الأحد، 8 يوليو، 2012

أنا جيت بقى وكده :)

وحشتنى المدونة دى أوى

ووحشنى اما كنت باجى اكتب أى كلام حتى لو مش مهم واستنى تعليقات الناس عليه

وحشتنى الأيام اللى بدأت فيها المدونة دى كنت لسه ساعتها داخله الكلية وفرحانة أوى

كان فيه تفاصيل صغيرة فى حياتى بس حلوة وبتفرحنى

اما باقرا عن اول يوم ليا فى الكليه باضحك واقول ايه الضياع اللى كنت فيه ده :)

بس باحمد ربنا انى كتبت عنه وقتها عشان آجى بعدها بأربع سنين أضحك عليه فى وقت مش لاقيه حاجه تضحك بجد فى الأيام دى

أربع سنين ...أنا قولت أربع سنين !! آآآه

دى الأيام بتعدى هوا !

المشكلة انه طول الاربع سنين دول محصليش اى تغيير جذرى فى حياتى

غير انى بقت السياسة محور اهتمامتى !

مين مبقتش السياسة محور اهتمامته اصلا !

أٌقوم الصبح اشوف آخر الاخبار ولو حاجه حصلت أفضل اتابعها واقلق على أصحابى الافتراضيين عالنت لا يكون جرالهم حاجه !

ناس عمرى ما شفتهم ولا شافونى وغالبا مش هنتقابل فى يوم ما ولكن بقوا بيشكلوا حياتى

بخاف لاشوف صورة او اسم حد اعرفه جراله حاجه ..اليوم يخلص وانام وقلبى مقبوض

لو مفيش أحداث بقى ومش قلقانة على حد بيبقى احساسى بالخنقة نابع من انى مثلا اكتشفت ان اقرب ناس اعرفهم والمفروض انهم اقرب اصدقائى تفكيرهم فلولى بحت وبافضل فى حيرة بين علاقتى بيهم الالكترونية وعلاقتى بيهم فى الحياة ....ازاى افصل بينهم !! ازاى اتناسى فجأة رأى أصدقائى عالنت انه الشهداء ماتوا وخلاص (والحى أبقى من الميت ) بمعنى أًصح ويبقى مطلوب منى أخرج واتبسط واتفادى الكلام فى السياسة معاهم عادى !

مبقيتش باخرج غالبا وباقعد عالنت لفترات باضيع وقتى فى لا شىء

كان عندى دور برد لمدة اسبوع بس كان جامد شوية ....مش عارفه ليه حسيت فى لحظات انى روحى بتروح منى ....وانه مفيش حد حواليا بالشكل اللى كنت متخيلاه ...او مش هاضحك على نفسى ....أنا عمرى ما كان فى حد حواليا بالشكل اللى كان نفسى فيه ...يمكن يكون دور البرد حاجه بسيطة بالنسبة لأمراض تانية ..الحمدلله..بس أنا كنت بانتهز الفرصه واعيط ومش عارفه بجد ده من احساس الألم وتكسير الجسم ولا الألم النفسى

حاسة انى مفتقدانى ومفتقدة هواياتى وذهنى الصافى ....حاسة انى تايهة

وخايفة أجى كمان أربع سنين أٌقولكم .....انى حاسة انى تايهه هههههههههههههههه :))

ايييييييييييه دونيااا

بس انتم وحشتونى بقى :D

هناك 4 تعليقات:

الازهرى يقول...

روووووووووووووووووووووووودى
عوووووووووووووووووووووووووووودى
من جديد

وبرنا فرحتى ما يساعها تشبيه فى اللحظة دى

تعرفى إنى كنت هنا فى الندونة من أبوعين تقريبا
وكنت زعلان جدا
الكل يبهاجر لبعيد وسايبين المدونات
اللى كنا بنعتبرها بيتنا

ما علينا
اللى فات مات

*****

مين مبقتش السياسة محور اهتمامته اصلا !
أناااااااااااا

أنا لما بأكون فى الصيدلية أو القاعد رايق فى البيت
بأديها
mbc3
ولو على الجهاز يبقى توم جيرى
و مولان
وهيصة
انا فصلت شويتين وريحت دماغى
علشان عارف إن الأحداث هتتصاعد من تانى
وهأكون محتاج لذهن صافى علشان أكمل

بكرة جاى أحلى

وربنا ما يخلى فى اختفاء من تانى

بِنت نُكتة يقول...

عودي يا بلية عودي يا بلية
:))
اسفة يا رغدة اني مسالتش عليكي غير مرة واحدة وانتي تعبانة
بجد هحاول ماخذلكيش تاني
بس انا والله متبهدلة
وربنا اللي عالم بيا انا ضايعة ازاي
المهم نووووووووووووووورتي بجد بلوجر عندي وفرحتيني ع الصبح روحي يا شيخة ربنا يفرح قلبك زي ما فرحتيني :)

ألـــــــوان الحيــــــــاة يقول...

أزهرى :ربنا يكرمنى وأقدر أفصل أنا كمان ....شكرا مرة تانية عالترحيب الحار :)


اسراء:انتى من الناس اللى سألوا عليا اصلا فمتتأسفيش وبجد من الناس الغاليين عندى ربنا يخليكى يارب ويكرمك ....البلوجر منور بأهله :)

Nigm يقول...

ترك المدونة به سم قاتل

عودًا حميدا
^_^

Welcome baCk
:)