السبت، 25 أبريل 2009

عااااااااااجل من حكمدار العاصمه !!

تحديث :حبيت بس أقولكم انى غيرت اسم المدونه من رودى هانم الى ألوان الحياه عشان احس انه بيعبر عن محتوى المدونه لانى بكتب فى كل الالوان ولان الاسم الاولانى كتبته وانا لسه بعمل المدونه ومفكرتش فى اسم ساعتها يعنى  فطلع كده وخلاص انا كنت ناويه اغير اللينك كمان بس قولت بلاش عشان ميبقاش فيه لغبطه والناس تعرفنى ومحدش يجى يقولى انتى مييييييييين ؟؟

بس كده ........

____________________

سيداتى انساتى سادتى :

اسعد الله صباحكم ومساؤكم

نعلمكم انه فى اليوم 20/4/2009  قام بعض الارهابين بقطع كل كابلات النت وشبكات التليفون المحمول والتليفونات الارضيه وشبكات الكهرباء فى جميع انحاء العالم  سواء كابلات بحريه بتجنيد الضفادع البشريه والاسماك المتوحشه او كابلات بريه جويه زراعيه صحروايه كله كله ولم يكتفوا بذلك بل قاموا بتدمير كل محطات البنزين اللى يقدروا عليها وفى طريقهم لتدمير كل الطرق الصالحه لسير السيارات  والقطارات  ولن يكون هناك اى وسيله اتصال اخرى  سوى  السفر على الجمال او المشى وسوف يتم تدبير جمل لكل مواطن حتى يتم تيسير عمليه الانتقال وفى شريط مسجل للجماعه الارهابيه -جماعه العوده للبدائيه- بررت الجماعه موقفها برغبتها فى العوده لحياه البدائيه واجبار الشعوب على التخلى عن وسائل التكنولوجيا الحديثه لما لها من اضرار الانعزال عن العالم الحقيقى وتقليل الترابط الاسرى واضرار ماديه حيث تسنزف اغلب دخول المواطنين فى وصلات النت والسيبر الساعه بجنيه ونص وكروت الشحن المختلفه وسوف يكون هذا اليوم هو اخر يوم للتعامل مع العالم الالكترونى هذا وقد اعذر من انذر واى حد هيحاول يوصل النت بتاعه او يتكلم فى التليفون باى طريقه من الطرق الملتويه هنعرفه شغله

انتهى البياااااان

ايه رأيكوا فى البيان ده ؟؟؟

تخيلوا فعلا لو قمنا يوم من النوم ملقيناش اى وسيله اتصال الكترونيه ولقينا مفيش نت ولا تليفون ولا اى حاجه ؟

طب لو قالولكم ان انهارده اخر يوم هتستخدم فيه الحاجات دى وانها ادامك لحد مهله معينه هتعمل ايه فى المهله دى ؟؟

هنعمل ايه مع الناس اللى بنتعامل معاها عالنت بس ما احنا مش هنعرف نكلمهم تانى

ولا اللى بنكلمهم عالتليفون بس هنوصلهم ازاى ؟؟

هل كل واحد هيقدر يتأقلم مع حياته الجديده ؟ وهل الوقت هيبقى ممل فعلا ؟؟

وهل فعلا احنا قصرنا فى حياتنا الحقيقيه والحياه الالكترونيه احتلت اهتمام اكبر عندنا ؟

وهل احنا فعلا أساءنا استخدان التكنولوجيا ؟؟

انا عن نفسى مش متخيله وضع زى ده ممكن اعمل فيه ايه ؟

بس حاسه ان الحياه هتبقى ضيقه اوى ؟؟

انتوا ايه رأيكوا ؟ وكل واحد هيعمل ايه لو ده حصل ؟؟

كويس ان النت شغال عشان اعرف اسئلكم وتردوا عليا :D


هناك 31 تعليقًا:

الازهرى يقول...

اول تعليق

الازهرى يقول...

هييييييييه
يحيا العدل

الازهرى يقول...

ببساطة جدا ارجع زى ما كنت زمان
ابعت جوابات واستنى الرد عليه
المشكلة عندى فى المواصلات لانى باسافر جدا جدا جدا
وده هيكون الضرر الكبير بالنسبة لى
اما بالنسبة لو قالوا لى ان اخر وقت للنت هو كذا
هابعت ام رسالة كده بعنوانى لبعض الشخصيات القريبة منى لنكمل تراسلنا بالوسائل القديمة

aMr saYed يقول...

