الجمعة، 20 فبراير 2009

بين الآباء والأبناء

امبارح وانا فى الكلية لقيت واحدة صبحتى مسنتحه كده ومسبهلة على غير عادتها فقل متجيش برضة اسيبها فى حالها لازم اروح انكشها شويه واعرف مالها , المهم مكدبتش خبر وروحتلها



أنا : ايه يا بنتى مالك كده ضاربه الوش الخشب كل ده عشان هنشرح فرافييير وارانب الترم ده , عادى يعنى لا داعى للقلق كلنا هيغمن علينا فى اول سكشن ده قدرنااااا



هى : لا عادى انا مستغنيه عن العشر درجات بتوعهم اصل الحكايه مش ناقصة



انا : قولتييييييلى بقى ايه هى الحكاية اللى مش ناقصة دى



هى :مفيش !!



انا :ايه يا بت انتى يابت !!قولى قولى متخافش سرك فى بير مخروم ان شاء الله .



هى :دماغى وجعتنى من كتر التفكير مش عارفة اعمل ايه ؟



انا :فى اية ؟!!



هى : فى اى حاجه وكل حاجه مش عارفة اخد اى قرار فى اتفه الامور فى حياتى , حاسه انى تايهه مش عارفة ابقى ازاى ؟عايزة اعمل اللى يرضى ربنا ويرضينى ويرضى اللى حواليا

انا : وايه اللى مخليكى مش عارفة تاخدى قرار ؟؟

هى : مجربتش قبل كدة اخد اتصرف فى حياتى بطريقتى , من وانا صغيرة ولحد دلوقتى كمان وماما وبابا هما اللى بيتصرفوا فى كل شئونى ولما كنت بطلب انى أنا اللى اتصرف فى حاجة بيبقى دايما الرد انى هيضحك عليا ومش هاعرف اعمل حاجه وهما ادرى

انا :معظم أبهاتنا وامهاتنا بيحبوا يكونوا المسئولين عننا مهما كبرنا لاننا فى نظرهم بنفضل صغيريين وهما بيفضلوا اكثر خبرة مننا

هى : بس انا نفسى اجرب واغلط واتعلم , مهما اما كانوا فى سننا كانوا بيجربوا عشان كده اخدوا الخبرة دى ، امال احنا هنتعلم امتى ناخد قراراتنا بنفسنا ومش بيدونا الفرصة نعبر عن نفسنا برؤيتنا احنا مش برؤيتهم هما ؟؟

انا : مهو ده برضة نابع من حبهم لينا وانهم مش عايزينا نقع فى نفس غلطاتهم زمان فالهدف صح وان كان فى بعض الاوقات الاسلوب غلط

هى : انتى عندك حق بس مهو الاسلوب ده هو اهم حاجه وحسب الاسلوب بختلف رد فعل الشخص يعنى لو كان الاسلوب مقنع اكيد هقتنع وهنفذ اللى هما عايزينه برضا وقناعه منى انما اسلوب العافيه اللى بيتبعه اغلب الاباء مع اولادهم ده بيزيدهم عند وبيعملوا الحاجه وهما حاسين انها مفروضه عليهم حتى لو كانت صح فيها ايه لما الام بدل ما تهدد بنتها مثلا انها لو عملت كذا مثلا هتوريها وهتسوى وهتخلى مهى لو قعدت معاها وفهمتها المزايا والعيوب وسابتلها حرية الاختيار فى الاخر هيبقى افضل كتيير

انا : هرجع واقولك ان برضه الام بتخاف على بنتها وهتخاف انها تختار غلط وبعدين اللى انتى بتكلميه فيه ده مشاكل جيل بحاله من الابناء مه جيل كامل من الاباء ومتهيألى اما نبقى زيهم كده هنخاف على ولادنا برضه بس اعتقد انه هيبقى مع اختلاف الالوب اللى ميخليهمش يفقدوا الثقه بنفسهم وعموما يعنى متأزميش نفسك وخدى الموضوع بالتدريج يعنى تقدرى تتناقشى معاهم بهدوء وتحاولى تزودى مساحه حريتك وتوسعى قرارتك

