بين الآباء والأبناء

امبارح وانا فى الكلية لقيت واحدة صبحتى مسنتحه كده ومسبهلة على غير عادتها فقل متجيش برضة اسيبها فى حالها لازم اروح انكشها شويه واعرف مالها , المهم مكدبتش خبر وروحتلها



أنا : ايه يا بنتى مالك كده ضاربه الوش الخشب كل ده عشان هنشرح فرافييير وارانب الترم ده , عادى يعنى لا داعى للقلق كلنا هيغمن علينا فى اول سكشن ده قدرنااااا



هى : لا عادى انا مستغنيه عن العشر درجات بتوعهم اصل الحكايه مش ناقصة



انا : قولتييييييلى بقى ايه هى الحكاية اللى مش ناقصة دى



هى :مفيش !!



انا :ايه يا بت انتى يابت !!قولى قولى متخافش سرك فى بير مخروم ان شاء الله .



هى :دماغى وجعتنى من كتر التفكير مش عارفة اعمل ايه ؟



انا :فى اية ؟!!



هى : فى اى حاجه وكل حاجه مش عارفة اخد اى قرار فى اتفه الامور فى حياتى , حاسه انى تايهه مش عارفة ابقى ازاى ؟عايزة اعمل اللى يرضى ربنا ويرضينى ويرضى اللى حواليا

انا : وايه اللى مخليكى مش عارفة تاخدى قرار ؟؟

هى : مجربتش قبل كدة اخد اتصرف فى حياتى بطريقتى , من وانا صغيرة ولحد دلوقتى كمان وماما وبابا هما اللى بيتصرفوا فى كل شئونى ولما كنت بطلب انى أنا اللى اتصرف فى حاجة بيبقى دايما الرد انى هيضحك عليا ومش هاعرف اعمل حاجه وهما ادرى

انا :معظم أبهاتنا وامهاتنا بيحبوا يكونوا المسئولين عننا مهما كبرنا لاننا فى نظرهم بنفضل صغيريين وهما بيفضلوا اكثر خبرة مننا

هى : بس انا نفسى اجرب واغلط واتعلم , مهما اما كانوا فى سننا كانوا بيجربوا عشان كده اخدوا الخبرة دى ، امال احنا هنتعلم امتى ناخد قراراتنا بنفسنا ومش بيدونا الفرصة نعبر عن نفسنا برؤيتنا احنا مش برؤيتهم هما ؟؟

انا : مهو ده برضة نابع من حبهم لينا وانهم مش عايزينا نقع فى نفس غلطاتهم زمان فالهدف صح وان كان فى بعض الاوقات الاسلوب غلط

هى : انتى عندك حق بس مهو الاسلوب ده هو اهم حاجه وحسب الاسلوب بختلف رد فعل الشخص يعنى لو كان الاسلوب مقنع اكيد هقتنع وهنفذ اللى هما عايزينه برضا وقناعه منى انما اسلوب العافيه اللى بيتبعه اغلب الاباء مع اولادهم ده بيزيدهم عند وبيعملوا الحاجه وهما حاسين انها مفروضه عليهم حتى لو كانت صح فيها ايه لما الام بدل ما تهدد بنتها مثلا انها لو عملت كذا مثلا هتوريها وهتسوى وهتخلى مهى لو قعدت معاها وفهمتها المزايا والعيوب وسابتلها حرية الاختيار فى الاخر هيبقى افضل كتيير

انا : هرجع واقولك ان برضه الام بتخاف على بنتها وهتخاف انها تختار غلط وبعدين اللى انتى بتكلميه فيه ده مشاكل جيل بحاله من الابناء مه جيل كامل من الاباء ومتهيألى اما نبقى زيهم كده هنخاف على ولادنا برضه بس اعتقد انه هيبقى مع اختلاف الالوب اللى ميخليهمش يفقدوا الثقه بنفسهم وعموما يعنى متأزميش نفسك وخدى الموضوع بالتدريج يعنى تقدرى تتناقشى معاهم بهدوء وتحاولى تزودى مساحه حريتك وتوسعى قرارتك

