الخميس، 25 سبتمبر 2008

كل واحد يخلى باله من موبايله وفلوسه وسندوتشاته وكراسة محضاراته

معلش اتأخرت عليكم مش بايدى يعنى النور كان قاطع والنت كان فاصل و التلفون عطلان والميه بتقطع برضه يعنى كنت هبعتلكوا البوست على ضوء الشمعه مثلا عموما شكلنا كده هنعزل من البيت

زى ما حكيتلكوا قبل كده احساسى ليله دخول الجامعه يعنى كنت قلقانه شويه وده طبعا مخلانيش أنام غير ساعتين تقريبا , هو مكنش قلق اوى يعنى قد ما كان تشوق لمرحله جديده وحياه وجو تانى خالص. صحيت اول واحده فى البيت مع انى محضره هدومى من الساعه 10 بليل بس قولت اقوم يمكن يحصل حاجه طارئه ولا حاجه _يمكن الاقى الطرحه مش لايقه مع الهدوم ولا فيه حاجه محتاجه تتكوى تانى الاحتياط واجب برضه_بدأت ألبس بتأنى شويتين على غير العاده مهو انهارده مش اى يوم يعنى وخلصت لبسى وماما كانت صحيت ومنستش تبعا اخد فلوس المواصلات ونزلت بدرى جدا تحسبا لأى طوارىء برضه عشان احتمال كبير اوى اتوه فى السكه وانزل قبل المكان او بعده .
وأنا ماشيه بقى فى شارعنا لقيت العيال الصغيره لابسين لبس المدرسه ورابطين الكرافت وشايلين الشنط الكبيره دى كان شكلهم تحفه اصلا عاملين زى لعب الاطفال ياااااه ,هو انا كان بيبقى منظرى كده ؟ الحمد لله ان ربنا رحمنى من القميص البمبى والجيبه الرمادى مش عارفه كنت بلبسهم ازاى ؟؟قابلت واحده صاحبتى على اول الشارع وكان معاها واحده صاحبتها كمان وركبنا فى طريقنا الى الهدف المنشود
وصلنا عند الكليه من غير توهان الحمد لله لقينا زحمه كتير اوى عالباب ووقفنا كتير شويتين علشان كانوا بيعدوا واحد واحد ويشوفوا بطاقته ورخصته ...قصدى ..وصل مصاريفه كانوا محسسنى اننا فى لجنه مرور .دخلنا اخيرا وقابلت ناس صحابى ورحنا على شئون الطلبه عشان نشوف اسامينا ومجموعتنا ونعرف راسنا من رجلينا فى الكليه دى .لقينا ورق الاسامى متعلق واللى كان معلقه بجد كان انسان نبيه اوى ,كان حاطط الورق مش مترتب على حسب الحروف ولا المجموعات يعنى مثلا بدأ بالالف عادى و هوبا لقيناه دخل عالدال وقام مكمل الف تانى وأسهم بقى طالعه ونازله و أنا كل ده مش لاقيه اسمى نوهائى . رحت اسأل عند الست بتاعه شئون الطلبه _ست رخمه اوى على فكره-لقيت كارنيهى لسه مطلعش قلت قشطه اوى كده يبقى انا اروح اقعد فى بيتنا ومفيش كليه السنه دى .قابلت واحده تايهه كده زيى قمت خدتها تدور معايا على اسمى يمكن نلاقيه هنا ولا هناك .قامت البنيه لقيته اول اسم خالص فى ورقه كده مع نفسها مش باين عليها انهى مجموعه مش مشكله يعنى مش هنختلف عالمجموعه احنا كنا فين وبقينا فين ؟؟. مشينا انا والبنيه من الزحمه دى ولقينا سلم كده بيدخل على مدرج 3والناس عماله تدخل تدخل اكنهم بيدخلوا من ناحيه ويخرجوا من الناحيه التانيه مهو لا يمكن يكون كل دول بيدخلوا يقعدوا جوه , احنا مكناش مصدقين اننا المفروض ندخل معاهم بس افتكرنا ان الجدول كان مكتوب فيه اول محاضره م3 واحنا مكناش فاهمين يعنى ايه ؟ انا عن نفسى معرفش غير م5 (المغامرون الخمسه)دخلنا م3 وياريتنا ما دخلنا,لقينا البنى ادمين فوق بعضهم واحنا ماشيين لا اراديا بقوه الدفع فقط , ايه ده هو كله داخل صيدله زيى ,للدرجه دى أنا بقيت قدوه بقى وبيقلدونى ؟؟