د/زويل.......نورت اسكندرية بجد !!!

السلام عليكم ورحمة الله وبركاتة

ازيكم ازيكم ووحشتونى وحشتونى وكل الكلام اللى بيبقى فى الاول ده

انهارده كان يوم جميييييييييل

وانا قاعدة لا بيا ولا عليا وكنت شوية وبفكر انزل اتمشى فى محطة الرمل شوية عشان الدنيا حر ورطوبة وزحمة والمصيفيين عندنا منورين طبعا واحنا لسه مصيفناش

المهم مطولش عليكوا - لا طولى- صاحبتى كلمتنى وقالتلى ان فيه مؤتمر لد/زويل فى مكتبة اسكندرية ورايحيين وتعالى وبتاع المهم انا صراحة كنت مكسلة فى الاول بس بعد كده قررت اروح قلت محطة الرمل متلقحة طول السنة انما دى مرة كل عشر سنين و لا حاجه

ولو مكنتش رحت بجد كنت هازعل اوى من نفسى لانها بجد كانت حاجه جميلة جدااا

كان وقتها الساعة لسه 5 والمفروض المعاد 7 واللى ينزل الساعة 5 المفروض يروح يلاقى مكان يقعد فيه وقدام كمان

ده طبعا محصلش....

رجت لقيت زحمه فظيعة جدا متخيلتش بجد ان كل دول يجوا يحضروا وطلعوا كمان دول اللى مش عارفين يدخلوا وجايين متأخر زى حلاتى كده

والباقى دخلوا القاعة الكبيرة وقفلوها كمااان وقرروا ينقلوا الباقى لقاعة تانية اصغر

وطبعا لان الراجل مش بروحين فبتالى هيبقى موجود فى القاعة اللى فوق والناس التانية اللى هو احنا هنشوفة فى الشاشة بسسسس

بجد زعلت اوووى انى مش هاشوفه فيس تو فيس واسلم عليه وازي عامل ايه والغربة عامله معاك ايه والنظام ايه

بس يلا اهو احسن برضه من الناس اللى روحوا وملحقوش مكان فى القاعة ام شاشة

كانوا المفروض يعملوا شاشات عرض بره للمؤتمرات عامة ولا هو حلو للماتشات بس

وبدأ المؤتمر بكلمة الدكتور اسماعيل سراج الدين مدير المكتبة ورحب بالحضوروبالدكتور زويل وسط تصفيق حاد وزغروته من احدى الحاضرات D:) وبعدين جه رئيس جامعة اسكندرية ورحب بالناس برضة

وبعد كده جه طالب بالفرقة الثالثه كليه العلوم وقال كلمة لذيذة برضه

واخيييييييرا وبعد انتظار صعد الدكتور زويل ليلقى كلمته عالمنصة وسط تصفيق الحضور (مكنش فيه زغروتة تانى )

واول حاجه قالها انه فرح اوى بالزغروته D:

وبدأ يتكلم عن طفولتة وجزء من شبابه

وانه كان فى مدرسة حكومى عادية وعلى ايامه كانوا بيعتبروا اللى بيروح مدرسة خاصة يبقى فافى واى كلام

وان مدرستة كانت جميلة جدا وفيها انشتطة مش موجوده حتى فى مدارس امريكا دلوقتى

وانه بيته والدته بالذات كانت بتحافظ على صلاة الفجر وبتهيىء له جو مناسب

وكانت القيم موجوده فى شارعهم وحوالينهم فى دمنهور المكان اللى اتربى فيه يعنى كان مثلا لما كان جار ليهم يتوفى ميفتحوش الراديو بعدها لمدة اربعين يوم مش زى دلوقتى ):

واتكلم عن البيروقراطية المصرية والصعاب اللى قابلتة حتى لما جاتله المنحة للسفر

المفروض ان مدة الماجستير ياخد سنتين وهو خلصه فى 8 شهور تقريبا ولما جاتله المنحة كان لازم يجيب شهادة من الوزيرلا بانه ياخد اجازه لحد ما السنتين يخلصوا

وياريت على كده وبس لكن كمان رغم انها منحة من امريكا ومش بعثة من مصر معنى كده انها مش هتكلف البلد حاجه لكن رغم ذلك الحكومة المصرية رفضت ان الجواب يبقى باسم واحد بس وانما يبقى حاجه عامة

وكان عليه ساعتها انه ياخد الجواب يمرره على الدفعة كلها يمضوا انهم رافضين المنحة دى !!!!!!!!

وطبعا هما كانوا زمايل وكانوا مش بيزنقوا على بعض فى الحاجات دى بس دى لوازم التزنيق والخنقة !!