هى : ياريت بجد اقدر اوصل لحل يريحنى ادعيلى بس انتى

انا : ربنا معاكى ومعانا يستى , يلا اسيبك انا بقى عشان عندى سكشن بعيد عنك

هى : عندك سكشن فيراااااااان ولا ايييييه ؟؟

انا : لااااااا حرام عليكى يا شيخة لسه بدرى يا بارده انتى

هى : طويب عموما مسيرك هتقابليهم روحى بقى عشان مش تتاخرى

انا :طيب سلام بقى

هى : سلام

مشيت انا بقى وبتها تكمل سنتحة ورحت لقيت مفيش سكشن حمدت ربنا وانا فى السكة للبيت قعدت افتكر الحوار اللى دار بينى وبينها .ياترى فعلا سيطرة الام والاب على افعال اولادهم صح ولا غلط , بيفيدهم ولا بيضرهم ؟؟امتى فعلا بيحسوا انهم خلاص اتعلموا ويقدروا يعتمدوا على نفسهم ؟

انتوا ايه رأيكوا بقى فى المناقشه والكلام ده ؟؟؟

زياره لمعرض الكتاب

اول امبارح اللى هو 4/2/2009 كان يوم ممتع جدا بالنسبه لى بجد استمتعت بيه جدا وكان نفسى يطول اكتر من كده لانه كان زياره للقاهره ومعرض الكتاب وطبعا دى تعتبر اول مره اروحها وانا كبيره فكانت حاجه مشوقه بالنسبه لى

بعد ما دوخنا _انا واخويا_فى المقارنه بين المواصلات المختلفه عشان نختار حاجه نروح بيها تكون سريع وامنه فى نفس ذات الوقت استقرينا عالقطر اللى بيروح للقاهره مباشره من غير ما يقف فى النص

كنا فى محطه سيدى جابر مستنين قطر الساعه 7 من الساعه 6.30 وده طبعا نتيجه لالحاح ماما فى النزول بدرى وبالتالى كنا اول ناس فى المحطه

جه القطر وركبناه وكنا رقم كرسينا 57/58 _متسالوش ايه اهميه المعلومه دى عشان هتعرفوا بعدين_وبجد السفر فى القطر ده ممتع جدا عن اى طريق تانى يعنى قدرنا نتفرج عالطريق والمدن المختلفه من الشباك وبجد المناظر كانت روعه فعلا ولسه المساحات المزروعه كتيره وجميله والبيوت الصغيره ادام المزارع والهوا النقى بجد احسن كتير من عماراتنا العاليه وهوانا الملوث والزحمه والخنقه وطبعا اى سفر لازمله السندوتشات والميه وجريده الدستور اللى متقلش اهميه عن الاكل والشرب بالنسبه لاخويا واللى مفرقتهوش طول المشوار

وصلنا القاهره الساعه 10 وده لان القطر اتملكع فى السكه وكنا ممكن نوصل قبل كده بكتير واول منزلنا حجزنا رحله العوده على قطر السابعه مساء

بعد كده روحنا نشوف هنركب ايه عشان نوصل ادام الباب الرئيسى للمعرض وربنا رزقنا بمينى باص ابن حلال ركبناه ووصلنا هناك واول منزلنا كنت انا متفقه مع بنات صحباتى من هناك يقابلونى عند البوابه الرئيسيه

وعلى الرغم من تاكيدات ماما على اخويا انه ميبش ايدى طول الرحله الا انه اول ما وصلنا فص ملح وداب وراح يدور على صاحبه وسابنى

بعد ما تم الاتصال بينى وبين البنات وفضلنا نص ساعه نوصف لبعض احنا لابسين ايه وانا ولا شايفاهم ولا هما شايفينى اكتشفت انى واقفه الناحيه التانيه خالص عند البوابه 5/6 وهما عند البوابه الرئيسيه
بعد كده دخلت اقابلهم واتقابلنا فى نص المسافه

