيبها لمين طيب لفوق لتحت مش مقتنعااااااااااااه مليش دعوه بقى دى بالذات من المنهج كله عايزه افهمها المهم خدتنى الشجاعه اوى مش عارفه ازاى وقلت :مستر؟ بصلى كده مبتسما وهو طبعا مستغرب ان فيه حد يساله على حاجه لانه اصلا عارف ان محدش فاهم حاجه و رامى طوبتنا وقالى :ايوه , قلتله : انا مش شايفه انها ماشيه فى الاتجاه الى حضرتك بتقول عليه (وسااااااد الصمت تا تا تا)قالى مبتسما برضه مفيش فايده: ازاى امال شايفاها ماشيه ازاى ؟انا بقى قعدت اشاورله على اتجاهات غريبه كده وهو مبتسم طبعا ومستعد للسخريه كالعاده وانا اقول فى سرى (انا الى جبت ده كله لنفسى)المهم قام قايلى : تعالى ,قلتله: لا خلاص مش مشكله يعنى قال: يبنتى تعالى انتى مكسوفه ولا ايه ؟ وطبعا اصحابى قاعدين جنبى اما صدقوا بقى حاجه تفرفشهم شويه -قمه النداله-قالولى اطلعى اطلعى يلا ,المهم طلعت ادام البرجتكور وقالى :شاورى لى بقى على جزىء معين وورينى اتجاهه انا قلت فى سرى : ايه الراجل ده بيستهبل عليا اكيد اشاورله على ايه ان شاء الله هو مش شايفهم بيجروا ازاى دى اكييد مكيده مدبره ضدى عشان انا اتجرأت وعارضته .حاولت الملم كرامتى الى على وشك انها تبعتر وتبقى فرجه وحاولت اشاور وافهمه وهو عامل زى ما بيكون بيكلم مخلوق فضائى بيضحك بس وبيبين انه كلام غير منطقى مع ان كان فيه بنات موافقين على كلامى بس وشايفين زيى بس اختفوا ساعتها ,طبعا كله صحى وفوق وقعد يضحك والمستر يضحك وانا مش عارفه اعمل ايه ياما اضحك ياما اعيط فقلت اضحك اشيك ودخلت طبعا وحوالى 100 بنى ادم بيضحك عليا واصحابى الاندال بيضحكوا اااااااه لن انسى لكم هذا الموقف ابدا كده برضه متدافعوش عنى ؟؟المهم روحت بسرعة اليوم ده وتانى يوم بقى روحت درس العربى وهناك قابلت واحده معرفهاش كده كانت بتسالنى على حاجه وطلعت بتاخد عند نفس مدرس الفيزيا قلتلها وانا كمان باخد عنده قالتلى : مانا عارفه شوفتك امبارح لما كنتى ادام البرجكتورانا قولت فى سرى : ياااااااى الفضايح ودى طلعتلى منين دى كمان ؟.رديت عليها :اه المستر مكنش فاهم اصلا قالتلى : اه ده الطبيعى بتاعه قلت فى سرى : كويس طلعت متعاطفه معايا قلت :بس كويس انها كانت جروب بنات بس ,قالتلى : لا مهو كان فى صف ولاد ورا قلت فى سرى : يااااااااااااا حلاوه يادى الفضايح!!!

اخيرااا بقى عندى مدونه

2008-09-18T22:34:00.000+02:00

اخييرا وبعد عده محاولات باءت جميعها بالفشل بقى عندى مدونه . يعنى بقى عندى نافذه جديده, اقدر اشوف الناس من خلالها ويشوفونى منها ,كل ما اقول لحد انا عايزه مدونه مليش دعوه . يقولى وماله اعملى . بس هتكتبى في ايه ؟؟ سؤال يفرض نفسه بغتاته. هكتب الى اكتبه انا حره , هكتبلكوا عن نفسى , مغامراتى , مواقف بتقابلنى , هاخد رأيكم , هعرض عليكم ارائى من واقع خبرتى الطويله فى الحياه (18 سنه خبره امال ايه ) براحتى بقى ده ايه ده ؟؟ تابعونى بقى وتعليقات بقى مش هوصيكوا والااااااااا.متخافوش هعمل ايه يعنى ؟؟