الخميس، 13 يونيو، 2013

أول وأخر يوم

 لانى تعودت انى اسجل اللحظات المميزة فى حياتى عالمدونة دى 

على الرغم من ان تقريبا كل الناس هجرت عالم المدونات

بس انا باحس احاسيس عظيمة لما باقرا بوست قديم ليا عن يوم مميز

زى ما لقيت انى كاتبة عن ليله اول يوم ليا فى الكلية

واول يوم نفسه

ويوم ما كملت 22 سنة

انهارده باكتب عشان دى ان شاء الله آخر يوم مذاكرة ليا باذن الله

بكرة آخر يوم امتحانات

خمس سنين عدوا هى تقريبا عُمر المدونة

وتقريبا أحلى فترة هافضل فاكراها طول حياتى واكتر فترة مؤثرة اتغيرت فيها

احلى فتره عشان الصحاب مش عشان الكليه خالص

الكلية انا هاكسر وراها القَلة دى :D

باكتب البوست ده عشان اجى كمان خمس سنين افتكر ليلة زى دى

او كمان عشر سنين واجى افرج اولادى عالقلة اللى كنت عملاها :d

بس طبعا هاكون مبسوطه لو حد قراه واتمنالى التوفيق فى حياتى الجاية :) ودعا لى :)



الأحد، 10 فبراير، 2013

22 ولسه ....!


البوست ده فكرته مسروقة
أه والله
صديقتى اسراء صاحبة مدونة بنت نكتة كانت كاتبة حاجه مشابهه وهى عندها 19 سنة
فقررت أقلدها عشان كمان سنتين ولا حاجه أشوف ايه اللى اتحقق وايه لسه !!

عندى 22 سنة وشهر و 12 يوم تقريبا ولسه

مفيش غير سارة اللى جابتلى ورد فى عيد ميلادى مرة لما لقيت حالتى صعبه :))
طبعا مشكورة سارة جدا لرفعها روحى المعنويه وانى كنت فاكرة انه عمر ما حد جابلى ورد وطلع فيه :))
ولكننا نريد التجديد ^_^

عيد الحب الجاى هو العيد رقم 22 اللى هيجى ومحدش هيلبسلى أحمر ويجبلى دبدوب أحمر ويجى يقولى كل سنة وانتى طيبة :))

يلا مش مشكلة عيد الحب اصلا حرام ^_^

لسه محققتش حلمى انى أجرى عالبحر الفجر الصبح وبعد ما أتعب انزل تحت فى الرملة واطرطش ميه عللى معايا ..لسه لسه :))

لسه مطلعتش رحله برا اسكندريه لوحدى !

لسه مطلعتش رحلة برا مصر مع اى حد حتى !! لسه مروحتش عُمرة ...يارب اكتبها لكل مشتاق ...

لسه مبعرفش أدى حقن ....هو لازم ؟؟ مش لازم بقى خلاص انا بخاف ^_^

لسه مبحبش أغسل الاطباق ....بس بغسلهم ...باحب المطبخ بس ...لسه ماخدتش فرصتى !

لسه محصليش الحاجه اللى ممكن تخلينى أعيط من الفرحة !

لسه مجربتش احساس انى أبص فى عين حد اتكهرب ....وهو كمان مهو مش هاتكهرب لوحدى ..اللى هو بيسموه البتاع من اول نظرة ده ولا ايه :))

لسه حاسه احساس بنت عندها 15 سنة بالكتير

لسه بنفس الهبل ^_^|

فيه حاجات كتير لسه معملتهاش بس مش فاكراها الصراحه

هو ليه العمر بيكبر واحنا مبنكبرش ؟؟ ومبنحققش احلام كتيرة صغيره وعبيطة بس مبتحصلش !!




السبت، 22 سبتمبر، 2012

أول يوم بكالوريوس !!!




يااااااه ....مفيش اسرع م الأيام !
مكنتش متخيلة انى وانا باكتب البوست ده
http://roodyhanem.blogspot.com/2008/09/blog-post_25.html


عن أول يوم ليا فى الجامعة

انى هيجى اليوم اللى اكتبلكم فيه عن اول يوم فى آخر سنة ليا فى الجامعة بسرعة كده !

اد ايه احنا بنكبر بسرعة اوى من غير ما نحس

للاسف كل ما بنكبر كل ما الحياة فى نظرنا بتبقى اكثر تعقيدا وبتبقى الحاجات اللى بتفرحنا اكثر صعوبة

وانا صغيره كانت بتفرحنى لعبة جديدة

أول بوم فى الجامعة فرحتى كانت طاغية بانى مش هالبس لبس المدرسة تانى !

انهارده مش عارفه افرح ولا ازعل ؟!

