الخميس، 9 يوليو 2009

أحلامنا ...بين اليقظة.....و النوم !!!!



السلام عليكم ورحمة الله وبركاتة

ازيكم كلكم نفر نفر ونفرايه نفرايه ؟؟؟؟ يارب تكونوا بخير جميعا

انهارده عايزه اتناقش معاكم فى موضوع يهمنى ويهم شريحة عريضه من أبناء جيلى ان لم يكن يهم جميع الاجيال

أحلام اليقظة!!!!

يعنى اما تبقى صاحى تماما فطرت وشربت الشاى وكمان نزلت وقاعد فى مكان

بس نايم وبتحلم كمااااااااان !!

ومش حاسس باللى بيجرا ادامك عالواقع انما عايش فى دنيا تانية انت اللى صنعتها لنفسك ؟؟

الدنيا دى انت اللى اختارت كل تفاصيلها واشخاصها واماكن احداثها

الدنيا دى ممكن تكون مبهجة بالنسبة لك وتكون مصدر سعادة ليك وفى نفس الوقت ممكن تكون مصدر تعاسة وده لما تتخيل حاجات بائسة وكئيبة

بس هل الاحلام دى سواء مبهجة او كئيبة تعتبر هروب من الواقع وعدم قدرة عن المواجهة ؟؟

مهو اكييد فى وقت ما احنا بنحلم بنضييع وقت من الوقع الل احنا عايشينه فعلا وخلال كده تركيزنا بيضيع فى اى حاجه المفروض نقوم بيها فى حياتنا ؟؟؟

الافكار دى دايما بتدور فى ذهنى عشان كده دورت على اصل الحكاية دى وقلت اشوف بتوع علم النفس قالوا ايه عن الموضوع ده

تبدأ أحلام اليقظة منذ فترة الطفولة يكون الطفل فيها خصب الخيال ، ولكن يجب أن تنتبه الأمهات إلى أن رؤية الطفل لأفلام الرعب أو العنف تجعل الطفل يخلط بين الأطفال ما بين ما يحدث فى الخيال مع الواقع خلال المعايشة الأمر الذي يجعله يعيش أحلام يقظة مخيفة، أما الأشخاص الأسوياء البالغين فسرعان ما يعودين إلى الواقع, أما الاستغراق الشديد والإسراف فيها يستنفذ جزء كبير من الطاقة النفسية مما يؤدي إلى العجز عن التمييز بين الواقع و الخيال.

يعنى فعلا اى حاجه بنشوفها سواء فيلم مسلسل اى حاجه بتأثر على احلامنا دى وبتساعد على رسم العالم البديل اللى بنعيش فيه

وقالوا كمان .....

ومن أكثر الفئات التى تلجأ لهذا النوع من الأحلام هم المراهقين فمن خلال هذا العالم يتمكنون من تهيئة أنفسهم بتحقيق شئ ما سواء كان إيجابي أو سلبي ، منهم من يخرج منها بسلام وآخرون يعيشون فى غيبوبة ويصدقون ما تم نسجه بالخيال .

طيب انا فى الحتة مش قادرة افهم اشمعنى سن المراهقة هو اكتر فترة بيتعرض خلالها الشخص لأحلام اليقظه ؟؟؟

هل ده راجع للفراغ مثلا ؟؟ ومين قال ان المراهقيين عندهم فراغ كبييير مش موجود عند اى شخص فى اى فترة عمرية مختلفة ؟؟

وبعد جابولنا بعض الامثلة لحالات بتحكى عن احلامها وايه اللى بتشوفه اثناء يقظتها

تقول رانيا فودة 22 سنة : أحلام اليقظة لا تنتهي فعقلي ملئ بالأفكار
يتربع فوقها فارس الأحلام ، ابدأ القصة بكفاح البحث عن عش الزوجية واختيار الديكورات ورومانسية لا تنتهي إلى أن يجمعنا سقف منزل واحد ، هذا بالنسبة إلى حلمي الأول ، أما الثاني هو تأثري بالشخصيات النسائية الناجحة كالمذيعة الناجحة مني الشاذلي وحوارتها الجريئة مع ضيوفها أحياناً أحاول أن اتقمص دورها وشخصيتها فى الواقع ، أما الأحلام الأخري تتعلق بالمشاهد الرومانسية فى المسلسلات التركية ، واقتنائي لسيارة نوع "هامر" مع اتقاني لفنون القيادة المتهورة.


