وأنا قاعده ادام التلفزيون مستنيه فاصل المسلسل خلال فقره الاعلانات جه الاعلان المستفز بمعدل مرتين بين كل اعلان , هتقولولى طويب ما كل الاعلانات مستفزه جبتى ايه من عندك ؟اقولوكم لا , ده كل الاعلانات كوم والاعلان ده بالذات كوم تانى خالص.
الست فشخره وجوزها محسن زفت منظر واقفين يطلبوا سحور يكفى مصر بحالها , هما بصراحه طيبين شويتين يعنى بيبدأوا بالساقع زى الخروب والتمر الهندى وقمر الدين ويدخلوا بعد كده فى التقيل زى الحمام المحشى والخروف والديك الرومى والفول .....باللحمه المفرومه واوعوا تنسوا سرفيس المحشى أحسن الصيام ميتقبلش ولا حاجه . وبعدين الحلو بقى أمال ايه أم على وبلح الشام والبسبوسه اللى نصها ساده و....ونصها بالمكسرات ولسسسه استنوا البطيخ بيهضم والبنانا سبليت بتمسك-اللهى يمسك فيهم حريقه والمطافى تكون اجازه يارب-
وال ايه بقى اللى يولع الاسعار ويخرب البيوت هى الفشخره والمنظره يا حبوب -حبك برص يا شيخ
بقى هو ده سبب غلاء الاسعار؟هما شايفينا هبل ولا ايه ؟يعنى ايه علاقه ان ناس بتأكل اكل المنطقه كلها بغلاء البصل والثوم ؟عايزين يفهمونا ان اشعب المصرى كله بيأكل بالمنظر ده ؟؟دى الناس مش لاقيه رغيف العيش ابو شلن.أمال مين بقى اللى بيموتوا بعض فى طابور العيش .يكونش بتوع الصومال جايين ياخدوا عيش من عندنا ؟وأما الناس مرتاحه كده ليه مبيأكلوش جاتوه وبسكويت هو لازم عيش يعنى؟؟
طويب مش هما مش بيأكلوا غير لحمه وديوك رومى ؟؟كيلو العدس ب 12 جنيه لييييييه ؟؟أظن ده بقى مش بياكلوه.
ده لو واحد مش من هنا وشاف الاعلان دههيقول علينا شعب مفترى وعينه فارغه وعايش فى النعيم .و مش بعيد يفتكر ان بابا حسنى بيعدى علينا وقت السحور عشان يطمن ان كل واحد معاه الديك بتاعه وسرفيس المحشى والبنانا سبليت عشلن تمسك .
واللى يغيظ أكتر وأكتر بقى , أنهم بيرموا أطباق الاكل وهى مليانه أصلا. ده احنا لو افترضنا يعنى وده من عاشر المستحيلات ان فيه ناس بالطفاسه دى مش هيهون عليه يرمى الاكل ده . يأما هيشيله مثلا ياما هيديه للبواب , ده لو اداه لقطه ...شوفوا قطه..هيكسب فيها ثواب.
هو فيه كده ؟ للدرجه دى الاستخفاف بعقول الناس ؟
ناس مستفزه
هناك 20 تعليقًا:
امممممممممممممممم عمرى ما شفت الاعلان دة
طالب ثانوى
معقوله ؟؟
استناه عالاولى او اى قناه مصريه
ومش هتستنى كتير يعنى بيجى بسرعه اوى
انا عمرى ما شفتة والله شوفت اعلانات شعبولا واعلانات الضرايب بس الاعلان دة ماشوفتوش خالص وكل المدونين بتتكلم علية حاجة غريبة يمكن تلفزيوننا مابيجيبهوش
بقولك عندك ايميل ياهو للشات
العزيزة رودي ...
بوست في الجون بصراحة شديدة وبدون أي مجاملات ...
بالفعل الإعلان استفزني بشدة وأنا أشارك أخي الإفطار أمام التليفزيون ...
لكن كما يقولون (( المشاهد ديمقراطي ))
وبالفعل قبل أن يكتمل الإعلان كنت قد بحثت عن قناة أخرى ...
الموضوع مش ناقص حرقة دم ...
بجد في إعلانات ساذجة كتير اللي بيعنونوها ب (( احسبها صح تعيشها صح )) ...
ومستفزة بشدة ..
فعلا على رأيك يا هنيدي
(( جتكو البلاوي مليتو البلد ))
تقبلي مني فائق الاحترام والتقدير يا هانم ...