هى : ياريت بجد اقدر اوصل لحل يريحنى ادعيلى بس انتى

انا : ربنا معاكى ومعانا يستى , يلا اسيبك انا بقى عشان عندى سكشن بعيد عنك

هى : عندك سكشن فيراااااااان ولا ايييييه ؟؟

انا : لااااااا حرام عليكى يا شيخة لسه بدرى يا بارده انتى

هى : طويب عموما مسيرك هتقابليهم روحى بقى عشان مش تتاخرى

انا :طيب سلام بقى

هى : سلام

مشيت انا بقى وبتها تكمل سنتحة ورحت لقيت مفيش سكشن حمدت ربنا وانا فى السكة للبيت قعدت افتكر الحوار اللى دار بينى وبينها .ياترى فعلا سيطرة الام والاب على افعال اولادهم صح ولا غلط , بيفيدهم ولا بيضرهم ؟؟امتى فعلا بيحسوا انهم خلاص اتعلموا ويقدروا يعتمدوا على نفسهم ؟

انتوا ايه رأيكوا بقى فى المناقشه والكلام ده ؟؟؟

هناك 16 تعليقًا:

الازهرى يقول...

اول تعليق

الازهرى يقول...

الامور ليست بهذا المقياس
فالتدخل مطلوب
لاسداء النصح واعطاء الخبرة
ولكن المهم هو اسلوب هذا التدخل لانه يترتب عليه صفات الابناء من حرية التصرف والاعتماد على النفس وغيرها

تحياتى دوما

Kiara يقول...

مشكلة جيل بس الاهم ازاي بيتدخلو مش تنسي لا خاب من استشار المهم ان القرار اولا واخير لينا لكن قبل القرار بنسال طب اعمل ايه ونسمع ونسمع وفي الاخر نفكر ونشوف الصح ايه ونعمله

Sweet Violet يقول...

التدخل مطلوب طبعا لكن مع اعطاء قدر من حريه الاختيار

يعنى مش امر و لازم و لابد و كبت حريه الابناء .. لان بكده بيطلعوا عديم الشخصيه و مابيعرفش يتصرف فى بعض المواقف و ده بيسبب مشاكل بعد كده فى الحياه العمليه او الاجتماعيه او الزوجيه

شمس وقمر يقول...

رودى بجد قبل مااعلق
ماشاء الله ع ذاكرتك يابنتى
ريكوردر ههههههه

نيجى بقى للموضوع
بصى احنا لو نعمل تبادل ادوار فى حياتنا هنرتاح جدا
يعنى الام و الاب يحطو نفسهم مكاننا شويتين يحسو بينا هتلاقيهم بيدوكى مساحة استقلال بذاتك
و احنا نفس الحكاية
لازم نقدر خوفهم علينا
احنا المفروض قبل مانطلب منهم انهم يسيبونا براحتنا
لازم نحسسهم اننا بقينا كبار
نتحمل المسئولية
نجرب و نتعلم
انما مش تطلبى من ام مثلا شايفة بنتها هتكلم ولد و تسيبها
استحاااااااااالة
حتى لو هتتعلم
بس صعب يا رودى
تبقى الام شايفة بنتها فى خطر و تسيبها تجرب الخطر ده
احنا لازم نزود خبراتنا فى الحياة
نقرى
نسمع
كده
بالتدريج هما هيعرفو اننا كبرنا لما يسمعو اراءنا لما يشوفو تصرفاتنا
كده يعنى

الفراشة الصغيرة يقول...

صراحه مشكل الجيل ده كتيرة يا رودى

مش اننا مش عارفيين ناخد قرارا بس
مشكلتنا اننا حتى لو فكرنا ناخده
مش نعرف نتحمل عواقبه

احمد سعيد يقول...

مع الاسف
دا حال اغلب الاسر المصريه
بس نفسى يفكروا فى حاجه واحدة
لما يجى الوقت اللى بنتهم لازم تعتمد فيه على نفسها وتشق طريقها
مفكروش فيها هتبقى حالتها ايه ساعتها

...................