أنقذتنا العنايه الالهيه ولقينا مكان نقعد فيه,شويه كده والمدرج اتردم ناس الى قاعدين عالارض وعالسلالم والى عالشباك بيتفرجوا من بره مش عارفه ملهوفين على ايه كده دى محاضره يعنى مش ماتش الاهلى والزمالك .دخلنا واحد بتاع فيزيا-أكتر ماده بحبها-بس مقربش من الفيزيا نوهائى . اكتفى انه يكلمنا عن ذكرياته ايام ما كان قدنا - واحنا مالنا احنا-وقبل ما يمشى رصلنا اسامى 7 مراجع الى جانب كتاب القسم المفروض اننا نذاكر منهم والى عايز يتوسع يقدر يروح المكتبه,على اساس اننا هنذاكر للماجستير مش لاعدادى صيدله دخلنا واحد بعديه بتاع نبات تقريبا مش فاكره يعنى وكان بينهم شبه كبير اوى شكلا ومضمونا بس ده بقى محكلناش عن ذكرياته لانه كان كبير شويتين فكان ناسى يعنى بس فضل يوعينا ويدينا خبرته الطويله فى مجال التدريس (كل واحد يحط عينيه فى راسه ويخلى باله من موبايله وفلوسه وسندويتشاته وكراسه محضاراته وكراسه العملى بتاعته عشان الحراميه كتير )ده كان كلامه الى طمنا عالاخر.مش عارفه هنخلى بالنا من كل الحاجات دى ازاى؟ لازم بقى كل واحد وواحده ياخدوا مطوا تهم فى جيبهم عشان يحموا نفسهم(وبالنوسبه للشباب اللى مكنش معاهم بنات فى المدرسه بلاش تركنوا كتير عند الكافتيريا تبصبصوا للبنات عشان مش هينفعوكوا وهتلاقوهم هما نقلوا للسنه الى بعديها وانتوا لسه فى اعدادى )ده كان كلامه برضه , راجل كبير بقى وخبره , المهم انه رمى الكلمتين الى عنده ومشى .
بعد كده خرجنا من المدرج وقولنا نروح نشوف الكارنيهات خلصت ولا لأ , هما وقفوا بره وانا الى دخلت أسال فلقيت طابور طويل اوى كالعاده , خرجت قولتلهم مش هنقدر ندخل .قلنا خلاص نلف شويه فى المكان عشان نستكشفه ونبقى نرجع كمان شويه قبل ما نمشى تكون الزحمه خفت شويه .لفينا كتير وجالنا صداع من الشمس ورجعنا تانى عند الزحمه ودخلت برضه لقيت الطابور متحركش خرجت قولتلهم زحمه برضه مش هنقدر ندخل احنا نمشى بقى انهارده ونبقى نيجى وقت تانى . قالوا احنا ندخل ناخد دورنا فى الطابور أحسن ,دخلنا لقينا الزحمه مش عالكارنيهات اصلا وشباك الكارنيهات فاضى خالص ههههههههه -كانوا هياكلونى ساعتها-المهم ان هما اخدوا كارنيهاتهم وانا الست قالتلى لسه مخلصش مع انى مقدمه قبليهم اصلا , مش قولتلكوا انها رخمه ومستقصدانى من يوم التقديم بس انا مش هاسيبها ليها يوم اخد منها حقى .بس خلصنا الى احنا عايزينه وكل واحد اخد طريقه
وانا ماشيه قابلت واحده قعدت تسلم عليا ربع ساعه وتحضن بقى وازيك وعامله ايه وأنا اصلا كنت عايزه أنام ونفسى أسالها انتى مين اصلا؟الاخر خالص افتكرت انها كانت معايا فى درس فى تانيه ثانوى وطلعت معايا كمان فى الكليه وقابلت البنات الى كنت جايه معاهم وانا مروحه مع انى مشفتهمش طول اليوم وركبنا ووصلت البيت وجريت عالسرير عشان كنت هاموت وانام ونمت على طول قبل ما اوصل للسرير ومش رايحه لا بكره ولا بعده .وده كان اول يوم ليا فى الجامعه عقبال ما احكيلكوا كده على يوم تخرجى كماااان 5 سنين باذن الله

هناك 26 تعليقًا:

كـــيــــــــارا يقول...

اول تعليق هحجز الرد وراجعه اشوف حكايتك ايه

ألـــــــوان الحيــــــــاة يقول...

