انهارده يا جماعه قمت من أحلاها نومه على تليفون من واحده صاحبتى وفضلنا نلك كالعاده لحد ما اتكلمنا فى موضوع خطير خطير يعنى واختلفنا فيه بخطوره وهى فضلت مصمصمه على رأيها وانا حاولت ابعدها عن الخطر بس معرفتش متيجو احكيلكوا على الخطر ده ...ااا ..قصدى الحوار ده ونشوف مين الى معاه حق فى الكلام
هى : الو ازيك عامله ايه ؟
هى : الو ازيك عامله ايه ؟
أنا: تمام الحمد لله ؟هى :شوفتى يا بنتى واحده صاحبتى جايبه مجموع طب وهتروح علاج طبيعى شوفى الهبل ؟
أنا : معلش مش مركزه هو فين الهبل فى كده ؟؟
هى :ازاى يعنى تبقى جايبه مجموع كليه قمه وتروح كليه تانيه ؟
أنا :مش هى اساسا كانت بتذاكر عشان تروحها يبقى لما تجيب مجموع كبير تروح كليه تانيه ليه يعنى ده يبقى هو ده الهبل على أصله ؟؟
هى:يا بنتى تسيب كليه قمه وتروح كليه اى كلام؟
أنا :اولا انا اساسا مش مقتنعه ان فيه حاجه اسمها كليه قمه.يعنى ايه قمه؟عشان بتاخد اعلى مجموع يعنى؟ طيب وايه يعنى ؟هى بتاخد مجموع عالى عشان تتحكم فى العدد الى داخلها مش اكتر ؟
هى:يعنى هى مش تعبت فى الدرجات دى والمفروض تستغلها ؟
أنا:طيب مهى تستغلها فى الكليه الى نفسها فيها ايه الى يخليها تروح كليه اقل ولا هى لازم كانت متتعبش نفسها عشان الكليه الى داخلاها بتاخدمجموع قليل
هى:لا تذاكر برضه
أنا :وبعدين لما تجيب مجموع عالى تروح كليه اعلى من الى بتذاكر عشانه والا تبقى هبله مش كده ؟
هى :اه تبقى هبله
أنا : يا سلام . وافرضى بقى طلعت دكتوره فاشله فى مجالها استفادناايه بقى احنا ولا هى استفادت ايه غير وجع القلب عالفاضى .انتى عارفه دفعه كليه الطب فى كل جامعه بتطلع كام دكتور فى السنه ؟كتير مش كده ؟
هى :اه
أنا :مين فيهم دكتور شاطر ناجح فة مجاله يتعد وا على الصوابع
أنا :طيب ماهى لو دخلت عاج طبيعى ونجحت فيها تبقى حاجه كويسه ولا ايه ؟؟
هى :مش عارفه بقى بس انا مقتنعه ان فى حاجه اسمها كليا قمه ميختلفش عليها اتنين
أنا :طيب حاجه تانيه
أنا :معنى كده ان اى حد فى ادبى المفروض ميتعبش نفسه وميذاكرعشان الكليات بتاخد مجموع قليل وبلاش بقىالشاطر يجيب 97 و 98 خساره بقى كان دخل علمى احسن مش كده ؟؟
هى : اه كان دخل علمى احسن
أنا : يا سلام . وانتى مين قالك انه بيحب الكيميا الفيزيا مش يمكن بيحب التاريخ ولو كان اخد كيميا كان سقط فيها وبعدين هو لا زم البلد كلها تبقى دكاتره ايه مفيش محاميين ومحاسبين وكل ده ؟
هى :.............
