اخيييييييييييييييييييرا خلصت امتحانات
يا ساتر ده كان هم وانزاح فعلا
تخيلوا امتحانا 32 امتحان السنه دى
كانت حاجه مرهقه بجد ده بدل ما يدلعونا كده واحنا لسه صغيرين وفى اول سنه
هههههههههههههههههه
يلا الحمدلله انها عدت وفى انتظار النتيجه ادعولى بقى ربنا يوفقنى واطلع بتقدير كويس
ــــــــــــــــــــــــــــــــــــــــــــــــــ
بقالى مدة فى موضوع مضايقانى وقلت اشوف الناس هنا رأيها ايه ؟؟؟
يعنى معظم البنات دلوقتى عندهم نت ومشتركين فى منتديات وفيس بوكات وعندهم مدونات
وبالتالى اكيد بيشاركوا برأيهم فى مواضيع كتيره ومختلفة
سواء بقى سياسية اجتماعيه ومواضيع ترفيهيه
وده طبعا بينمى كتير من ثقافتها ومتابعتها للى بيحصل فى الدنيا
وبما ان مفيش نت للبنات ونت للولاد
فبتالى فيه اختلاط بينهم وبيتكلموا مع بعض عادى جدا
مع ان ممكن البنت دى تكون مبتكلمش ولاد فى الحياة الواقعيه بس بتكلمهم عالنت ؟؟
طيب دلوقتى عندنا شاب بيكلم بنات عالنت وبالتالى بنت بتكلم شباب عالنت
طيب عالواقع البنت مبتكلمش والشاب ممكن وممكن ؟؟؟
الشاب عالواقع شايف البنت اللى قدامه محترمه جدا مبتكلمش غير محارمها وملتزمه جدااا
هل لما يعرف انها بتكلم شباب عالنت نظرته واحترامه ليها هيقل ؟؟
طب ليه ؟؟؟ عشان بتشارك برايها مع الناس ؟؟
طب مهواو غيره من الناس دول اللى هى بتكلمهم
وهو نفسه عالنت بيتناقش معاها وبيهزر معاها وبيبعتلها رسايل خاصه وعاجبه شخصيتها ودماغها
يعنى البنت تعمل ايه عشان تعبر عن نفسها وعن شخصيتها مع الناس وبتلاقى قبول على افكارها وارائها عالنت وعلى نقيض تلاقى نفور منها عشان هى بنت وحشه وبتتكلم عالنت !!!
طب معنى كده ان البنات كمان المفروض ترفض الشاب اللى بيعبر عن رأيه على النت
مهو اكيد برضه بيرد على فلانه ويشكر علانة
هل فعلا انت كشاب ترفض مثلا ترتبط ببنت عشان بتكتب وبتشارك عالنت او حتى ممكن تقل من نظرك ؟؟
وهل هتسمح لزوجتك انها يبقى عندها مدونه وتشارك عالنت وترد على ده وتنتقض ده وتشكر ده
وايه هى ببقى الحدود اللى المفروض البنوته عشان تبقى حلوة وشاطورة تعملها عشان تبعبر عن رأيها (وش متغاظ)
مستنيه اتصالتكم وارائكم على 09001234 وابقوا قابلونى لو حد رد D:
والسلام ختام ;
هناك 16 تعليقًا:
انا دخلت مدونات كتير واغلبهم بنات بس اللى لاحظته ان كلهم بلا استثناء محترمين جدا بس هو المشكله ان مش كل الناس تعرف يعنى ايه تدوين يمكن علشان الشات اداهم فكره وحشه عن النت بس هو الحكم فى الاخر بيرجع للثقه والاحترام بين الراجل ومراته او خطيبته
تقبلوا تحياتى ومرورى وتمنياتى بالنجاح والتوفيق
لاسع افندى
عندك حق بس المشكلى ان معظم اللى بيقولوا كده بيبقوا شباب بيدخلوا المنتديات وعارفين الكلام والمواضيع ماشيه ازاى
يعنى منتهى التناقض بجد
تحياتى ليك ونورتنى بالزيارة
حمدلله على السلامة
طبعا السؤال للشباب يعنى مش هرد عليه ^_^
لكن فى اعتراض هنا معلش
يعنى ايه بنت بتتكلم عادى فى الحياة الافتراضية مع الشباب و الواقعية لأ؟؟؟
اعتقد كده يكون ازدواج فى الشخصية غير انها معلش يعنى شخصية غير متصلحة مع نفسها و الموضوع ده عواقبه غير محمودة
لو البنت اللى بتقول "رأيها فعلا" اللى هو المفروض بيدل على شخصيتها تعمل كده فى الواقع و الافتراضى
هتقدر تغير وجهة نظر اللى حواليها ليها
لكن كده يبقى عنده حق اى شاب يغير نظرته فيها لما يعرف انها بتتكلم على النت و فى الواقع عكس ذلك
التعبير عن وجهة النظر عمر ماكان شئ غلط ولا بيدل على عدم الاخلاق للبنت
لكن اللى بيحصل من بعض البنات هو اللى فعلا غلط و العواقب صدقينى بتكون غير محموده لانها اتعودت على عدم الصراحة و الوضوح
صباح الورد يا رودي
حلو الموضوع و كويس انك فتحتيه... لا الشاب ميغيرش نظرته ناحية بنت لو كانت بس بتكلم في مدونه و لا منتدى و لا اي عفريت ازرق...انما لو بيتكلم معاها شات و حوار من ده الموضوع بيختلف... و صعب يرتبط بيها... هيقول لنفسه طب ما اللي خلاها تكلمني يخليها تكلم غيري..ايه المانع يعني... و بعدين البنت تتكلم ع النت اه و في الواقع لأ ليه.. حلال في النت و حرام في الواقع مثلا...ما هو الاتنين واحد.. طب ما هو في كلام واقعي محترم و في حدود... ده حتى النت ملهوش حدود في الكلام وواحد ممكن يستغله وحش ببساطة ما هو محدش شايفه..