لفينا شويه فى المعرض وطبعا كبير جدا وهما بقى كانوا عارفين مداخله ومخارجه وكل حاجه اكنهم بيباتوا فيه وبالتالى كنت انا ماشيه على اساس معلوماتهم

بعد كده اتجهنا للمقهى الثقافى عشان نحضر الندوه لبعظيمه بتاعه د/نبيل فاروق ود/احمد خالد توفيق ود/تامر ابراهيم ود/محمد سليمان عبد الملك وكانت فعلا ندوه قيمه اوى دارت حول عنصر الاثاره فى الادب العربى وانه ايام زمان كانت الاثاره موجوده بس مش بالمقدار الموجود دلوقتى لان زمان كان ايقاع الحياه بطىء وبالتالى كانوا محتاجين يشغلوا وقتهم بقصص ايقاعها بطىء انما دلوقتى مثلا محدش هيصبر على قصه ايقاعها بطىء لان ظهرت حاجات كتير تشغل الفراغ زى النت والتلفزيون وحاجات كتير نقدرنشغل بيها وقت فراغنا فاصبح عنصر الاثاره والسرعه بارز اكتر .

وطبعا كان الندوه زحمه جدا وعرفت بعد كده ان دى اعلى ندوه من ناحيه نسبه الحضور تم تنظيمها خلال ايام المعرض

بعد كده بدانا نكمل جولتنا وروحنا سور الازبكيه بجد مكان تحفه فعلا مليان كتب قيمه جدا ومراجع علميه ورخيصه فى نفس الوقت اشترينا بعض الكتب والروايات والقصص الاجنبيه

بعد كده اتجهنا للمؤسسه العربيه اللى بتصدر روايات نبيل فاروق واحمد خالد توفيق وكتاب تانيين كتير واشترينا روايات كتييييييييير لان ده نوع القرايه اللى بيستهوينى اللى جانب المجالات الاجتماعيه والعلميه والدينيه

وكانت المفأجاه اننا لقينا د/نبيل فاروق ادام باب المؤسسه وكانت فرصه كويسه اوى اننا نقدر نقف معاه شويه واخدت توقيعه على اربع روايات واخدناله صورتين جامدين كمان

كملنا تجولنا فى المعرض الواسع ده اللى مبيخلصش واشترينا كتب كتير وبعد كده كنت بدور على روايه يوتوبيا ومش لاقياها وكتاب خالد كساب بس لقيت اخويا بيكلمنى كانت الساعه بقت 5.30 وكان بيقولى استعد عشان نمشى وكان بيقولى انه واقف دلوقتى ادام خالد كساب واحمد خالد توفيق

وانا رايحه عشان اقابله كنا ادام دار ميريت ببص ادامى لقيت احمد خالد توفيق ادامى انا هو وخالد كساب ومحمد فتحى وهو صحفى شاب بيكتب لجريده الدستور وكتب برضه روايات كتير وكان هو اللى بيقدم الندوه اللى حضرناها الصبح وبالتالى لقيت اخويا واقف ادامى وانا بكلمه فى التلفون عشان اعرف مكانه
وكانت بجد مسك الختام للرحله انى جبت يوتوبيا واخدت توقيع د/احمد خالد توفيق وبرضه وقفنا نتكلم معاه شويه

بدأنا رحله العوده وكانت الساعه بقت 6 وادامنا ساعه عشان نلحق القطر وطبعا هو المعرض مكنش بعيد اوى عن المحطه بس احنا مكناش عارفين المواصلات هتبقى عامله ازاى ولا نركب ايه ولا اى حاجه

وقفنا شويه وبرضه الحمد لله ربنا رزقنا بمينى باص ابن حلال وصلنا المحطه وركبنا القطر وبرضه لقينا مكانا رقم 57/58 وفى نفس الزوايه اخر كرسيين فى القطر زى ما كنا رايحيين تماما فكانت صدفه لذيذه وكان المكان محجوز لنا

