السبت، 27 سبتمبر، 2008

فشخره ومحسن....... ايه المناظر دى ؟؟

وأنا قاعده ادام التلفزيون مستنيه فاصل المسلسل خلال فقره الاعلانات جه الاعلان المستفز بمعدل مرتين بين كل اعلان , هتقولولى طويب ما كل الاعلانات مستفزه جبتى ايه من عندك ؟اقولوكم لا , ده كل الاعلانات كوم والاعلان ده بالذات كوم تانى خالص.

الست فشخره وجوزها محسن زفت منظر واقفين يطلبوا سحور يكفى مصر بحالها , هما بصراحه طيبين شويتين يعنى بيبدأوا بالساقع زى الخروب والتمر الهندى وقمر الدين ويدخلوا بعد كده فى التقيل زى الحمام المحشى والخروف والديك الرومى والفول .....باللحمه المفرومه واوعوا تنسوا سرفيس المحشى أحسن الصيام ميتقبلش ولا حاجه . وبعدين الحلو بقى أمال ايه أم على وبلح الشام والبسبوسه اللى نصها ساده و....ونصها بالمكسرات ولسسسه استنوا البطيخ بيهضم والبنانا سبليت بتمسك-اللهى يمسك فيهم حريقه والمطافى تكون اجازه يارب-
وال ايه بقى اللى يولع الاسعار ويخرب البيوت هى الفشخره والمنظره يا حبوب -حبك برص يا شيخ

بقى هو ده سبب غلاء الاسعار؟هما شايفينا هبل ولا ايه ؟يعنى ايه علاقه ان ناس بتأكل اكل المنطقه كلها بغلاء البصل والثوم ؟عايزين يفهمونا ان اشعب المصرى كله بيأكل بالمنظر ده ؟؟دى الناس مش لاقيه رغيف العيش ابو شلن.أمال مين بقى اللى بيموتوا بعض فى طابور العيش .يكونش بتوع الصومال جايين ياخدوا عيش من عندنا ؟وأما الناس مرتاحه كده ليه مبيأكلوش جاتوه وبسكويت هو لازم عيش يعنى؟؟

طويب مش هما مش بيأكلوا غير لحمه وديوك رومى ؟؟كيلو العدس ب 12 جنيه لييييييه ؟؟أظن ده بقى مش بياكلوه.
ده لو واحد مش من هنا وشاف الاعلان دههيقول علينا شعب مفترى وعينه فارغه وعايش فى النعيم .و مش بعيد يفتكر ان بابا حسنى بيعدى علينا وقت السحور عشان يطمن ان كل واحد معاه الديك بتاعه وسرفيس المحشى والبنانا سبليت عشلن تمسك .

واللى يغيظ أكتر وأكتر بقى , أنهم بيرموا أطباق الاكل وهى مليانه أصلا. ده احنا لو افترضنا يعنى وده من عاشر المستحيلات ان فيه ناس بالطفاسه دى مش هيهون عليه يرمى الاكل ده . يأما هيشيله مثلا ياما هيديه للبواب , ده لو اداه لقطه ...شوفوا قطه..هيكسب فيها ثواب.

هو فيه كده ؟ للدرجه دى الاستخفاف بعقول الناس ؟
ناس مستفزه

الخميس، 25 سبتمبر، 2008

كل واحد يخلى باله من موبايله وفلوسه وسندوتشاته وكراسة محضاراته

معلش اتأخرت عليكم مش بايدى يعنى النور كان قاطع والنت كان فاصل و التلفون عطلان والميه بتقطع برضه يعنى كنت هبعتلكوا البوست على ضوء الشمعه مثلا عموما شكلنا كده هنعزل من البيت