لأ بس كويس انك اثرتي الحكايه دي
المهم ربنا يوفقك في النتيجه و متزعليش نفسك اوي بال32 امتحان...يا بنتي الباكنه لوحدها فيها فوق ال 12 امتحان...
ربنا يوفقك يا رودي
سلااااااام
انتى عندك حق فيه ولاد وبنات مش بيحبوا يتكلموا غير على النت بس
بس كون البنت بتدخل على النت دا مش عيب بالعكس
دى ميزه الثقافه مطلوبه والنقاش مطلوب فى كل الاحيان
رودي هااانمكفاارة الامتحانات ربنا يعييينك وان شاء الله خير
الواحد خلص من موضوع المنتديات وهل ترضى تاخد وحده بتكتب في منتديات طلعنا في النت عموما
شوفي اللي عاجبه عجبه واللي مش عاجبه عنده حيطه اتنين تلاته اربعه يخبط راسه فيهم :)
يعنيايه بتدخل نت؟ في زمنا ده بتدخل نت يعني بتمشي في الشارع الناس لسه بتقول بتكتب على النت؟ دا من الاول افترضو سوء النية؟؟
شوفي النت زيه زي الجامعه زي البيت زي الشارع المفروض ان تعاملاتنا واحده في جميع الاحوال واللي يغير نظرته عشان حاجه زي دي يبقى سوري يعنيي .....
سيبك انتي
مبرووك الاجازه :):)
وحشاني حبيبتي
ربنا ينجحك وتاخدي تقدير عالي
البوست جميل وبيناقش موضوع مهم
فعلا في كتير من الشباب بيتكلموا مع البنات عالنت وعادي لكن بيكونوا رافضينهم وبيراقبوا تحركاتهم وكانهم بيعملو جريمة
انا عمري ما دخلت النت الا بعد الجواز وجوزي واثق فيي و تاركني على راحتي خالص اعمل الي انا عاوزاه عالنت
فكل واحد حر بتفكيره عاجبه عاجبه مش عاجبه هو حر برضوا
ولاحظت انهم معظم الي علقوا مستغربين ازاي البنت بتكلم شباب عالنت وفي الواقع لأ
ليه يعني النت شي والواقع شي تاني
النت مجرد دردشة او فضفة من غير ما نشوف بعض لكن في الواقع منقدرش نكلم اي شاب ممكن بالشغل او بالجامعة لكن غير كدا مينفعش فليه مستغربين يعني
انا مثلا بتكسف جااامد ومش بكلم اي حد غريب في الواقع لاني اساسا مش بشتغل ولا بخرج لكن عالنت شي مختلف
سوري عالاطالة
تحياتي
طول ما هو عارفني وعارفة اخلاقي يبقى خلاص
انا جيت تانى ^_^
معلش ليا تعليق على نوارة للتوضيح
اختلف معاك فى موضوع النت شئ و الواقع شئ تانى
لان اولا هى هى الشخصية اللى فى الواقع هى اللى فى النت
بافكارها و معتقداتها
الا بقى لو فى خلل فى الشخصية نفسها فبتحاول تظهر من ورا الشاشة بشخصية غير شخصيتها
انت بتتكسفى لما تكلمى حد غريب لان دى شخصيتك .. لكن هل لو اتحطيتى فى نقاش فى الواقع مش هتقولى رأيك ؟؟؟
و هنا بتقولى صعب ان البنت تكلم شاب الا فى الشغل او الدراسة معاك
و هنا مافيش حاجة غلط على البنت لا واقع ولا افتراضى
لكن معلش ماتجيش واحدة تقول انا مش بكلم شباب لان شايفة ان كده غلط او مش مقتنعة بصداقة الولد مع البنت
و تيجى فى النت تلاقيها عاملة صداقات كتير مع شباب "فى نطاق الاحترام"
و المبرر اصله من وراء حاجب !!!!!!!!!