والنوع ده من الاحلام منتشر جدا فعلا خاصة بين الفتيات ودايما بتتراوح احلامهم بين فارس الاحلام الرومانسى او الاطفال وطريقة تربيتهم او هتصرف فلوسها فى اية ؟؟؟

وانا برجح النوع ده من الاحلام لانعدام الحاجات دى فى مجتمعنا للظروف الصعبه فمبقاش فيه لا رومانسيه ولا فلوس اصلا ولا بتاع فى البتاتيع

وهل اجدادنا ايام زمان كان عندهم النوع ده من الاحلام ولا الظاهرة دى زادات دلوقتى ؟؟

وهل فعلا احلام اليقظه فى مجملها ظاهرة سلبية ولا ايجابية ؟؟

وجاوبت على سؤالى الاخير ده د/جزويت ناصحة بضرورة التفكير في المقتطفات التى تخص الموضوع أو المشكلة لتكون مفيدة ، وأيضاً بإمكان الإنسان أن يلقي الضوء على جميع الجوانب بتعدد أفكاره ولا يركز تفكيره على نقطة واحدة فقط وذلك بإنطلاق الأفكار بدون تقييد فى موضوعات مختلفة فتتبلور فكرة محددة فى المخ عن طريقها يمكن أن تصل بالفرد الإبداع فى الموسيقي ،الفن أو أي علم من العلوم.

بس هل فعلا احنا نقدر نتنشل انفسنا من احلام اليقظه وندرسها ونحاول نطلع منها بحاجة مفيدة ؟؟

ولا بيبقى مجرد وقت بنقضيه فى العالم البديل ده ؟؟

وليه اصلا بنحلم واحنا صاحيين ؟؟؟ ليه منكتفيش بالحلم واحنا نايميين ؟؟

طب هل الاسباب اللى بتخلينا نحلم واحنا نايمين هى نفسها اللى بتخلينا نحلم واحنا نايميين ولا بتختلف الاسباب والتأثيرات والنتائج ؟؟

من الاخر هل فعلا احلام اليقظه دى نعمة لينا ولا نقمة علينا ؟؟

ازاى نقدر نواجهها او نستفيد منها ؟؟؟

أسئلة كتيره محتاجة أجابة ..........

فى انتظار مشاركتم ومناقشتكم.........

أقوم انا بقى احلملى ساعتين تلاتة كده عشان اكمل باقى المغامرات D:D:D:

والسلام ختام .....




هناك 13 تعليقًا:

شموخ مسلمة يقول...

اممممم مضووعك حلو اووووووى يا رودى بجد
بالنسبة لى
اوقات فعلا بهرب من الواقع للاحلام دى
او مش هروب بس تخفيف للضغط
يعنى هقولك حاجة
بمان انك صاحبتى فعارفة اهتمامى بمصر و فلسطين بالذات
المهم دلوقتى انا لو بصيت للواقع بس دماغى هتتفجر لازم ابعد شويةبشوية احلام من خيالى عشان اقدر اكمل و احاول احقق اهدافى
لما اتصدم من ناس قريبين منى لازم اروح لخيالى شوية
مش هروب من الواقع
بس هروب من ضغط الواقع

بالنسبة لاسئلتك بقى :