وصلنا فى امان الله الساعه 9 عشان تعرفوا ان قطر الصبح كان بيتملكع فى السكه وكانت فعلا رحله جميله اوى واتمنى تتكر تانى

عارفه انى رغيت عليكوا كتير اوى بس حبيت اعرفكوا تفاصيل يومى الجميل لانى كنت مبسوطه اوى ساعتها

واسيبكوا بقى مع شويه صور

دى واحنا رايحيين الصبح فى القطر

وده طبعا د/ نبيل فاروق

ودى د/احمد خالد توفيق

وده عبد الملك عسول اوى مقدرناش نسيبه فى حاله وهو بيلعب ادامنا كده

وكل معرض وانتوا طيبين :)

وهنيالك يا فاعل الخير _و_ الثواب !!

اولا من قبل ما ندخل فى الموضوع

مكنتش عارفه اسميه ايه

مش عارفه اسمها هنيالك يا فاعل الخير الثواب اللى هتاخده يعنى

ولا هنيالك يا فاعل الخير والثواب


اصلى مجربتش اشحت قبل كده D:

ما علينا يعنى متخدوش فى بالكم

نبدأ بقى

ـــــــــــــــــــــــــــــــــــــــــــــــ


السلام عليكم



ازيكوا يا جماعه عاملين ايه ؟ يارب تكونوا بخير

كان فيه حاجه بقالها مده شغالانى ومش لاقيه لها اجابه

هعرضها عليكوا من خلال موقف حصلى قريب

من مده كده كنت لسه جايه من بره وداخله بيتنا

لقيت الباب خبط

وغالبا ماما بتقولى متفتحيش لحد لان عندنا بيبقى فيه مندوبين مبيعات رخمين وناس غريبه كده بتخبط

وبما ان مفيش بواب ولا أمن عالعماره فاحنا مش بنفتح لاى مندوبين مبيعات

فانا اما الباب خبط الاول مفتحتش

لكن لما لقيت اللى عالباب مستمر برضه انه يضرب الجرس فكرت يمكن تكون واحده جارتنا عايزه حاجه او كده

فتحت لقيت واحده واقفه

هى كانت شكلها عادى يعنى مش مبهدل ولا حاجه

انا كنت لسه برضه بحسبها واحده ساكنه معانا

بس انا لقيتها بتعيط وقربت من الباب اوى اكنها هتدخل

انا اصلا خفت منها

وفضلت تحكيلى على حاله وفاه وحد اتوفى وهى معهاش فلوس

فانا بصراحه مكنتش عارفه اتصرف لانى كنت قلقانه منها اصلا وفى نفس الوقت كانت صعبانه عليا

انا اصلا مكنتش سامعه هى بتقول ايه بس لانى كنت وقتها مركزه فى انى مش عارفه هى بتضحك عليا ولا نصابه ولا ايه؟؟؟

اقفل الباب ولا ادخل اساعدها؟؟

طب مانا لو دخلت ممكن تدخل ورايا ولا حاجه وفكرت كمان انها ممكن تكون بتمثل عليا

المهم انى قلتلها انا اسفه بس مفيش حد موجود دلوقتى

اللى استغربتله بقى انها مثلا مزودتش فى الكلام لا دى قاللتى حاضر حاضر واختفت

وده اللى ضايقنى اوى وحسيت انها كانت محتاجه فعلا وانى مش ساعدتها وانى كنت قاسيه اوى لان غالبا الناس اللى بيطلبوا مساعده بيبقوا كثيرى المحايله