زى ما حكيتلكوا قبل كده احساسى ليله دخول الجامعه يعنى كنت قلقانه شويه وده طبعا مخلانيش أنام غير ساعتين تقريبا , هو مكنش قلق اوى يعنى قد ما كان تشوق لمرحله جديده وحياه وجو تانى خالص. صحيت اول واحده فى البيت مع انى محضره هدومى من الساعه 10 بليل بس قولت اقوم يمكن يحصل حاجه طارئه ولا حاجه _يمكن الاقى الطرحه مش لايقه مع الهدوم ولا فيه حاجه محتاجه تتكوى تانى الاحتياط واجب برضه_بدأت ألبس بتأنى شويتين على غير العاده مهو انهارده مش اى يوم يعنى وخلصت لبسى وماما كانت صحيت ومنستش تبعا اخد فلوس المواصلات ونزلت بدرى جدا تحسبا لأى طوارىء برضه عشان احتمال كبير اوى اتوه فى السكه وانزل قبل المكان او بعده .
وأنا ماشيه بقى فى شارعنا لقيت العيال الصغيره لابسين لبس المدرسه ورابطين الكرافت وشايلين الشنط الكبيره دى كان شكلهم تحفه اصلا عاملين زى لعب الاطفال ياااااه ,هو انا كان بيبقى منظرى كده ؟ الحمد لله ان ربنا رحمنى من القميص البمبى والجيبه الرمادى مش عارفه كنت بلبسهم ازاى ؟؟قابلت واحده صاحبتى على اول الشارع وكان معاها واحده صاحبتها كمان وركبنا فى طريقنا الى الهدف المنشود
وصلنا عند الكليه من غير توهان الحمد لله لقينا زحمه كتير اوى عالباب ووقفنا كتير شويتين علشان كانوا بيعدوا واحد واحد ويشوفوا بطاقته ورخصته ...قصدى ..وصل مصاريفه كانوا محسسنى اننا فى لجنه مرور .دخلنا اخيرا وقابلت ناس صحابى ورحنا على شئون الطلبه عشان نشوف اسامينا ومجموعتنا ونعرف راسنا من رجلينا فى الكليه دى .لقينا ورق الاسامى متعلق واللى كان معلقه بجد كان انسان نبيه اوى ,كان حاطط الورق مش مترتب على حسب الحروف ولا المجموعات يعنى مثلا بدأ بالالف عادى و هوبا لقيناه دخل عالدال وقام مكمل الف تانى وأسهم بقى طالعه ونازله و أنا كل ده مش لاقيه اسمى نوهائى . رحت اسأل عند الست بتاعه شئون الطلبه _ست رخمه اوى على فكره-لقيت كارنيهى لسه مطلعش قلت قشطه اوى كده يبقى انا اروح اقعد فى بيتنا ومفيش كليه السنه دى .قابلت واحده تايهه كده زيى قمت خدتها تدور معايا على اسمى يمكن نلاقيه هنا ولا هناك .قامت البنيه لقيته اول اسم خالص فى ورقه كده مع نفسها مش باين عليها انهى مجموعه مش مشكله يعنى مش هنختلف عالمجموعه احنا كنا فين وبقينا فين ؟؟. مشينا انا والبنيه من الزحمه دى ولقينا سلم كده بيدخل على مدرج 3والناس عماله تدخل تدخل اكنهم بيدخلوا من ناحيه ويخرجوا من الناحيه التانيه مهو لا يمكن يكون كل دول بيدخلوا يقعدوا جوه , احنا مكناش مصدقين اننا المفروض ندخل معاهم بس افتكرنا ان الجدول كان مكتوب فيه اول محاضره م3 واحنا مكناش فاهمين يعنى ايه ؟ انا عن نفسى معرفش غير م5 (المغامرون الخمسه)دخلنا م3 وياريتنا ما دخلنا,لقينا البنى ادمين فوق بعضهم واحنا ماشيين لا اراديا بقوه الدفع فقط , ايه ده هو كله داخل صيدله زيى ,للدرجه دى أنا بقيت قدوه بقى وبيقلدونى ؟؟