السبت، 20 سبتمبر 2008

بكره اول يوم ليا فى الجامعه يا جدعان

دلوقتى بكتبلكوا ليله دخولى الجامعه - يعنى بكره اول يومى لسه -مش عارفه اوصفلكوا انا حاسه بايه بالظبط
يعنى شويه قلقانه على فرحانه على مش عارفه اعمل ايه بالظبط وواحده صاحبتى كل شويه تسأ لنى هتاخدى ايه معاكى بكره ؟؟
أقولها ايه دى مش عارفه ؟ هاخد السندوتشات مثلا والمصروف اكييد مممم وايه تانى هاخد قلم مثلا وهاخد اسكتش .... مش عارفه اخد البالطو ولا ايه ....انا لو عليا نفسى البسه وانا نازله ونفسى اخده مع انى واثقه انى مش هاستعمله قبل العيد ....بس هيقولوا عليا هبله وماله بقى مهم هيكتشفوا ده بعد كده لوحدهم عاتى يعنى وهروح الساعه كام بقى .. انا بقول اصلى الفجر وانزل عشان انا عارفه انى هتوه هناك كتير يبقى اتوه بروقان بقى خاصه ان الكليه كبييييييره و المدرسه متجييش فيها حاجه وخاصه برضه انهم لمينا احنا واسنان وعلوم فى مكان واحد عشان نتوه ونخبط فى بعض براحتنا . ربنا يستر بس ومروحش احضر مع بتوع اسنان ولا العلوم . يارب وفقنى فى الكليه دى الى دخلتها بكامل قواى العقليه وباختيارى التام ومتشمتش حد فيا خاصه ان عندى فى البيت كل شويه يرموا كلام من نوعيه اما نشوف هتعملى ايه -على اساس انى صمصمت على صيدله و رفضت الطب بتاعتهم دى -اكتر حاجه قلقانى من الكليه دى حكايه الضفاضع والكائنات و الحشرات الزاحفه التانيه الى هنشرحها مش فاهمه احنا مالنا اصلا . انا مش متخيله نفسى اصلا وانا بشرح ضفدعه ....عاااااااااااااا.....انا ممكن اخبطها فى نافخوها عشان يغمى عليها وبعد كده ابقى اشرحها براحتى بقى . بس برضه اهو ارحم من جثث البنى ادمين .
اول ما ارجع بكره من الكليه هحكيلكوا عملت ايه
سلملم مؤقتا بقى

هناك 21 تعليقًا:

فاروق عادل يقول...

انتم السابقون ونحن اللاحقون يارودى وعلى فكرة المفروض تجاوبى على التاج علشان انتى علقتى عندى

كـــيــــــــارا يقول...

ان شاء الله كله خير ياقمر ومش تقلقي وتخافي

مبرروووووووووووووووووووووووك ياقمر وان شاء الله عاوزينك تجيبي تقديرات

والا هزعل منك خالص

ألـــــــوان الحيــــــــاة يقول...

طالب ثانوى

عقبالك كده اما تدخل الكليه الى نفسك فيها

احم احم

بالنوسبه للتاج
دى تدبيسه بقى ولا ايه
عموما هشوف
اصلى مبحبش التاجات

ألـــــــوان الحيــــــــاة يقول...

كيارا

مقدرش على زعلك خالص

ادعيلى بس انتى ربنا يوفقنى فى الكليه دى ويرزقنى بضفدعه مستكينه ده اتشطر عليها

منوره يا جميل

mohamed يقول...

مبروك وبالتوفيق
ورينا يوفقك
ويجعل فرحتك دائمه
ويحفظك من كل سوء

مصري بالغربة يقول...

ما تخافيش ان شاء الله الضفدعة اللي حتكون من

حظك ونصيبك تطلع ضفدعو متشرحة قبل كده

3 مرات عشان يبقى الموضوع سهل عليكي

ههههههههههههههههههههههههههههه

مع تحياتي

فاروق عادل يقول...

براحتك طبعا لكن التاج تحت امرك

انا مش عاوز اخش كلية اساسا انا عاوزاطلع صحفى والواحد ممك ن يبقى صحفى من غير اعلام انا ضاحك عليهم وبقولهم انى عاوز اطلع مهندس مهندس اية انا حمار رياضيات

فاروق عادل يقول...