أنا : انتىبتفكرى زى جدتى وجدى وبرضه مقتنعتيش بكلامى
هى : بصراحه مقتنعش . وبعدين اختلاف الرأى لا يفسد للود قضيه
أنا : لا هيفسد بقى
هى : خلاص غيرى الموضوع
أنا : ما علينا . انتى صحتينى من النوم وخلاص
هى : طب روحى نامى بقى
أنا : أفيد برضه سلام
هى : سلاااااام
هناك 12 تعليقًا:
احم
الكلام ليكي يا جارة
قصدي يا لماضة
ولا كأني سمعت حاجه
بلاش رغي كتير في التليفونات يابت منك ليها
ده صوت ماما اكيد
ذاكروا كلمتين ينفعوكوا
كلام تيتا
مبروك المدونة الجديده يا رودي
الكلام بتاعك يارودى انا مقتنع بية جدا تعالى حولى تفهمى الناس اللى هنا ومبروك المدونة يارودى هانم وصحيح اية فايدة تاكيد الكلمة الرخم دة
لماضه
هههههههههههه عثل يا خواتى
اسمعى الكلام وبلاش رغى فى التلفونات عشان حتى الكلام بقى غالى دلوقتى وطبعا انتى مش دافعه حاجه
الله يبارك فيكى يا قمر ويارب كده دايما منوارنى
طالب ثانوى
الله يبارك فيك و كويس انك مقتنع بالكلام ده جدا بس الاهم من ده انك تطبقه لما تيجى تدخل الكليه يعنى تدخل الى انت حابه حتى ولو جايب مجموع اكبر منه عادى يعنى
منور دايما فى مدونتى
انت لية حطة تاكيد الكلام دة شلية ارجوكى
طالب ثانوى
اها تاكيد الكلمه
شلته خلاص
وانا عماله اقول ايه تاكيد الكلام ده الى بيقول عليه
عشان تعلقوا كتير بقى ملكوش حجه
ههههههههههههههههههههههه
رجعتيني بزاكرتي لحوالي 8 سنين ورا وانا وبابا وماما بنتناقش ادخل علمي ولا ادبي وبعدها الكليه
انتي صح بصي اهم حاجه نكون حابين دراستنا دراسه الجامعه مش حفظ كلمتين ولا منهج محصور في كام نقطه زي الثانوي لالالا انتي بيبقي المجال مفتوح
انتي اللي بتحددي منهجكك وبشطارتك انتي تبرزي دورك
كتير تفوقوا في الثانويه العامه وجم في الكليه ابيـــــــــــــــض
اخويا مش فاكره كان جايب فوق التسعين
اتخرج بايه بمقبول
لان فيه اختلاف كبير جدا جدا بين الثانوي وبين الجامعه وبين الدراسات العليا وبين الحياه العمليه
تحياتي ليكي يارودي :)
كياره
منورانى لدرجه انى هشيل لمب البيت كله ومش هستعملها بقى
انا عن نفسى اتعرضت للموقف ده لما كانوا عايزينى ادخل طب وانا عايزه صيدله بس انا صمصمت على رايى ودخلت الى انا عايزاه
تحياتى
شوفي يا هانم
قصدي رودي هانم
كل واحد له رايه وتفكيره
ممكن واحد بيفكر يجيب مجموع كبير ويدخل اعلى الكليات وخلاص
ومبيفكرش هوه بيدخل الكلية ديه ليه
هوه داخلها بس عشان من اعلى الكليات
وفيه ناس تانية بتفكر زيك كده ان الشخص يدخل الكلية اللي هوه بيحبها ويحب دراستها ويحب مهنتها بعد التخرج
وانا مع التفكير التاني ده وعشان كده دخلت هندسة وكنت محددها من وانا في اعدادي لسه
ومش محدد هندسة وبس كده لا كنت محدد هندسة معمارية كمان
والحمد لله ربنا وفقني فيها
وموضوع جميل فعلا اللي انت عرضتيه
كعادتك ,,
مواضيعك متميزة وفي نقاط حساسه ومهمة ...
وشقية في نفس الوقت ...
عموما أنا مع رغبة الإنسان حتى لو كان إنه يدخل معهد لاسلكي .. مادام هو بيحب الدراسه دي يبقى مش مهم المجموع بتاعه ...
وبعدين يا ستي انتي ايه اللي مزعلك .. هو انت كان نفسك في حاجه غير كليتك دي !! وللا هو رغي ببلاش :))))
تحياتي يا هانم
مصرى بالغربه
فيه ناس بتحب تدخل كليه قمه من باب المنظره وكده بس ميعرفوش انهم كده بيبصوا تحت اقدامهم ومش بيبصوا للمستقبل
مرورك هو الاجمل
ehab
فعلا رغبه الانسان هى المحرك الرئيسى لتحديد مستقبله
وأنا الحمدلله كنت عايزه صيدله من الاول وصمصمت عليها على الرغم من المحاولات المستميته لتغيير مسارى
وبعدين هو الرغى بفلوس يعنى
تحياتى يا باشا
إرسال تعليق