أنقذتنا العنايه الالهيه ولقينا مكان نقعد فيه,شويه كده والمدرج اتردم ناس الى قاعدين عالارض وعالسلالم والى عالشباك بيتفرجوا من بره مش عارفه ملهوفين على ايه كده دى محاضره يعنى مش ماتش الاهلى والزمالك .دخلنا واحد بتاع فيزيا-أكتر ماده بحبها-بس مقربش من الفيزيا نوهائى . اكتفى انه يكلمنا عن ذكرياته ايام ما كان قدنا - واحنا مالنا احنا-وقبل ما يمشى رصلنا اسامى 7 مراجع الى جانب كتاب القسم المفروض اننا نذاكر منهم والى عايز يتوسع يقدر يروح المكتبه,على اساس اننا هنذاكر للماجستير مش لاعدادى صيدله دخلنا واحد بعديه بتاع نبات تقريبا مش فاكره يعنى وكان بينهم شبه كبير اوى شكلا ومضمونا بس ده بقى محكلناش عن ذكرياته لانه كان كبير شويتين فكان ناسى يعنى بس فضل يوعينا ويدينا خبرته الطويله فى مجال التدريس (كل واحد يحط عينيه فى راسه ويخلى باله من موبايله وفلوسه وسندويتشاته وكراسه محضاراته وكراسه العملى بتاعته عشان الحراميه كتير )ده كان كلامه الى طمنا عالاخر.مش عارفه هنخلى بالنا من كل الحاجات دى ازاى؟ لازم بقى كل واحد وواحده ياخدوا مطوا تهم فى جيبهم عشان يحموا نفسهم(وبالنوسبه للشباب اللى مكنش معاهم بنات فى المدرسه بلاش تركنوا كتير عند الكافتيريا تبصبصوا للبنات عشان مش هينفعوكوا وهتلاقوهم هما نقلوا للسنه الى بعديها وانتوا لسه فى اعدادى )ده كان كلامه برضه , راجل كبير بقى وخبره , المهم انه رمى الكلمتين الى عنده ومشى .
بعد كده خرجنا من المدرج وقولنا نروح نشوف الكارنيهات خلصت ولا لأ , هما وقفوا بره وانا الى دخلت أسال فلقيت طابور طويل اوى كالعاده , خرجت قولتلهم مش هنقدر ندخل .قلنا خلاص نلف شويه فى المكان عشان نستكشفه ونبقى نرجع كمان شويه قبل ما نمشى تكون الزحمه خفت شويه .لفينا كتير وجالنا صداع من الشمس ورجعنا تانى عند الزحمه ودخلت برضه لقيت الطابور متحركش خرجت قولتلهم زحمه برضه مش هنقدر ندخل احنا نمشى بقى انهارده ونبقى نيجى وقت تانى . قالوا احنا ندخل ناخد دورنا فى الطابور أحسن ,دخلنا لقينا الزحمه مش عالكارنيهات اصلا وشباك الكارنيهات فاضى خالص ههههههههه -كانوا هياكلونى ساعتها-المهم ان هما اخدوا كارنيهاتهم وانا الست قالتلى لسه مخلصش مع انى مقدمه قبليهم اصلا , مش قولتلكوا انها رخمه ومستقصدانى من يوم التقديم بس انا مش هاسيبها ليها يوم اخد منها حقى .بس خلصنا الى احنا عايزينه وكل واحد اخد طريقه
وانا ماشيه قابلت واحده قعدت تسلم عليا ربع ساعه وتحضن بقى وازيك وعامله ايه وأنا اصلا كنت عايزه أنام ونفسى أسالها انتى مين اصلا؟الاخر خالص افتكرت انها كانت معايا فى درس فى تانيه ثانوى وطلعت معايا كمان فى الكليه وقابلت البنات الى كنت جايه معاهم وانا مروحه مع انى مشفتهمش طول اليوم وركبنا ووصلت البيت وجريت عالسرير عشان كنت هاموت وانام ونمت على طول قبل ما اوصل للسرير ومش رايحه لا بكره ولا بعده .وده كان اول يوم ليا فى الجامعه عقبال ما احكيلكوا كده على يوم تخرجى كماااان 5 سنين باذن الله