انتى فين يارودى الساعة بقت خمسة ونص انتوا بتخلصوا امتى

Ehab يقول...

اها ...

الف مبروك يا دكتورة وإن شاء الله يكون يومك الأول في الكلية سعيد ولذيذ ومبشر ....

عموما انتي لسه يا ما هتشوفي حاجات كتير لدرجة ان تشريح الضفادع هيبقى بالنسبه لك روتين ممل !

كله في أوله غريب ,, وصعب ,,,

لك فائق احترامي ...

وكل عام وانت بألف خير :))

sa يقول...

يا ترى عملتى ايه ف اول يوم
توهتى ولا لاء :d

ربنا معاكى وتكون ايام جميلة عليكى :)

خالد كامل يقول...

فكرتينى بأول يوم ليا فى المعهد
انا فى معهد فنى تجارى
و كل أصحابى فى حقوق
رحت منفض للمعهد بتاعى .. مروحتش أسأل على المصاريف حتى .. ولا شوفت المعهد شكله ايه من برة
و رحت قعدت مع اصحابى فى حقوق
D:
عامة .. بالتوفيق ان شاء الله

فاروق عادل يقول...

رودى انتى تايهة والا اية

mido g يقول...

انا فين يا أنسة؟

أكيد ظروف قهرية
ربنا معاك

mido g يقول...

* انت

ojg يقول...

ألف مبروك ع الصيدلة
ربنا يوفقك ان شاء الله
وبالنسبة للضفاضيع
بكره تعملوها في الكليه شوربة
:))
صاحبتي برضو كانت بتقرف وبتاع
بس ربنا فتح عليها وبقت حريفه ضفادع وارانب وحمام واي حاجه بتقع عينها عليها عشان كده قطعت علاقتي بيها :))
وعندي صاحبتي تانيه بقى طب بيطري
بيدرسوا الحصااااااااااااان
يعني ربنا معاهم
اما بقى موضوع ضرب الضفدعه على الترابيزة ده حقيقي
انا شفت ناس كتير بيشرحوا الضفدعه كده عشان في ضفادع مش بيتخدروا بالكحول وبيفضلوا فايقين
:))
بس معلومة صغيرة
في دم بيطرطش مع الطريقه دي
ماتبقيش تخبطي جامد

بهزر بهزر ماتضربيش

مستنية تقريرك المفصل عن كليتك الجميلة يا قمر

romansy يقول...

مبروك عليكى دخولك الجامعه
يلا يارب كده نشوفك دكتوره قد الدنيا كلها
ومتخفيش من حاجه
الخوف دا بدايه النجاح

فاروق عادل يقول...

رودى شرحت ضفدعة فجالها صدمة عصبية وهى الان تحت الرعاية الطبية

ألـــــــوان الحيــــــــاة يقول...

mohamed
شكرا وبالتوفيق ليك باذن الله

مصري بالغربة

هههههه
ربنا يستجيب دعاءك ياااارب

تحياتى

طالب ثانوى

مش عاوز تدخل كليه ؟
طويب وليه وجع الدماغ والفيزيا والرياضه

لا هتدخل كليه وقوم ذاكر بقى

ألـــــــوان الحيــــــــاة يقول...

Ehab

الله يبارك فيك
معقوله هيبقى روتين ؟ ياريت بجد الضفدعه كده تبقى صاحبتى وعادى بقى

تحياتى

mona
ادينى حكيت اهو روحى شوفى بقى
عقبالك يا عسل لما تروحى الكليه اللى انتى عايزاها

مهيج الجماهير

رحت قعدت معاهم ؟؟؟
مكنش فيه اى تشوق ؟

ربنا يوفقك باذن الله

ألـــــــوان الحيــــــــاة يقول...

mido g

عرفت منين انها ظروف قهريه ؟؟
:)

ojg

دم بيطرطش ؟ أنا مكنتش عامله حساب الدم ده خاااالص

عالعموم هبقى اجيب واحده بارده معندهاش دم

تحياتى

ألـــــــوان الحيــــــــاة يقول...

romansy

الله يبارك فيك

طالب ثانوى

رعايه طبيه مين ؟ ربنا يكون فى عون الضفدعه هى اللى هتخاف من باذن الله

زى ما قولت ظروف قهريه وعدت اخيرااا الحمد لله