ايه ده مش ممكن الي بتقوليه ده ازاي يحصل يعني

بس اكيد ساعتها هفكر اني اجيب حصان اروح بيه الجامعة او يمكن يكون جمل لا خليها حصان اسرع شوية

وكمان هجبلي حمام زاجل عشان المراسيل

واجبلي سنجة وسيف عشان الدنيا هتبقى ضلمة ومضمنش يمكن يطلع عليا واحد ضارب جوان بانجو ولا حاجة

aMr saYed يقول...

نسيت اقولك

تحياتي

hasona يقول...

السلام عليكم

طبعا الحياة هتكون صعبة وشبه مستحيلة

لكن أكيد هنحاول نعيش ونتعايش

وبخصوص الفترة أو سؤالك لو هناك مهلة
أقدر أشبها لك بطبيب بيقول لمريض انت طبيا خلاص قدامك فترة قصيرة وتموت
المريض ساعات بيكون عنده امل ممتزج بالرضا وساعات يتسرب الامل ويحل محله اليأس والقنوت وأوقات يحاول يعمل كل حاجة في نفسه
وهكذا

يعني اكيد كل منا هيكون له رد فعل مختلف تجاه الحدث الواحد

بس لو حدث ده كل واحد بقي يربي له جمل ولا فرس علشان يقضي عمره يزور أصحابه وأصدقائه

tamer.sala7 يقول...

اللي انتي بتقوليه ده يعتبر مبادئ ظهور انهيار الحضارة الانسانية وفي ابحاث كتير شغالة علي الموضوع ده يا ريت متطلعيش من الناس اللي بتعمل الابحاث دي


بس الموضوع ده مش غريب بالنسبة ليا لأنه حصل معايا مرة غصب عني بسبب ظروف الشغل اخدت مأمورية في منطفة اسمها ضاحية الجيش في العريش والمكان ده مكنش في تليفونات والشبكة بتاعه الموبايل وحشة جدا يعني علشان نعمل مكالمة واحدة بنمشي اكتر من ساعة بالعربية واحنا اصلا كنا رايحين علشان نوصل خدمة الانترنت في المنطقة يعني الانترنت مكنش موجود قبل ما نروح والمشروع اخد وقت طويل جدا


بس احساس فظيع اني ماشي من غير موبايل (حرية مش واخد عليها ) وبالنسبة للانترنت لو اتلغي افتكر انا اكتر واحد في الدنيا حيستريح من وجع الدماغ

غير معرف يقول...

ياخرررررررابي حاجة صعبة جدااا

ايام الحرب على غزة كنا زي كدا واكتر مفيش كهربة ومفيش شبكة ومفيش مية ومفيش اي حاجة

وفي صواريخ وضرب نار وموت ودمار وخوف

بس كانت ايام سودة ربنا مايرجعها

الحياة بتكون وحشة جدا

تحياتي ياقمر

Empress appy يقول...

اممممممممممم والله كلام مش بطال حلو اوى يعنى
انا موافقه استغنى عن كل دول
بس على فكره احنا فعلا او البعض اسائ استخدام التكنولوجيا وانا اتكلمت فى ده قبل كده يعنى اغلبيه الشعوب بتستخدمها صح واحنا بنستخدمها فى الغلط والاذى

احمد سعيد يقول...

بصى ياستى

انا هكلمك من منطلق تجربه انا مريت بيها من تسع سنين

انى اعيش فى عزله عن العالم لمدة شهر كامل فى وسط سلسله جبليه على البحر الاحمر

كان بينى وبين اول نقطه عمار حوالى ميه وعشرين كيلو مشى

ومشى وسط جبال , طالع نازل يعنى

تكنولوجيا مكانش فيه بمعنى الكلمه

لا كهربا ولا حتى بطاريه ولا اى حاجه

كل ما يربط بالحضارة هو اللبس

يعنى الحمد لله كنت لابس قماش
اينعم كان مقطع ومش نضيف

بس احسن ما البس ريش مثلا او جلد معيز

:)