بس هى كانت بتقول انها ساكنه فى منطقه تعتبر بيعيده عننا شويه

معقول تكون لفت عالبيوت دى كلها لحد ما وصلتلنا ومحدش ساعدها

انا بجد ببقى محتاره فعلا ادام الناس دى

هما فعلا بيبقوا محتاجين ولا بيبقوا بيمثلوا؟؟

يعنى الناس اللى بتبقى فى الشوارع قاعده تطلب المساعده

بتبقى فعلا محتاجه ؟؟

طيب ليه ميشتغلوش اى حاجه معقوله فيه حد يقعد طول اليوم يطلب المساعده من الناس

ويوميا كمان

هى دى بقت وظيفتهم

طيب والناس اللى بتمشى تنادى فى الشوارع واحيانا بالميكروفونات كمان

معايا ابن مريض وكذا كذا كذا

دول برضه بيبقوا محتاجين ؟

دول احيانا بيبقوا مأجرين تاكسى وحاطين الميكروفون فوق وبينادوا

معقوله دى يعنى ؟؟

ده حتى اى انسان محتاج بيبقى محرج يقول انه محتاج

ومفيش حد بيحب يقلل من نفسه بل بالعكس كله بيبقى عايز يظهر فى احسن صوره واحسن حاله

ده حتى بابا مره بيحكيلنا

انه مره كان فى المحطه

فلقى واحده بتطلب منه فلوس عشان تسافر لجوزها فى بلد تانيه

قام بابا مساعدها

بعديها باسبوع لقى نفس الست بتطلب منه فلوس عشان تسافر لجوزها

قام بابا قالها هو انتى لسه مسافرتيش؟؟؟

تفتكروا الناس دى محتاجه مساعدتنا ليهم ولا لا ؟؟

عدنااااااااااااااااااا

خلاوييييييييييص

الحمدلله خلصت امتحانات اخيرا

بعد عناء شهرين ونص تقريبا

بجد افتقدكم جميعا

وانتوا اكيد نسيتوا شكلى اصلا

دانا اصلا مكنتش بدخل عندى


معلش ان شاء الله هلف عليكوا كلكوا اقرا كل اللى كتبتوه فى غيابى

_________________________________________

المهم مطولش عليكوا

لا طولى......

انهارده وانا نايمه بعد الامتحان قعدت افتكر وانا صغيره _هو فيه حد بيفتكر وهو نايم يا بت _معلش عدوها
المهم

قعدت افتكر وانا صغيره حاجات كده رفنعه يمكن مكنتش هافتكرها لو كانت حصلت لى وانا كبيره

يعنى مثلا مره وانا وانا فى الحضانه

كانوا حطينلنا لعب كتيره اوى

مرصوصه

بنلعب بيها يوم الخميس بس

ولعب معينه كمان عشان العلب الغاليه متبوظش

واللى يبوظ لعبه كان بيبقى يا ويله يا سواد ليله

فاكره اول يوم فى اولى ابتدائى

كنت رايحه بقى لابسه اليونيفرم الجديد

ومعايا مصروفى وسندوتشاتى فى شنطى وشنطتى على ضهرى

فاكره ميس منى بتاعه العربى كنت بحبها وكنت بتقعد تحفظنا النصوص بطريقه حلو اوى

كنت بحفظ بسرعه اوى وانا صغيره

كان يبقى بابا بيحفظ اخويا الكبير وانا قاعده القط منهم واحفظ قبليه

دلوقتى طبعا كله ضايع فى الزهايمر اكيد


عشان كده دايما بينصحوا بحفظ القرآن فى السن الصغيره

عشان كده كمان المفروض فى مدارس الابتدائى وقبل كده كمان

يستغلوا الميزه الرهيبه دى فى الاطفال

ويحفظوهم ويدربوهم على مهارات كتيره من صغرهم

فاما يكبروا تكبر معاهم وعمرهم ما ينسوا حاجه ابدا

و ده طبعا لازم يكون بمراعاه مواهب كل طفل وميوله

يعنى اللى بيحب العلوم والرياضه ينموه فى المجال ده والللى بيحب الخرايط والجغرافيا يحفظوه الخرايط والاماكن باسلوب سهل وجميل

عشان عمره ما يتنسى

انا بقى اصلا برغى عليكوا كل الرغى ده ليه

عشان تشوفوا الفديو ده









اهى الطفله دى اما تكبر هتبقى بوصله متحركه

عمرها ما هتنسى اى مكان وهتبقى ضليعه فى الجغرافيا

وهتنمى موهبتها لما تكبر كمان لو هى حبت المجال ده

ذاكره الاطفال دى بجد كنز لازم نستغلها كويس لصالح مستقبلهم وحياتهم

بدل الزهايمر اللى احنا فيه ده...........