السبت، 20 سبتمبر، 2008

بكره اول يوم ليا فى الجامعه يا جدعان

دلوقتى بكتبلكوا ليله دخولى الجامعه - يعنى بكره اول يومى لسه -مش عارفه اوصفلكوا انا حاسه بايه بالظبط
يعنى شويه قلقانه على فرحانه على مش عارفه اعمل ايه بالظبط وواحده صاحبتى كل شويه تسأ لنى هتاخدى ايه معاكى بكره ؟؟
أقولها ايه دى مش عارفه ؟ هاخد السندوتشات مثلا والمصروف اكييد مممم وايه تانى هاخد قلم مثلا وهاخد اسكتش .... مش عارفه اخد البالطو ولا ايه ....انا لو عليا نفسى البسه وانا نازله ونفسى اخده مع انى واثقه انى مش هاستعمله قبل العيد ....بس هيقولوا عليا هبله وماله بقى مهم هيكتشفوا ده بعد كده لوحدهم عاتى يعنى وهروح الساعه كام بقى .. انا بقول اصلى الفجر وانزل عشان انا عارفه انى هتوه هناك كتير يبقى اتوه بروقان بقى خاصه ان الكليه كبييييييره و المدرسه متجييش فيها حاجه وخاصه برضه انهم لمينا احنا واسنان وعلوم فى مكان واحد عشان نتوه ونخبط فى بعض براحتنا . ربنا يستر بس ومروحش احضر مع بتوع اسنان ولا العلوم . يارب وفقنى فى الكليه دى الى دخلتها بكامل قواى العقليه وباختيارى التام ومتشمتش حد فيا خاصه ان عندى فى البيت كل شويه يرموا كلام من نوعيه اما نشوف هتعملى ايه -على اساس انى صمصمت على صيدله و رفضت الطب بتاعتهم دى -اكتر حاجه قلقانى من الكليه دى حكايه الضفاضع والكائنات و الحشرات الزاحفه التانيه الى هنشرحها مش فاهمه احنا مالنا اصلا . انا مش متخيله نفسى اصلا وانا بشرح ضفدعه ....عاااااااااااااا.....انا ممكن اخبطها فى نافخوها عشان يغمى عليها وبعد كده ابقى اشرحها براحتى بقى . بس برضه اهو ارحم من جثث البنى ادمين .
اول ما ارجع بكره من الكليه هحكيلكوا عملت ايه
سلملم مؤقتا بقى

انتوا معايا ولا مع الناس التانيين ؟؟؟

انهارده يا جماعه قمت من أحلاها نومه على تليفون من واحده صاحبتى وفضلنا نلك كالعاده لحد ما اتكلمنا فى موضوع خطير خطير يعنى واختلفنا فيه بخطوره وهى فضلت مصمصمه على رأيها وانا حاولت ابعدها عن الخطر بس معرفتش متيجو احكيلكوا على الخطر ده ...ااا ..قصدى الحوار ده ونشوف مين الى معاه حق فى الكلام
هى : الو ازيك عامله ايه ؟
أنا: تمام الحمد لله ؟

هى :شوفتى يا بنتى واحده صاحبتى جايبه مجموع طب وهتروح علاج طبيعى شوفى الهبل ؟

أنا : معلش مش مركزه هو فين الهبل فى كده ؟؟

هى :ازاى يعنى تبقى جايبه مجموع كليه قمه وتروح كليه تانيه ؟

أنا :مش هى اساسا كانت بتذاكر عشان تروحها يبقى لما تجيب مجموع كبير تروح كليه تانيه ليه يعنى ده يبقى هو ده الهبل على أصله ؟؟

هى:يا بنتى تسيب كليه قمه وتروح كليه اى كلام؟

أنا :اولا انا اساسا مش مقتنعه ان فيه حاجه اسمها كليه قمه.يعنى ايه قمه؟عشان بتاخد اعلى مجموع يعنى؟ طيب وايه يعنى ؟هى بتاخد مجموع عالى عشان تتحكم فى العدد الى داخلها مش اكتر ؟