وطبعا كافح لحد ما وصل لمركز استاذ فى جامعة كالتاك

وقال ان امريكا نفسها بتواجه مشاكل فى التعليم

وان الحل مش فى ان اى بلد تنشىء مدارس وجامعات خاصة لازم يكون فيه نظرة شاملة وتقييم وانضباط اللى طالع من المصادر دى

وحاجه تانية اللى هو التعليم الاسرى انه ياخد قيمه من الاسرة نفسها والام ليها دور كبيير جدا لان دلوقتى السيدات بتعمل والحضانات غاليه وبعيدة ومفيش اهتمام بالاطفال زى زمان

وقال كمان عن مشكلة كبيرة جدا وهى الغزو الالكترونى حتى فى امريكا مشكلة لان لازم مثلا تحديد عدد الساعات والحاجات المفيدة واللى لا

وقال انه من اهم مقومات الابداع عدم الخوف السياسى او الثقافى بأى معنى لان لو انسان خايف لا يمكن يبدع وكمان طبعا الحياة الكريمة لان مفيد حد يبقى جعان ويقدر يبدع

وقال انه خلال تجاربه والدول اللى بيروحها

لاحظ تناقضات غرييبه جدااا

مثلا لقى تقدم علمى رهيب وفى برضه فقر رهيب

لقى أعلى ديموقراطية فى العالم وفى نفس الوقت اكتر عدد ديانات (200 ديانة)

معنى كده ان مش شرط يبقى معاك كل حاجة عشان تحقق حاجة

واتكلم عن مصر شوية وقال انه متابع الاخبار كويس وشايف انه اكتر حاجه منتشرة فعلا بين الناس وهى الشكوى وفقد الامل

وان فقد الامل مش المفروض يبقى موجود فى بلد زى مصر و ادى مثال على ده انه ايام الحكم التركى العثمانى كانت اوروبا واخده كل الترجمات والعلوم من الحضارة الاسلامية فى الاندلس

يعنى هما استفادوا مننا وبدأت هى تبنى منشأتها علميه وفى الوقت ده بدأت الدولة العثمانية انها تحس انها عملت اللى عليها ووقفت عن البحث العلمى وبدأ الوضع ينحدر ومازدهرش تانى الا فى عهد محمد على لما بدأ يهتم بالتعليم والبحث العلمى وارسال البعثات

وده معناه اننا عندنا القدرة اننا نقوم تانى ومفيش داعى لفقد الامل ده اللى موجود ده

واتكلم شوية عن اصلاح التعليم وانه من رأية انه من اهم الحاجات اللى لازم تتنفذ انه ميبقاش فيه تعامل متساوى لجميع عقول الطلبة ومستوياتهم

لازم يبقى فيه اهتمام وتحفيز للوهبين وتوفير الفرص ليهم وبرضه محاولة الرقى بالطلبة العاديين

وان النهضة لا يمكن تحصل الا لما يحصل تطوير للعلم والتكنولوجيا

وقال كمان انه فيه ناس ممكن تقول عليه متفاؤل او ساذج بعض الشىء نتيجة لنظرته المتفائلة دى

لكنه قال ان سبب ده نابع من عقيدة عنده وهى انه لو بصينا لاى حضارة هنلاقى ان الفلوس تيجى وتروح والموارد تيجى وتروح الا الموارد البشرية موجوده على طووووول

وان مصر غنية جدا بمواردها البشرية وفيهم ناس ممتازه فكريا وعلميا وسياسيا

وبيقول ان مصر عندنا فلوس كتير بدليل الفيلات والعربيات فى الساحل الشمالى (للاسف فى دى فعلا مش شايف الناس الحقيقة )

وبعد كده خلص وجت جزئية الاسئلة وكانت معظمها بتدور عن كيفيه تطوير التعليم ومجالات البحث العلمى

وللاسف الوقت مكفاش لكل الاسئلة

بس بجد كان وقت ممتع جدا وكنا نتمنى انه ميخلصش ونقدر نستفيد من كلامه اكتر من كده

مممممممممممممممممم وايه كمان

اعتقدطولت عليكوا وايدى وجعتنى اصلابس اتمنى اكون قدرت انقلكم اللى حصل فى اليوم ده

واللى حابب يسمع المؤتمر بنفسه ادخلوا عاللينك ده (لو كنت لقيته من الاول مكنتش رغيت كل ده بس قلت ادردش معاكوا D:)

http://webcast.bibalex.org/Cast/Video.aspx?ID=baJOBuFcF3qFua6PZljcvA

الليك مش هايشتغل غير من الاكسبلورورD:

بس كده....

وتصبحوا على خيييييييييييير.......