مش انتوا عايزين تساعدوا غزة ؟ طب تعالوا اقولوكوا عالفكره دى

طبعا كلنا شايفين مأساه أهل غزه وزعلانين عشانهم

بس زعلنا لوحده مش كفايه

هتقولوا احنا مش بايدينا حاجه نعملها

اقولوكوا لا طبعا بايدينا ومش حكامنا بس اللى هيتحاسبوا عشان سايبينهم يتعذبوا ويموتوا

لا احنا كمان هنتحاسب عشان سايبين اخواتنا كده من غير مساعده

مش عايزين نعمل زى ما كل مره بنعمل ونفضل نتكلم كتير وقت الحاثه وشويه شويه الكلام يقل واللى ماتوا يتنسوا

طيب ايه رأيكوا بكره ان شاء الله نصوم كلناوندعي وقت الافطار لاهل غزة واكيد ان شاء الله مش

هيرد دعائنا

ويا ريت كمان كلنا نوحد الدعاء لأهل غزة فى صلاة القيام

ياريت نبلغ كل اللى نعرفهم بصيام بكره من اجل غزه والدعاء لأهلها

ولو وحدنا صيام يوم الاتنين والخميس يكون افضل برضه

‏اللهم إنا ‏نشكو ‏إليك ‏اليهوداللهم ‏إنا ‏نشكو ‏إليك ‏اليهود ‏فإنهم ‏لا ‏يعجزونك ‏يا ‏جبار ‏السموات ‏والأرض

‏اللهم ‏إحصهم ‏عددا ‏واقتلهم ‏بددا ‏ولا ‏تغادر ‏منهم ‏أحدا .‏وأنزل ‏عليهم ‏عاجل ‏نقمتك ‏اليوم ‏أوغدا‏اللهم ‏أحزنهم

كما احزنونا وآسفهم كما آسفونا

اللهم ‏يتّـم ‏أطفالهم ‏ورمّـل ‏نساءهم ‏وعقّـم ‏أرحامهم ‏وأرّق ‏نومهم

‏اللهم ‏اجعل ‏بيوتهم ‏عليهم ‏ردما

‏اللهم ‏اجعل ‏قنابلهم ‏عليهم ‏دمدما ‏وعويل ‏نساءنا ‏عليهم ‏همهما

‏اللهم ‏اجعلهم ‏عبرة ‏للمعتبرين

اللهم ‏ومن ‏أرادنا ‏والإسلام ‏بخير ‏فوفقه ‏لكل ‏خير‏ومن ‏أرادنا ‏والإسلام ‏بسوء ‏فاقسم ظهره ‏واجعل ‏كيده

‏

فى نحره ولا تمهله بين يوم وامسه

اللهم ‏حرر ‏المسجد ‏الأقصى ‏من ‏دنس ‏اليهود ‏المعتدين .

‏اللهم ‏اكتب ‏لنا ‏الصلاة ‏فيه والشهادة ‏على ‏بابه.. ‏اللهم ‏اكتب ‏لنا ‏الصلاة ‏فيه ‏والشهادة ‏على‏بابه ..‏اللهم ‏اكتب ‏لنا

الصلاه فيه والشهاده على بابه

اللهم آميييييييييين آميييييييييين يا أرحم الراحمين .