بس هل فعلا احنا نقدر نتنشل انفسنا من احلام اليقظه وندرسها ونحاول نطلع منها بحاجة مفيدة ؟؟
اه متهيالى
انتى لو سبتى نفسك لخيالك اوى سبتيله العنان زى ما بيقولو و وقفتى فى لحظة
شوفى ايه اللى كنتى بتفكرى فيه
هيبينلك كتير اوى من تفكيرك و اهتمامك و شخصيتك و احلامك
و ممكن يلفت نظرك لحاجاة ماتكونيش واخدة بالك منها

ولا بيبقى مجرد وقت بنقضيه فى العالم البديل ده ؟؟
لا ما اظنش
بس ممكن ده بقى بيبقى ملل
بيبقى هروب فعلا من الواقع للا شئ

وليه اصلا بنحلم واحنا صاحيين ؟؟؟ ليه منكتفيش بالحلم واحنا نايميين ؟؟
عشان نفتكر الحلم
ايه يابنتى انتى انتى هتحسدينا ع الحلم كمان

طب هل الاسباب اللى بتخلينا نحلم واحنا نايمين هى نفسها اللى بتخلينا نحلم واحنا نايميين ولا بتختلف الاسباب والتأثيرات والنتائج ؟؟

اممممممم سؤال حلو برده
ممكن اه بينهم تشابه كبير
الا ان احلامك و انتى صاحية بتتحكمى فيها اكتر

من الاخر هل فعلا احلام اليقظه دى نعمة لينا ولا نقمة علينا ؟؟
اه الحمد لله بالنسبة لى نعمة كبيرة
ازاى نقدر نواجهها او نستفيد منها ؟؟؟

وجهيها للصح
يعنى لو وقت جه عليكى حاسة بالفشل -بعد الشر طبعا- اقعدى تيخلى نفسك لما تنجحى عيشى ده تقمصى الدور فتحى عينك هتلاقى نفسك فرحانة كانك ناجحة بالفعل
عايزة تفكرى فى حاجة معينى اقعدى احلمى كتير بيها بكذا حال و شوفى النتيجة و بعدين حددى و هكذااااا

بجد الموضوع جميل يا رودى انا كتبت كتير و انا عبانة اصلا اقول عليكى ايه بس
ربنا يخليكى ليا يا تاعبانى

ألـــــــوان الحيــــــــاة يقول...

أمل الحياة

ازيك يبنتى عامله ايه
وحشانى
هههههههههههه

بالنسبة لاول سؤال ده ممكن فعلا بس ده الشخص ده يقدر يوقف نفسه وسط الحلم اصلا ؟؟ وفعلا هتبقى حاجه جميله ويبقى هو كده استفاد لكن لو اعتبرناها زى الاحلام العاديه اثناء النوم عمرى ما شفت حد بيصحى فى نص الحلم يشوف كان بيحلم باية 4/5

بالنسبة للسؤال تانى اجابه منطقيه طبقا لنموذج الوزاره 5/5

نفتكره ازاى يعنى ؟؟ مش مقنعه 5/5 هههههههههههه

مش اوى برضه فيه ناس كتير معندهاش قدرة عالتحكم يعنى منقدرش نعمم 2.5/5 (بلطجه كده p:)

اخر سؤال على رايك

مبروك يا قمر جبتى 25/55 وكسبتى معانا سكوتر

ههههههههههههه

مش عارفه ايه الروقان اللى انا فيه ده

بس بجد كلامك منطقى وجميل جدا

نورتينى يا قمر

Nigm يقول...

اممممممممممم

اسمحيلي أسألك

اتفرجتي علي فيلم
Coraline ?
:)

ألـــــــوان الحيــــــــاة يقول...

Nigm

تؤ متفرجتش عليه d:

ليه ؟

الازهرى يقول...

انا فى قمة الارهاق والموضوع محتاج كلام على الرايق
باذن الله الصبح تلاقى تعليقى بالكامل

الازهرى يقول...