مدونتك جميله
دى اول زيارة ليا
وان شاء الله لن تكون الاخيرة
ربنا يوفقك

PrInCeSS BeRy يقول...

ازيك يا رودى يارب تكونى بخير

اقلك المشكلة فى اسلوب ابداء النصيحة ودلوقتى الشباب بشكل عام مبقاش اسلوب االعصبية بيجيب نتيجة ويمكن حتى المسايسة مبتجبش نتيجة بس فى الاخر بنحتاج لحد ينصحنا ويقدمهالنا بالشكل اللى نقدر نفهمة لاننا مش هنفهم احسن من الناس اللى اكبر مننا او عالاقل ذوات خبرة فى الحياة لو قدرنا نسمع بعض بشكل صح هنعرف نتعلم صح

تحياتى

ألـــــــوان الحيــــــــاة يقول...

الازهرى

اهلا بيك فى اول تعليق منورنى والله

ـــــــــــــــ

الازهرى تااانى

فعلا هو مطلوب للتوجيه والاسلوب هو اللى بيفرق فى اى تعامل عشان نخلى اللى ادامنا يقتنع باى حاجه

تحياتى ليك

ألـــــــوان الحيــــــــاة يقول...

كيااااارتى

وحثتينى

كلامك صح يا قمر مفهاش حاجه اما نسمه ونستشير بس المهم احنا اللى نقرر فى الاخر

تحياتى يا جميل

ألـــــــوان الحيــــــــاة يقول...

sweet voilet

ايون فعلا عندك حق طبعا

المطلوب النصيحه مش الاوامر وفرض الرأى

منوارنى والله

ألـــــــوان الحيــــــــاة يقول...

شمس وقمر

يااا ساتر يارب
عالحقد

عندك حق يبنتى طول عمرك عاقله D:

منورانى ومتقطعيش الزيارات

ألـــــــوان الحيــــــــاة يقول...

الفراشة الصغيرة

اها جيل متعب اوى يا ساتر D:

ربنا يسهلنا الامور يارب ويرشدنا للصواب

تحياتى ليكى

ألـــــــوان الحيــــــــاة يقول...

أحمد سعيد

هما بيعتقدوا ان ده هو اسلوب التربيه الصح وبرضه خوف عليها بس للاسف بتبقى سلبياته اكتر فى معظم الاوقات

ـــــــــ

ربنا يكرمك ده بس من زوقك

منورنى دايما

تحياتى

ألـــــــوان الحيــــــــاة يقول...

PrInCeSS BeRy

ازيك انتى ؟ انا بخير الحمدلله

فعلا بس اللى يسمع ويستوعب واللى ينصح باسلوب كويس

هى الحكايه محتاجه تعاون بين الطرفين

منوارنى والله

sa يقول...

عارفة يا رودى
فيه ناس تلاقيهم قريبين اوى من اهلهم
سواء الام او الاب او حتى الاخت والاخ
وبيبقوا اصحاب اوى

ومع ذلك بيغلطوا كتير اوى
رغم ان كل اللى بيعملوه بتكون الام او الاب عارفينه

وفيه ناس ف حالهم اوى
عايشين مع اهلهم ومش عايشين
عمرهم ماتكلموا مع بعض ف حاجة او خدوا رأى بعض ف حاجة

ومع ذلك بتلاقيهم اشخاص محترمين جداا
وكل تصرفاتهم عقلانية جداا جداا
عكس التانيين خالص

يعنى المفروض بجد ان الاهل يسيبوا للابن او البنت مساحة من التفكير
يخلوه يجرب
ويتعلم لوحده الصح من الغلط

عشان يكبر ويفهم
ويقدر يعيش ف الدنيا
لانهم مش عايشينله لاخر العمر
هاييحى يوم لازم فيه يعتمد على نفسه

بالعكس ده هايكون عنده بيت واسرة وهايلاقى اللى معتمدين عليه

يبقى ماينفعش انى اخلى ابنى او بنتى مايقدرش يعيش ف الدنيا من غيرى

انا اوجهه .. اقوله رأيى
بس مافرضهوش عليه
وماجبرهوش على حاجة