بالليل اولع نار عشان ابعد التعابين والحيوانات واتدفى بيها

يعنى من الاخر لو شفتى فيلم كاست اواى هتفهمى الصورة كويس

وفى النهايه

حكمى على التجربه

ان دة كان اسعد شهر فى حياتى

بجد فعلا

تخيلى انك تنامى من غير ما تفكرى فى حاجه

تخيلى انك عمرك ما تقلقى وانتى نايمه

تخيلى كل حاجه ليها طعم

الاكل له طعم مع انه اقل كتير واسوأ من الاكل العادى بتاعنا

النوم له لذة لا توصف

بجد دى كانت اسعد ايام حياتى الى الان

واسوأ يوم واكتر يوم زعلت فيه هو كان ساعه ما كنت ماشى

وانا نفسى ارجع اعيش كدة تانى

فعلا كانت حياتى ليها معنى وطعم

امممممممم

مش عارف

غيرى ممكن يعتبر الظروف او العيشه دى كابوس يتمنى انه يصحى منه

بس انا بتكلم عن رأيى وتجربتى الشخصيه


تحياتى

Sweet Violet يقول...

هى اكيييييييييد هتكون صعبه جدااا

لكن الانسان بطبعه بيعرف يأقلم نفسه على ظروف الحياه المختلفة

يعنى اى نعم كل واحد رد فعله هيكون مختلف لكن فى الاخر الكل هيتأقلم على كده

بس تخيلى انى فعلا تصورت كده و بجد لقيت هدووووء نفسى حصل جوايا

مش عارفة ليه (:

prince4ever يقول...

مساء الجمال يا رودي
لو ده اخر يوم و اخر مهلة نستخدم وسايل اتصالات....ابدا...هنعمل ايه يعني؟...لو مثلا ده اخر يوم في حياة البني ادم و هو عرف كده و جتله م الكنترول...هيقضي اليوم كله يفكر هيقضيه ازاي لحد ما يخلص اليوم...الطبيعه البشريه بتكره المهلم المحدده و بتخاف منها...يعني لو ده اخر يوم كونيكشن هقعد افكر اكلم مين لحد ما المهله تخلص من غير ما تكلمي اتنين على بعض...
سيبك انتي...ده لو مفيش نت كنت ولعت في نفسي من زمان
سلام يا رودي

akeed يقول...

النت الان اصبح من ضرورات الحياة اليومية والبنوك والشركات الكبرى ونقل المعلومات بجميع انحاء العالم سوف تحدث كوارث بالمليارات ولا كن سوف يكون هناك امر ايجابى هو ان الدول سوف تعرف ان الامكانيات البشرية افضل من الامكانيات المميكنة فالانسان هو الاساس

تحياتى

أكيـــــــــــــــــــد

Abdallah Hosni يقول...

امممممممممممم تصدقي حاجة صعبة اوى

اكيد هنستغرب شوية او شويتين لكن هنرجع تانى اكيد نستخدم الحاجات البدائية وده الاصل فى الحياة مو نهاية العالم يعنى :) وهنخترع تانى الحاجات دى

مـجـنـووون يقول...

مشكلتنا أن التكنولوجيا والتقدم الي أحنا فيه جعلت الناس تقلل الترابط الاسري وخلتنا نفق حاجات كتيرة من عادتنا وتقالدنا

بعتقد لو النت فصل هتلاقي الناس تنام بدري
وهنلاقي الناس ترجع تقري تاني وتخلي الكتاب حاجه مهمه في حياتها


بس في نفس الوقت النت والتكنولوجيا مهمه كتير في حياتنا لانها بتوفر علينا حاجات كتيره قوي
وفعلا دلوقتي منقدرش نستغني عنها

تقبلي مروري
مجنووون

ألـــــــوان الحيــــــــاة يقول...