افرح عشان خلال سنة هتعدى هوا مش هابقى طالبه تانى وهابدا اشتغل واتحمل المسؤلية
ولا ازعل عشان مش هاينفع خلاص ابقى  مش حاملة هم حاجه ورامية مسؤليتى ...مانا كنت طالبة مش مطالبه غير انى اذاكر وانجح ...ولا لانى مش هاشوف زمايلى غير صدفة بعد كدا ....ولا لانى مش عارفه مستقبلى هيبقى شكله عامل ازاى وهاقدر اثبت نفسى ولا هافضل هوائية ومتقلبة كما انا فى الدراسة

مش عارفه الصراحة احاسيس ملخبطه اوى أبرزهم التوهان واللامبالاه ببدايه الدراسة الصبح وانا لسه صاحية !

هى الايام بتخلينا اكثر برودا ولا ايه ...انا فى ابتدائى كنت بنام من المغرب :d
بس عموما ...عندى فضول اعيش سنة التخرج واستمتع بلحظاتها
يمكن مش حاساها دلوقتى ...بس يمكن بعد كده اما الايام تعدى احسها وافتكرها
وانا بأقرا البوست ده كمان واقول يااااااه ....مفيش اسرع م الايام !

السبت، 21 يوليو، 2012

احساس غريب ....

احساس غريب لما تبقى زعلان من حد ومش زعلان فى نفس الوقت

اما تحس انك مش فارق معاه فى نفس الوقت اللى يكون هو فارق جدا معاك

تحول 180 درجه فى المعاملة من قمة الاهتمام لقمة التجاهل وانت مش فاهم

وحتى مش قادر تستحمل تعامله بالمثل لانك باقى عالعشرة ومستنى بس مبادره ....مبتجيش !!

اما تحاول تقنع نفسك انك خلاص مش هامك بس الموضوع يبقى شاغل كل تفكيرك

بجد منتهى الحيرة من انك تتنازل للمرة الألف وتبادر المرة دى كمان ولا تحاول تتجاهله وتخرجه من حياتك زى مانت حاسس انه بيخرجك من حياته

بصراحة ساعات باحس انى ساذجة فى معاملة الناس

مبعرفش ازعل من حد وبارتبط بالناس جدا

واضح انه ده بقى عيب حاليا وانا اللى محتاجه اتغير !

الاثنين، 9 يوليو، 2012

المعتقلون أولا !


الصراحة كنت هاتكلم عن موضوع تانى خالص ملهوش اى علاقة بالسياسة

بس مقدرش أتجاهل الحكم على شباب السويس انهارده سبعه منهم ب 6 شهور وواحد 3 سنين ...وضربوا أهاليهم اللى كانوا واقفين برا ...هو فيه عقوبه جديدة فى القانون ان اللى يتحكم عليه أهله يتضربوا ولا ايه ؟؟؟
..متنساش يا مرسى الناس دى هى اللى خلتك تبقى رئيس ومتنساش انك روحت التحرير وقولت ...ثوار أحرار هنكمل المشوار !
الناس دى لازم تبات فى بيوتها هى والباقى المظلومين المحبوسين بس عشان شاركوا فى الثورة
مهو لا يعقل يعنى يبقى مرميين فى المعتقل كده وبيتحاكموا عسكرى عشان نزلوا مظاهرات ولا هتفوا ضد العسكر والريس يبقى جه بسببهم ويقعد ساكت
خلى بالك يا مرسى ...دعوة المظلوم مستجابة ..وانت حر بقى !

الأحد، 8 يوليو، 2012

أنا جيت بقى وكده :)

وحشتنى المدونة دى أوى

ووحشنى اما كنت باجى اكتب أى كلام حتى لو مش مهم واستنى تعليقات الناس عليه

وحشتنى الأيام اللى بدأت فيها المدونة دى كنت لسه ساعتها داخله الكلية وفرحانة أوى

كان فيه تفاصيل صغيرة فى حياتى بس حلوة وبتفرحنى

اما باقرا عن اول يوم ليا فى الكليه باضحك واقول ايه الضياع اللى كنت فيه ده :)

بس باحمد ربنا انى كتبت عنه وقتها عشان آجى بعدها بأربع سنين أضحك عليه فى وقت مش لاقيه حاجه تضحك بجد فى الأيام دى

أربع سنين ...أنا قولت أربع سنين !! آآآه

دى الأيام بتعدى هوا !

المشكلة انه طول الاربع سنين دول محصليش اى تغيير جذرى فى حياتى

غير انى بقت السياسة محور اهتمامتى !

مين مبقتش السياسة محور اهتمامته اصلا !

أٌقوم الصبح اشوف آخر الاخبار ولو حاجه حصلت أفضل اتابعها واقلق على أصحابى الافتراضيين عالنت لا يكون جرالهم حاجه !