انا باكتب لتالت مرة

والخلاصة انى مع احلام اليقظة واحبها لو كانت لتفريغ الذهن وتجديد نشاطه

انما لو كانت زى ما بدأنا نلاحظ انها اصبحت ادمان عند كتير من الناس ووسيلة للهروب من الواقع
فده ضرر شديد لانى ممكن اعالج مدمن المخدرات بالادوية انما مدمن الخيال
فعلاجه مستحيل لانه بيبقى رافض اساسا

وربنا المستعان

اروح احلم لى حلمين على السريع كدع وارجع لك تانى

سبهللة يقول...

أحلام اليقظة دى نعمة كبيرة اوى
انا عايشة بيها
يعنى مثلا لما يجيلى ازمة مادية احلم انى عديتها وانى مثلا بقى عندى شقة اكبر من شقتى وعندى شغالة وعندى عربية افضل من اللى معايا ..الخ
بس الحلو فى احلامى انا
انها تعتبر مش بس احلام هى كمان هدف

يعنى مثلا
لما حلمت انى اتزوج زوجى الحالى الحمد لله ربنا حقق لى الحلم دة

ولما حلمت انى رحت الكعبة
الحمد لله رحت وطفت وقبلت الحجر الاسود فى وقت صعب جدا على الرجال انهم يخترقوا ويوصلوا له

ولما حلمت وانا بنت انى لما هاتجوز احب اجيب ولد الاول وبعد أربع سنين اجيب البنت
الحمد لله حصل بالظبط

ولما كنت بحلم ان ربنا يرزقنى بواحدة تساعدنى فى البيت وتقيم معايا
الحمد لله حصل

فاضل لى كام حلم صغيرين اوى انى اشترى عربية 4x4
وان شاء الله ربنا يسهل ويرزقنا
وحلم عمرى انى احج وارجع من الحج كيوم ولدتنى امى
وان شاء الله ربنا يسهل ويحصل

اللهم لك الحمد على نعمة احلام اليقظة
بجد بتعيشنى فى دنيا حلوة اوى

أحييك على موضوع الرائع

Nigm يقول...

أصل الفيلم بيتكلم عن البوست ده بشكل ما بس رائع جدا :)

ان شاء الله تشوفيه و نسمع رأيك :)

Kiara يقول...

حلم اليقظة مجرد هدف بمعني ان بشكل الهدف وتفصايلة وبسعي لتحقيقه انما حلم لمجرد الهروب من الواقع فدا مش بيحصل وحلم اليقظه مش لسن معين هتلاقي الام لماا بتنجب بحلم ان البيب كبر قدامها وبتتخيل هتربيه ازاي لما بتفوق بتحاول تتطبق دا وتفكر في تربيته صح انما عشان بس تهرب من واقع انه لسه صغير اعتقد دا الغلط

ألـــــــوان الحيــــــــاة يقول...

الازهرى

انت عندك حق

بس فعلا هى بقت أشبه بالادمان عند معظم الناس وخاصة الشباب

وميقدرش يتغلب عليها الا صاحب الارادة القوية

نورتنى كتييييير

ألـــــــوان الحيــــــــاة يقول...

سبهللة

ماشاء الله

أحلام اليقظه بتعمل اللى انتى عايزاه d:d:

لا لا بجد فعلا هدفك هو اللى بيحركك وبتقدرى تتحقى اللى انتى عايزاه ودى حاجه جميييلة جدا ربنا يديمها عليكى يارب ويحققلك كل اللى بتتمنيه


منورانى كالعادة

ألـــــــوان الحيــــــــاة يقول...

nigm

هنزله واشوفه ان شاء الله

تحياتى ليك

ألـــــــوان الحيــــــــاة يقول...

كيارا

وحشتينى جدااااا وعندك حق فعلا بس للاسف الملاحظ انها بتبقى سلبيه عند غالبية الناس وبتبقى بسبب الفراغ

منورانى يا عثل