الازهرى

منورنى باول تعليق

حلو فكره انك تبعت رسايل بعنوان

وبالنسبه للسفر اهو الجمل موجود هينفعك كتير

تحياتى ليك

ألـــــــوان الحيــــــــاة يقول...

aMr tA3LaB

مفيش حاجه بعيده على ربنا D:

ابدأ بقى دور عالحمام الزاجل ووسائل الدفاع عن النفس من سيوف ورماح ومتنساش السنجه

بس هى الدنيا مش هتبقى ضلمه وانت ماشى عشان الناس كلها هتنام من المغرب

تحياتى ليك

ألـــــــوان الحيــــــــاة يقول...

hasona

لا على بال ما تربيه تكون المهله خلصت من زمان اصلا

بس انا اعتقد ان المهله اغلبنا يستغلها مثلا فى اننا نجيب عناوين النس اللى نعرفها من عالنت

تحياتى دوما

ألـــــــوان الحيــــــــاة يقول...

tamer.sala7

لا انا مبتشتغلش فى الابحاث دى دى مجرد فكرة طرأت على ذهنى

وانا هبقى اسعد واحده اصلا لو ده حصل

شرفنى مرورك كتير

ألـــــــوان الحيــــــــاة يقول...

نوارة

ربنا ما يعدوها ابدا الايام دى عليكوا يا جميل وينصركم ان شاء الله

نورتينى كتييير

ألـــــــوان الحيــــــــاة يقول...

آبى هانم

كل حاجه سلاح ذو حدين احنا دايما بنستخدم الحد اللى بيأذى مش عارفه ليه

النت له مزايا كتييييره جدا بس عيوبه اللى بتظهرعلينا دايما


نورتينى اكتر من اللمبه تخيلى D:

ألـــــــوان الحيــــــــاة يقول...

احمد سعيد

الله بجد يا بختك انك جربت حاجه زى دى ؟؟

انا عن نفسى نفسى اجرب اعيش حياه ابسط من البساطه وتكون فى مكان هادىء واشم هوا نضيف

بس سؤال؟


كنت بتنام مطمن ازاى وانت حواليك تعابين وحيوانات D:

منورنى اخر حاجه

ألـــــــوان الحيــــــــاة يقول...

sweet violet

انا برضه حاسه انى هبقى اهدى كتير لو ده حصل والحياه هتبقى جميله
يمكن عشان الحياه بتتعقد كل ما زادت تفاصيلها وتعقيداتها ومطلباتها ؟؟

من الاخر مفيش احلى من البساطه والبسيط بيجيب بسيط زيه

منورانى يا عثل

ألـــــــوان الحيــــــــاة يقول...

prince4ever

مساء النور يا برنس

ولعت فى نفسك ؟؟ ليه يعنى حاول تقلل شويه برضه من ارتباطك بيه احنا متولدناش لقيناه يعنى

وبعدين مش ممكن الجماعه الارهابيه تنفذ العمليه بجد ؟هتحضر البنزين والكبريت ساعتها ولا ايه ؟

تحياتى دوما

ألـــــــوان الحيــــــــاة يقول...

akeed

اكيد هتبقى كارثه طبعا بس احنا اكيد برضه تفكيرنا هيقودنا للابتكار والتأقلم مع الوضع الجديد

شرفنى مرورك

ألـــــــوان الحيــــــــاة يقول...

ılı. 3AbdAllah.ılı.

اكيد الحياه عمرها هتقف ولا الانسان هيبطل تفكير الا عند قيام الساعه والحساب بقى

وده رأيى برضه

شرفتنى كتييييير

ألـــــــوان الحيــــــــاة يقول...

مجنووون

الصعوبه هتبقى فى الاول والانسان هيبدأيفكر فى اشياء تانيه يشغل وقته بيها لحد ما يتعود عالوضح الجديد

نورتنى بجد

blue-wave يقول...

يا ساتر؟؟
لو كدا هاروح اكمل نوم:))

Nigm يقول...

Niceeeee

اول تعليق ليا هنا في المدونة ^_^

نايس مدونة اولا

احنا عاملين شباب صح بلوجرز لو تعرفي و احنا حوالي 12 تقريبا فيها
حتلاقيني حاططهم علي البلوج الرئيسي عندي

و
Another Welcome
:)

ألـــــــوان الحيــــــــاة يقول...

blue-wave

هههههههههه
احلى حاجه والله

نورتنى حضرتك كتير

ألـــــــوان الحيــــــــاة يقول...

Nigm

يا اهلا يا اهلا بحضرتك

مش بعرف بصراحه اللى بيقولى نايس ارد اقول ايه ؟؟ شمعدان^-^

وانا فى طرقى لشباب صح بلوجرز
ومبسوطه ان المدونه عجبتك

نورتى بجد