يا هلا يا هلا

منورانى باول تعليق

وانا اقول برضه ميت لحق يقرا بسرعه كده

مستنياكى

ألـــــــوان الحيــــــــاة يقول...

*مين

كـــيــــــــارا يقول...

عارفه يارودي اللي قابلتك بتاعت الكارنيهات دي

بتفكريني برده بواحده كانت في الشئون

كنت دخلت قولتلهم فين مدام هديه

راحوا يقولو لسه مش جت
بلف كده راحت واحده تقول مش هتفطري ياهديه

يالهوووووووووووي يخربيتكم

متقول هتفطر ليه تقول مش جت
ناااااااس شلل

اما بالنسبه للمحاضرات

احنا كنا 500 واتخرجنا 70

كنا بنركب فوق بعض ايام السكاشن بس علي مين

لما كان بيبقي عندي سكشن كنت بروح قبل السكشن بساعتين عشان اخد اول مكان

اومال مش بتاعت قعدت ارض انا وبهدله

خاصه السكاشن بيبقي عليها درجات مهمه لازم اكون مركزه ومش اضيع مني الدرجات

اما بقي بالنسبه لنصيحه الموبايلات وكدا

احب اطمنك اصحابي كانت شنطهم بالكامل بتتسرق

خلي باااااااااااااااااااااالك

سلاموز بقي :)

فاروق عادل يقول...

very good sorry my key bored is crazy when i mind it i will back go for ward

ألـــــــوان الحيــــــــاة يقول...

كياره

عارفه الست الى عندنا دى رخمه اوى

لحد انهارده مكنتش خدت الكارنيه

رحتلها ودخلت من باب الاوضه ووقفت ادامها والكارنيهات ادامها برضه

قالتلى لا لفى خديه من الشباك
عايزه تدوخنى وخلاص

كنت هاقتلها بجد
يارب صبرنى عليها

بس احنا بقى 1500

يبقى كده المفروض ينجح كاام ؟؟

وطمنتبنى عالاخر يعنى

شكلى فعلا هشترى مطواه تبقى معايا يمكن تنفع

او هبقى اخد بتاعتك

نورتينى يا قمر

ألـــــــوان الحيــــــــاة يقول...

طالب ثانوى

ربنا يشفى الكيبورد بتاعك وياريت تصلحه بسرعه عشان منقدرش نستحمل الانجليزى الجامد بتاعك ده كتيير

:))

شمس وقمر يقول...

السلام عليكم ورحمة الله
اول زيارة ليا بس بجد مدونة جامدة
بالمناسبة انا شمس
وفي تانية طب بشري...يعني بالطو برضه
اول يوم ليا في الكلية مش فاكراه اوي لاني اصلا مش عايزة افتكر
اي نعم احنا عددنا مش كبير اوي لكن نظامنا غريب اوي اوي
ربنا يتوب علينا بقى
دمتي بخير

mido يقول...
أزال المؤلف هذا التعليق.
ألـــــــوان الحيــــــــاة يقول...

شمس وقمر

منورانى بأول زياره ليكى ويارب ما تكون الاخيره

وربنا يتوب علينا جميعا

ومدونتك اجمد يا عسل

كـــيــــــــارا يقول...

لا مش بالنسبه ياتوتا

احنا كليتنا كانوا فاكرينها حفظ وبالتالي كل سنه نلاقي وقع مننا 100 او 150

جينا اخر سنه صفصفنا علي 120

نجح منهم 70 والباقي دبر وجاب مواد

ومن ال 70

20 جابو جيد والباقي مقبوووول


مش كنت بشيل مطوه الصراحه بس كنت دايما موبيلي في جيبي هو والفلوس والكارنيه والبطاقه اما الكتب بقي والورق في الشطه مش بيلاقوا حاجه ياخدوها ( وش بيغمز)

مصري بالغربة يقول...

كل سنة وانت طيبة

وفعلا سردتي اليوم بشكل جميل

وواضح انك فعلا مبسوطة , وربنا يوفقك ا شاء الله

-----------------------------------

بس انا نفسي اعرف حاجة

مين اللي دفه تذاكر المواصلات وانتو جاييننننننننننننننن

ههههههههههههههههههههههههههه

ألـــــــوان الحيــــــــاة يقول...

مصرى بالغربه

كل سنه وحضرتك طيب

وهما الى دفعوا واحنا جايين مانا دفعت واحنا رايحين بقى هو كل شويه

mido يقول...