هى:يعنى هى مش تعبت فى الدرجات دى والمفروض تستغلها ؟

أنا:طيب مهى تستغلها فى الكليه الى نفسها فيها ايه الى يخليها تروح كليه اقل ولا هى لازم كانت متتعبش نفسها عشان الكليه الى داخلاها بتاخدمجموع قليل

هى:لا تذاكر برضه

أنا :وبعدين لما تجيب مجموع عالى تروح كليه اعلى من الى بتذاكر عشانه والا تبقى هبله مش كده ؟

هى :اه تبقى هبله

أنا : يا سلام . وافرضى بقى طلعت دكتوره فاشله فى مجالها استفادناايه بقى احنا ولا هى استفادت ايه غير وجع القلب عالفاضى .انتى عارفه دفعه كليه الطب فى كل جامعه بتطلع كام دكتور فى السنه ؟كتير مش كده ؟

هى :اه

أنا :مين فيهم دكتور شاطر ناجح فة مجاله يتعد وا على الصوابع

أنا :طيب ماهى لو دخلت عاج طبيعى ونجحت فيها تبقى حاجه كويسه ولا ايه ؟؟

هى :مش عارفه بقى بس انا مقتنعه ان فى حاجه اسمها كليا قمه ميختلفش عليها اتنين

أنا :طيب حاجه تانيه

أنا :معنى كده ان اى حد فى ادبى المفروض ميتعبش نفسه وميذاكرعشان الكليات بتاخد مجموع قليل وبلاش بقىالشاطر يجيب 97 و 98 خساره بقى كان دخل علمى احسن مش كده ؟؟

هى : اه كان دخل علمى احسن

أنا : يا سلام . وانتى مين قالك انه بيحب الكيميا الفيزيا مش يمكن بيحب التاريخ ولو كان اخد كيميا كان سقط فيها وبعدين هو لا زم البلد كلها تبقى دكاتره ايه مفيش محاميين ومحاسبين وكل ده ؟

هى :.............

أنا : انتىبتفكرى زى جدتى وجدى وبرضه مقتنعتيش بكلامى

هى : بصراحه مقتنعش . وبعدين اختلاف الرأى لا يفسد للود قضيه

أنا : لا هيفسد بقى

هى : خلاص غيرى الموضوع

أنا : ما علينا . انتى صحتينى من النوم وخلاص

هى : طب روحى نامى بقى

أنا : أفيد برضه سلام

هى : سلاااااام




الخميس، 18 سبتمبر، 2008

يوم ان وقفت امام البرجكتور !!

