تحديث كبيييييييير
الف مليووون مبروك لمصر عالماتش وعقبال السودان
انا اتفرجت عالماتش كله والحمدلله فرحنا فى الاخر بعد ما ريقنا نشف
كان نفسى نكسب بس عشان الناس دى متروحش زعلانة
انا فرحانة اه بس برضه لازم ندى لكل حاجة قدرها من الفرح او الحزن او حتى التشجيع
زى ما وضحت فى البوست كده
وعقبال ماتش السودان
بس كده
ــــــــــــــــــــــــــــــــــــ
سلام عليكم ورحمة الله وبركاتة
وحشتونى وحشتونى وحشتونى جدااااااا جداااااااا بجد
عارفة انى مقصره معاكم بس ظروف الدراسة واخدينا قفش اكننا احنا السبب فى تاجيل الدراسة مثلا او ان انفلونزا الخنازير تدخل مصر
احنا بنشكل خطر على امن مصر القومى عشان كده بيعذبونا فى الكلية
ادعولى يا جماعة ربنا ييسر الحال
بقالى اسبوع طول مانا رايحة جايه والناس ملهاش سيرة غير الكورة وماتش يوم السبت
فلان هيلغى مواعيده عشان يشوف الماتش
والسواقييين هيخلصوا بدرى عشان يلحقوا الماتش
انا بقول اللى عندها مواعييد تخلصها وقت الماتش اهو الدنيا هتبقى فاضية والشارع مش هيبقى فيه صريخ ابن يومين
وبايعيين الأعلام ايه شغالين 100% اللهم لا حسد
مبشوفش حد حريص اوى انه بقى عنده علم الا وقت الماتشات
مش عارفة ليه حاسة ان الموضوع واخد اكبر من حجمه اووى اووووى اوووووى
الناس انفعلت بالماتش اكتر من اى حاجة تانيه فى بلدنا محتاجة وقفة ومحتاجه اوى حماس الماتشات ده
اشمعنى الانتماء الرهيب ده مبيظهرش الا وقت الماتشات
هتقوليلى انتى بتتكلمى كده ازاى داحنا لو كسبنا هنروح كاس العالم وانتى مش لازم تشجعى بلدك وبتاع
هقولكوا على عينى وعلى راسى بس لو كنا فعلا بنحب البلد دى اوووى كده فين اللى عملناه عشان نحسن اوضاعنا ونتقدم بيها ( ولا بلاش نتقدم بيها دى لا تقولى عليها حزب وطنى ولا حاجه )
اشمعنى اما بنتشتم فى اى حتة بنبقى زى الخرس تمام ولا بنتكلم ولكن لما الجزائر يحرقولنا علم نحرقلهم علم
عملوا اغنية وشتمونا
عملنا اغنية شتمانهم
احنا ناس متسيبش حقها اه محدش يدوسلنا على طرف
وفيه حاجة مش فاهمها الصراحة اصلى مش متابعة اوى
اشمعنى اى ماتش بينا وبين الجزائر او المغرب مثلا بيبقى فيه كل شد الاعصاب والقلق ده
وفيه حاجة ضحكتنى اوى الصراحة
حملة ال 80 مليون صائم يوم الماتش للدعاء للمنتخب
ههههههههههههههههه
هيصوموا مخصوص عشان الماتش !!!
يا جماعة طب ماشى بلدنا ونشجعها مقلتش اى حاجة
بس مش كده
عندنا بلاوى كتير نصوم وندعى ربنا ييسرهلنا اهم اوى من الماتش
طب احنا هنستفيد ايه لما يروحوا كاس العالم
انا كواحدة من الشعب ايه اللى هيعود عليا من ده !!!
ولا اى حاجه هما اللى هياخدوا ملايين وهدايا اللى هى اصلا هتبقى فائض عندهم هما مش محتاجين يعنى
لكن احنا اللى كل يوم بنتبهدل سواء فى دراسة تعليم بايظ من اوله لاخره تحت اعداد رهيبة وظروف صعبة
سواء ناس بتشتغل مواصلات وروتين ونظام متعب وفى الاخر ملاليم
احنا الى كل يوم بنعانى الميه مقطوعة النور مقطوع المجارى ضاربة الشارع مكسر الزبالة اكوااااااااام
انا عارفة ان الكورة اكتر حاجة بتفرح الشعب ده بس حساها بقت زيادة عن حدها اووى
واللى يزيد عن حده عمر ما ينزلنا الارض أده
ومع ذلك برضه اتمنى ان بلدى تكسب واهى تبقى حاجة انجزنا فيها
بس مش هو ده الانجاز اللى احنا مستنينه
ولا اية !
هناك 5 تعليقات:
اول تعليق
على
الكلام الكبير دا كلوووووووو
ل
رومانسى
تعرفى عندك حق
انا بالنسبه للشغل عندنا فضلوا يشتغلوا الجمعه بدل السبت علشان الماتش برضه
لو كان اهتمامنا دا او نصه بيكون لنصره رسولنا
او فعلا لهدف اننا نطور فى بلدنا طالما بنحبها قوى كده
ايه الدليل على الحب دا
التشجيع يعنى الدليل الوحيد
إزيك يارودي هانم كل دي غيبة هاه
إيه ماوحشناكيش ولا إيه؟ ده أنا مصدقتش نفسي لما قريتلك بوست جديد في الريدر
عموما حمد لله على سلامتك نورتي البلوجر ياجميل
ها أقولك حاجة بسيطة قوي أنا بشتغل في جامعة خاصة والمفروض كنا نمتحن العيال امتحانات ميد تيرم يوم السبت طبعا سعادتهم مش فاضيين وطلبوا تأجيل الإمتحانات لحد يوم الإتنين علشان هيرجعوا من الماتش تعبانين والجامعة مطلعة حوالي 15 أتوبيس للإستاد والدنيا عندنا واقفة تماما
شفتي تفاهة أكتر من كده
بس بجد تسلم إيدك على البوست الهايل ده
تقبلي مروري
هكذا يلعب الاعلام الموجه علي الشعوب الغافله كي لا تنتبه الي تلك الانظمة الفاسده ويتم الهاء الشعوب وخلق صراعات بينها علي اتفه الامور
تحياتي
-----------
من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
ربنا معاهم يارب...الكل يدعى بكرة ويصوم ربنا ينصرنا
إرسال تعليق