ناس عمرى ما شفتهم ولا شافونى وغالبا مش هنتقابل فى يوم ما ولكن بقوا بيشكلوا حياتى

بخاف لاشوف صورة او اسم حد اعرفه جراله حاجه ..اليوم يخلص وانام وقلبى مقبوض

لو مفيش أحداث بقى ومش قلقانة على حد بيبقى احساسى بالخنقة نابع من انى مثلا اكتشفت ان اقرب ناس اعرفهم والمفروض انهم اقرب اصدقائى تفكيرهم فلولى بحت وبافضل فى حيرة بين علاقتى بيهم الالكترونية وعلاقتى بيهم فى الحياة ....ازاى افصل بينهم !! ازاى اتناسى فجأة رأى أصدقائى عالنت انه الشهداء ماتوا وخلاص (والحى أبقى من الميت ) بمعنى أًصح ويبقى مطلوب منى أخرج واتبسط واتفادى الكلام فى السياسة معاهم عادى !

مبقيتش باخرج غالبا وباقعد عالنت لفترات باضيع وقتى فى لا شىء

كان عندى دور برد لمدة اسبوع بس كان جامد شوية ....مش عارفه ليه حسيت فى لحظات انى روحى بتروح منى ....وانه مفيش حد حواليا بالشكل اللى كنت متخيلاه ...او مش هاضحك على نفسى ....أنا عمرى ما كان فى حد حواليا بالشكل اللى كان نفسى فيه ...يمكن يكون دور البرد حاجه بسيطة بالنسبة لأمراض تانية ..الحمدلله..بس أنا كنت بانتهز الفرصه واعيط ومش عارفه بجد ده من احساس الألم وتكسير الجسم ولا الألم النفسى

حاسة انى مفتقدانى ومفتقدة هواياتى وذهنى الصافى ....حاسة انى تايهة

وخايفة أجى كمان أربع سنين أٌقولكم .....انى حاسة انى تايهه هههههههههههههههه :))

ايييييييييييه دونيااا

بس انتم وحشتونى بقى :D

الثلاثاء، 19 أكتوبر، 2010

روعة الحياة ....!!!

الــــــحـــــيـــاه

روعـــــه بــــوجــــود من نــــــحــــــب .......فـــــــهـــــل
يـــــــعــــلـــم مـــــــن نـــــحــــــبــــهـــم انــــــهــــم
روعــــــــــــــــــه الــــــــحــــــيــــــاه.....!!!


جملة قريتها خليتنى افكر شوية ؟؟؟؟؟ هو فعلا الاشخاص اللى فى حياتنا هما اللى ممكن يخلوا حياننا روعة او العكس حسب وجودهم او لأ ؟؟؟؟

انا شايفة ان الناس حاجة مهمة جدا فى حياة كل انسان.....بس هل هما فعلا كل حاجة ؟؟؟؟

مهو ممكن يكون حد مش متوفرله الناس اللى تخليه حياته ....((( روعة ))) !!!

ده حتى دايما اما بتحصل مشكلة او اى موقف بيكون السبب شخص...!!! مش اى حاجة تانية

انا عن نفسى مع اعترافى بقيمة الناس فى الحياة الا انى مش متفقة مع الجملة دى وشايفه ان الانسان يقدر يخلى حياته روعة بطرق تانية مختلفة

ولا ايه رأيكم ....



الجمعة، 15 أكتوبر، 2010

وحشتونىىىىى

وحشتونى فعلا كلكم بمدونتكم ببوستاتكم بسلطاتكم بباغنوجوكم :d

ادعولى ربنا يقدرنى واقدر استأنف نشاطاتى تانى...على الرغم من استراتجية القمع والتعذيب فى الكلية باعتبارها منشأة من منشآت البلد

واللى يمشى على الكل يمشى عليها

بس على الرغم من كده مازلنا صامدون للنهاية اما النصر او الاستشهاد فى سبيل العلم s:s:

بس انا بجد نفسى فعلا ارجع اتابع زى الاول واقرا كل الكلام اللى بتكتبوه واكتب كتييييير

محدش يزعل من عدم متابعتى .....وان شاء الله اقدر اتواصل معاكم اكتر من كده فى اقرب فرصة

دمتم سالمين ,,,,,,

السبت، 10 يوليو، 2010

جيوش الامن المركزى تمنع الصمت..الغضب..الاحتجاج !!!!

آآآآآآآه عليكى يابلد لما تنزلى الف جندى امن مركزى او اكتر
عشان يخرسوا شباب اصلا مش نازل يخرب ولا يدمر....
نازل واقف صامت غاضب...
حتى الصمت ممنوع...
قالولنا اللى مش عايز يتهان يروح...
ولية الاهانة اصلا ؟؟؟
عشان بطالب بالحق
بهدوء وتحضر ؟؟؟؟
بس ده ان دل على شىء فيدل على ان كلمة الحق عالية اوووى
ليه هما خايفيين كده ؟؟؟
ليه ينزلوا كل دول علينا
ليه القمع والطغيان
ولسه فيه ناس ساكته !
ولسه فيه ناس خايفة !
لسه بتقول وانا مالى !!
مستنيييييين اييييه ؟؟؟
.اللهم انى أبرىء ذمتى امامك من السكوت عن الحق
والسكوت عن النظام الفاسد..
.نظام القمع والطغيان...
حسبى الله ونعم الوكيل