ألف مبروك وبالتوفيق يا رودى
:)

mohamed يقول...

رودى عقبال ما تطلعى الكرنيه

وخلى بالك من الموبيل


والمحفظه

مبروك

غير معرف يقول...

مبروك المدونة..بجد كمييلة...بس دا انتى كدا اول يوم عندك كان تحفة دا انا اول يوم بالنسبة لى كان دمااار و من كتر اللف نمت فى اول محاضرة فى التكييف..و بعد كدا تهت و حضرت سكشن مش بتاعى اصلا و عملت حاجات غريييبة ربنا يوفقك يا قمر و يعيننا على صيدلة دى ..ها؟ عرفتينى؟ شكلك لسة مش عرفتينى ...مش مهم(وش مطلع لسانه)

فاروق عادل يقول...

انا جيت

الف مبروك على اول يوم فى الجامعة ومقولتيلناش انتى شرحتى ضفدعة ولا لسة

المهم بما انك فى صيدلة معنى كدة انك دحيحة جبتى كام فى تالتة انا كدة كدة علمى رياضة

ألـــــــوان الحيــــــــاة يقول...

mido

الله يبارك فيك

mohamed

طلعت الكارنيه بعد ما الست الرخمه دوختنى

وربنا يستر بقى عالموبايل والمحفظه

تحياتى

ألـــــــوان الحيــــــــاة يقول...

غير معرف

انتى ساره ولا ايه ؟

انتى الوحيده الى عندك تكييف

ألـــــــوان الحيــــــــاة يقول...

طالب ثانوى

اهلا وسهلا

انا مش فاهمه انت مستعجل عالضفدعه ليه مش فاهمه ؟؟

مفيش حاجه بتستخبى اول ما اشرحها هتعرفوا من الفضايح الى هاعملها فى المعمل

ألـــــــوان الحيــــــــاة يقول...

غير معرف

عرفتك خلاص

انتى مش ساره؟؟

صح

بنت الماضي يقول...

ياااااه
كانت ايااام
بجد فكرتيني بنفسي
الف مبروك صيدله وربنا معاكي شدي حيلك فيها
انا كنت بحبها...ههههههه
رمضانك كريم
ومدونتك لزيزه

ألـــــــوان الحيــــــــاة يقول...

بنت الماضى

رمضانك كريم

ومرورك جميل

وكل سنه وانتى طيبه

غير معرف يقول...
أزال أحد مشرفي المدونة هذا التعليق.
غير معرف يقول...

غير معرف

انتى ساره ولا ايه ؟

انتى الوحيده الى عندك تكييف
--------------
--------------
هههههه لا ...تخيلى فى اسيوط فيه تكييف و المدرجات جامدة و احسن من المنصورة و الاسكندرية و القاهرة كمان...النهاردة بأى كان اول يوم ليا بجد...فى جامعتى...صيدلة المنصورة...و مع انها ارخم جامعة فى مصر الا انى مش ارتحت الا فيها لانى اتعودت ع الرخامة D: المهم كان عندى محاضرة و المفروض اقدم ورقى لقيت الدنيا زحمة حضرت المحاضرة ال يعنى هتفيدنى بحاجة رجعت لقيت الدنيا لسة زحمة..بعد خناقات مريرة وصلت لاول الطابور و قعدت مستنياه ساعة لحد ما فى الاخر تطوع و قاللى تعالى بكرا الخزانة قافلة النهاردة!!!!!!كان هاين عليا اقتله...بعدها كان عندى محاضرة بردو بس رحت كملت اليوم فى تجارة...مش بقوللك يا بنتى من اولها انا ضايعة ضايعة ضايعة بس مش هعرف انام تانى عشان مفيش تكييف :( نفسى اجيب البالتو بأى و اشرح الضفادع D: معلش طولت عليكى بس اكيد عرفتينى بأى مش معقول انتى هبلا للدرجة دى P:

ألـــــــوان الحيــــــــاة يقول...

اندى

ماقولنا عرفتك خلاص لازم التسيح ده

بقى انتى لسه فاكره تروحى الجامعه انهارده اول يوم , دانتى على قلبك مراوح , لا ولسه بتقدمى وعايزه كماان ميبقاش فيه زحمه؟ الزحمه دى حاجه اساسيه, دانا لو رحت مره لقيت الدنيا رايقه اتخض , ومستعجله ليه عالضفادع بس , هبقى اجيبلك بتاعتى تشرحيها

منوره يا قمر