في انتظار جديدك
اكيد الشعب هو الى مغلى الحاجه و مبوظ مصر صدقينى مدام الحكومه مش بتتغير لازم الشعب يتغير
متاخديش فى بالك
تحياتى
والله معاكى حق فعلا
حاجه مستفزة وتقرف
فاكرينا جايين من الهند
ربنا يلطف بينا
وما خفي كان اعظم
ومعاكي حق فعلا وعلى فكرة هما بيتفننوا في استفزاز الشعب المصري باي طريقة كانت
فعلا لو حد غريب مش من مصر وشاف الاعلان ده يقول على الشعب المصري طفس
وميملاش عينه الا التراب
-----------------------------------
بس باقولك ايه يا رودي هانم
مين اللي دفع في المواصلات وانتم راجعين
وبعدين ايه المشكلة لما انت تدفعي وانتو رايحيين ووانتو راجعين
هههههههههههههههههههههههههههههه
ehab
الاعلان يستفز اى بنى ادم عاقل وواعى لما يدور حوله
مهو مش معقول واحد يبقى واقف من الفجر عشان يجيب رغيف عيش ويجوا هما بليل يقولوا له مش لازم سرفيس المحشى يعنى
هما فعلا قايمين بحمله اعلانيه بتصب كل الاخطاء على المواطن وانه هو السبب فى تأخر البلد وتخلفها
وهما يا حرام ملايكه بيعملوا كل حاجه والمواطن هو اللى طفس
ربنا يلطف بينا
تحياتى
بيكر(baker)
ازاى الشعب هو اللى مغلى الحاجه؟؟
منكرش ان فيه تصرفات غلط كتير الناس بتعملها
بس ده مش معناه انهم هما اللى بيعملوا كل حاجه غلط
ومفيش حد عاقل يصدق ان المواطن المصرى البسيط مش قادر يشترى أكل لبيته لانه كل يوم بيتسحر بخروف
ولا ايه ؟؟
تحياتى
blue-wave
اه بيستفزونا ويضحكوا عالناس والمفروض اننا نصدق
عقلهم على قدهم والله
شرفتنى بالزياره
مصرى بالغربه
هى ناقصه استفزاز؟؟ ما كفايه اللى الناس شايفاه
ربنا يرحمنا ويلطف بينا
بت يارودي انتي بتتجني عليهم ليه
اه هو الشرا اللي بيغلي الاسعار
لالالا مكنتش فاكراكي كده
يابت ياهبله افهمي
الشعب المصري مش اللي انتي فاكراه
الشعب المصري هما بتوع الديوك الرومي يوميا
اما بتوع العدس والعيش دول مش شعب المصري دول اللاجئين وسمعيني احلي سلام
فهمتي ياقطقوطي دول كل همهم يحطوا في بطنهم وبس
يااااارب ارحمنا وارحم البلد دي من القرف ده
تحياتي للقمر وميرسي لهديتم الجميله
اممممممممممممممممممممموه
اه مش تزعلي اني قلت هبله انا بهزر والله
كياره
فهمت يا باشا
يعنى ال80 مليون لاجئين
اه كده تبقى مفهمومه
مهو مش معقول الديوك هتكفى كل دول فهما بيحصروها فى عدد معين والباقى كفايه عليه يقف فى طابور العيش
-----------------
ازعل من مين بس دانتى حبيبتى يا قمر
بت
احفظي الاكواد بتاعت الاون لاين واللينكات بتاعت المدونات والصور اللي حطاها
وروحي علي اختيار القوالب
واختاري قالب جديد هيظبطلك المدونه تاني وبعد كده
ضيفي الاكواد اللي انتي حفظتيها قبل كده
اوكشش ووافيني باخر الاخبار
اولا تحياتى و كل سنه وانتى طيبه
انا اصلا بتخنق من الاعلانات كلها ماعدا اعلانات كريم عبد العزيز
دمها خفيف
و غير كده كمان المسلسلات كلها زى بعضها و رخمهو دمها تقيل
من اول الدالى اللى حاسس ان الحلقه الاولى زى التانيه زى لتالته
لحد مسلسل بتاع تيسير فهمى حاسس انى بتفرج ع فيلم كارتون عايشه دور انها ف امريكا بقى
انا متهيألى ان كل واحد بعد كده يخبى التلفزيون ف رمضان بدل ما مخه يهييس
شبــ اون لاين ـــاب
كل حاجه بقت مستفزه
هو التلفزيون المفروض يترمى خالص سواء فى رمضان او غير رمضان
تحياتى
كل سنه وانتى طيبه
عيد سعيد عليكى وعلينا
romansy
كل عيد وحضرتك طيب والى الله اقرب
فى رعايه الله
هبل فى الجبل
كبرى دماغك
كل سنة وانتى طيبة
وعيدك سعيد
shasha
على رأيك
كل سنه وانتى طيبه يا جميل
إرسال تعليق