ده على اساس ان النت حجاب!!!
فى الواقع بنكون زملاء شغل او دراسة
فى النت "على اعتبار انه وسيلة اتصال" زملاء مدونات او المنتديات
يبقى ماينفعش اكون فى الواقع شئ و فى الافتراضى شئ تانى
ولا ايه ؟؟؟
sweet violet
ازيك يبنتى عاملة ايه وحشانى والله
مش مسأله ازدواج ولا حاجة
نوعيه البنات اللى بتكلم عليها بتقول ارائها فعلا وشخصيتها واحده فى كل الاماكن
بس هى ممكن تكون مش مختلطه بالولاد فى حياتها يعنى بتبقى اغلب تعاملاتها مع بنات زى مثلا الاخوات المنتقبات نادرا اوى لما تلاقيها بتتعامل مع ولد فمعتقدش هتوصل معاه لمرجلة المناقشه لكن طبعا لو وصلت للمناقشه فى اى مكان سواء فى ندوة او مدرج او كده هتناقش يعنى مش هتطلع تجرى ولا حاجه (:
يارب يكون قصدى وصل يا قمر
prince4ever
أنا أثرت الموضوع ده عشان مضايقنى فعلا):
كويس انك من الفئة الغير معترضة عشان انا بجد مش قادرة افهم ايه وجه الاعتراض بالنسبه لهم
نفسى حد من المعترضين يدخلى يقولى وجهه نظره
اما بخصوص الشات فهو من الاول غلط اصلا بس برضه لما يكون واحد بيكلم واحدة حتى لو عالشات وبيتكلموا كلام محترم وبيتناقشوا وعرف اخلاقها وكده ووثق فيها مش المفروض تنزل من نظره ولا ايه ؟؟؟
بس ده مش معناه انى موافقه عليه برضه
ربنا يسمع منك ويوفقك فى امتحاناتك
تحباتى
romansy
هو ده الكلام بس اللى يسمع بقى
تحياتى ليك
بنت الماضى
ازيك يا ايمى عاملة ايه وحشااانى موووت
انا معاكى جدااا ان النت بقى حاجه طبيعيه اى انسان طبيعى لازم يستخدمه
بس عارفة النت برضه انتى مش بتقدرى تحددى اوى الناس اللى بتتعاملى معاهم يعنى انتى مثلا بتعرضى موضوع عالكل والكل بيقراه والكل بيرد سواء بنات او شباب انما فى الجامعة مثلا بتعرضيه على فئه معينه وهو ده الاختلاف اللى بيحصل بين الاتنين
واكييد طبعا انا مع ان الشخص ميغرش نظرته فى البنت للسب ده تحديدا امال انا عامله الموضوع ليه ههههههههه
الله يبارك فيكى يا جميل
نوارة
ايون والله انتى فهمتى اللى اقصده
اهم حاجة الثقه فعلا
منورانى يا نوارة
Sweet Violet
اهلا بيكى تانى (:
مش حكايه انها بتحاول تدراى شخصيتها ولا حاجه , هى نفس الشخصية بنفس الافكار مع الفارق اللى انا قلته انها مش بتخطلط فى تعاملتها
يعنى مش هتجيب شويه ولاد واقفيت تقولهم تعالوا اخد رايكوا
لكن لو كانت فى مكان يتسلزم انها تعرض رايها
اكيد هتتكلم
اتمنى يكون المعنى وصل (:
صباح الخير الاول
انا بقي رأيي
انها عادي خالص ان واحده تدخل ع النت وترد ع اي حد وتشارك ف اي مواضيع سواء ع منتديات او بلوجات او او او او ....
اما بقي عن الحدود اللي المفروض ان البنت تلتزم بيها
انها ما تقصرش ف اي حاجه مطلوبه منها لو كانت متجوزه مثلا....
والكلام يكون ف حدود....
اما بالنسبه للرقم اللي انتي كاتباه ده
انا اتصلت بيه واحد رد عليا بيقولي
(اترك رسالتك بعد سماع جرس انذار الحريق)
هههههههههه
,,
موضوعك جميل
تسلم ايدك
تحياتي,,
شريــــــــــــف
شريف
ياريت كل الناس والشباب خاصة يفهموا كده (:
بس غريبة
انا اتصلت بالرقم ده قاللى فراشه الحاج على معاك
ههههههه
نورتنى بزيارتك
تحياتى ليك
إرسال تعليق