مغامراتى ايام ثانوى متنتهيش طبعا كنت باخد دروس فى كله وكنت اكتر واحده بتنزل الشارع كنت بحس ان سواقين المواصلات بقوا عارفنى اصلا.يااااه كانت ايام الحمد لله انها عدت على خير.بس لما بقعد افتكر الى كان بيجرالى بضحك اوى مع انه فى وقته كان بيضايقنى اوى اكتر درس كان بيضايقنى الفيزيا. المستر كان صوته وااااااااااااااطى اوى والتكييف شغال بقى واحيانا كان بيضلم القاعه علشان نتفرج عالبرجكتور على اساس اننا نفهم اكتر يعنى بس ولا كان ليه اى اثر غير اننا كنا بنااااااااااام لحد ما يخلص. مره من المرات كنا اول السنه ومكناش فاهمين حاجه منه المهم هو كان مشغلنا البرجكتور وعمال يفرجنا على حركه الجزيئات فى الموجات يعنى وهو مصمم انها بتمشى فى اتجاه معين بس انا عن نفسى مش شايفه كده خالص . كنت شايفها ماشيه الاتجاه التانى سألت صاحبتى الى جانبى :يبنتى هى دى ماشيه ازاى ؟؟؟قالتلى : كده ( وشاورت فى اتجاه تانى خالص) واضح انها كانت فاهمه زياده عن اللزوم المهم انا قعدت اجيبها شمال اجيبها لمين طيب لفوق لتحت مش مقتنعااااااااااااه مليش دعوه بقى دى بالذات من المنهج كله عايزه افهمها المهم خدتنى الشجاعه اوى مش عارفه ازاى وقلت :مستر؟ بصلى كده مبتسما وهو طبعا مستغرب ان فيه حد يساله على حاجه لانه اصلا عارف ان محدش فاهم حاجه و رامى طوبتنا وقالى :ايوه , قلتله : انا مش شايفه انها ماشيه فى الاتجاه الى حضرتك بتقول عليه (وسااااااد الصمت تا تا تا)قالى مبتسما برضه مفيش فايده: ازاى امال شايفاها ماشيه ازاى ؟انا بقى قعدت اشاورله على اتجاهات غريبه كده وهو مبتسم طبعا ومستعد للسخريه كالعاده وانا اقول فى سرى (انا الى جبت ده كله لنفسى)المهم قام قايلى : تعالى ,قلتله: لا خلاص مش مشكله يعنى قال: يبنتى تعالى انتى مكسوفه ولا ايه ؟ وطبعا اصحابى قاعدين جنبى اما صدقوا بقى حاجه تفرفشهم شويه -قمه النداله-قالولى اطلعى اطلعى يلا ,المهم طلعت ادام البرجتكور وقالى :شاورى لى بقى على جزىء معين وورينى اتجاهه انا قلت فى سرى : ايه الراجل ده بيستهبل عليا اكيد اشاورله على ايه ان شاء الله هو مش شايفهم بيجروا ازاى دى اكييد مكيده مدبره ضدى عشان انا اتجرأت وعارضته .حاولت الملم كرامتى الى على وشك انها تبعتر وتبقى فرجه وحاولت اشاور وافهمه وهو عامل زى ما بيكون بيكلم مخلوق فضائى بيضحك بس وبيبين انه كلام غير منطقى مع ان كان فيه بنات موافقين على كلامى بس وشايفين زيى بس اختفوا ساعتها ,طبعا كله صحى وفوق وقعد يضحك والمستر يضحك وانا مش عارفه اعمل ايه ياما اضحك ياما اعيط فقلت اضحك اشيك ودخلت طبعا وحوالى 100 بنى ادم بيضحك عليا واصحابى الاندال بيضحكوا اااااااه لن انسى لكم هذا الموقف ابدا كده برضه متدافعوش عنى ؟؟المهم روحت بسرعة اليوم ده وتانى يوم بقى روحت درس العربى وهناك قابلت واحده معرفهاش كده كانت بتسالنى على حاجه وطلعت بتاخد عند نفس مدرس الفيزيا قلتلها وانا كمان باخد عنده قالتلى : مانا عارفه شوفتك امبارح لما كنتى ادام البرجكتورانا قولت فى سرى : ياااااااى الفضايح ودى طلعتلى منين دى كمان ؟.رديت عليها :اه المستر مكنش فاهم اصلا قالتلى : اه ده الطبيعى بتاعه قلت فى سرى : كويس طلعت متعاطفه معايا قلت :بس كويس انها كانت جروب بنات بس ,قالتلى : لا مهو كان فى صف ولاد ورا قلت فى سرى : يااااااااااااا حلاوه يادى الفضايح!!!

اخيرااا بقى عندى مدونه

اخييرا وبعد عده محاولات باءت جميعها بالفشل بقى عندى مدونه . يعنى بقى عندى نافذه جديده, اقدر اشوف الناس من خلالها ويشوفونى منها ,كل ما اقول لحد انا عايزه مدونه مليش دعوه . يقولى وماله اعملى . بس هتكتبى في ايه ؟؟ سؤال يفرض نفسه بغتاته. هكتب الى اكتبه انا حره , هكتبلكوا عن نفسى , مغامراتى , مواقف بتقابلنى , هاخد رأيكم , هعرض عليكم ارائى من واقع خبرتى الطويله فى الحياه (18 سنه خبره امال ايه ) براحتى بقى ده ايه ده ؟؟ تابعونى بقى وتعليقات بقى مش هوصيكوا والااااااااا.متخافوش هعمل ايه يعنى ؟؟