اصابه ...قتل ....حرق....تحرش...أحمدك يا رب

*حريق مجلس الشورى والمسرح القومى
* انهيار صخور الدويقه ومازال الضحايا تحت الانقاض
* تحرش ظباط شرطه بشقيقتان
*مدرسان يعتديان بالضرب على ولى امر أمام أبنائه الاربعه
* مقتل الطفل اسلام على يد مدرسه
*اصابه 15 طالب ضربهم مدرسهم (بالمقشه )
*مقتل واصابه35 سائحا اوروبيا اثر انقلاب حافله جنوب مصر
*مدرس ابتدائى يغتصب تلميذا فى دوره مياه المدرسه
*فقدان مركب امام سواحل رشيد على متنه 200 شاب كانوا فى طريقهم للهجره الى ايطاليا
*موظف يقتل طالبا بسبب خلاف شقيقيهما الصغيرين فى الشرقيه

كفايه كده عشان لو فضلت اكتب من هنا للسنه الجايه مش هخلص

انا بس عايزه افهم ايه اللى بيحصلنا ده ؟؟

ايه كميه المصايب اللى عماله ترف على دماغنا دى

كل يوم بنسمع عن ناس ماتنوا او اتحرقوا او اتقتلوا

كنا الاول لما تحصل حادثه قتل غريبه او حريق بنستغرب وبتبقى حاجه مش معتادين عليها

لكن احنا خلاص سمعنا اعتاد على اخبار القتل والمصايب

متهيألى لو يوم محصلش فيه حاجه كده هنستغرب

ازاى يوم يعدى من غير ما يحصل حاجه

وهل لو الوضع استمر على كده هيبقى فيه ضحايا وقتلى كل خمس دقايق ولا ايه ؟؟

ليه الناس بقت بتتصرف تصرفات غريبه وبقت تعتبر مالوفه وعاديه

يعنى اللى بيقتل ده بقى متعود خلاص ولا ايه

مش بعيد بعد كده كل واحد يصحى من النوم الصبح يقول اه انا ما اقتلتش حد امبارح يبقى انهارده باذن الله هقتلى اتنين كده عشان اعوض

انا مش عارفه احنا رايحيين على فين ؟

الناس بقت بتخاف تمشى فى الشارع او تنزل من بيتها

انعدم الامن والامان والاطمئنان واى حاجه ليها علاقه بالهدوء

ولسه.....

المواجهه المنتظره !!!

اخييرا بعد تفكير طويل ومباحثات مريره وحجج واهيه ...قررت اخد الضفدعه معايا البيت, بعد ما توصلت الى انى لو اعتمدت عالسكشن فقط يبقى هشيل الضفادع السنه دى .

وقلت فرصه برضه اخدها ومحدش موجود فى البيت منعا لاى تريقه او ازعاج , خاصه ان ماما كانت حذرتنى من دخول الضفدعه البيت لأنها مش بتحبها . وأنا مالى بقى يعنى هى متحبهاش وأنا أسقط مثلا.

بعد المحاضرات رحت للراجل بتاع الضفادع وأنا بقدم خطوه وبأخر خمس خطوات , ووصلت عنده لقيت عليه زحمه وكله بيشترى ضفادع, وأل ايه الضفدعه الوسط ب 3 جنيه والجامبو ب 3.5 ,دانا كده هخلص مصروفى عالضفادع السنه دى .

حتى الراجل ده طلع مادى اوى بيشيل الضفادع الكبيره عشان يتاجر فيها والصغيره اللى مش باينه يديهالنا فى السكشن , قررت اشترى ضفدعه وسط عشان اعرف الاول اتعامل معاها ازاى لانها اول مره ليا وبعدين ابقى اشتغل عالجامبو .

حطيت الضفدعه بكيسها فى جيب خارجى للشنطه _ الجيب ده المفروض بحط فيه الموبايل على طول بس شلته حطيته فى جيبى _ وسيبتيلها فتحه صغيره تتنفس منها مع ان الكيس اصلا مقفول بس قولت اريح ضميرى وخلاص .

لقيت الترام اللى بدورين جت قولت اما اركب فوق وبالمره افسح الضفدعه وافرجها الدنيا فى لحظاتها الاخيره . وكل شويه بقى وانا قاعده انسى وافتح الجيب عشان اطلع الموبايل الاقى الضفدعه قاعده اقوم قافله بسررررعه احسن تنط ولا حاجه واكييد مش هعرف اجيبها تانى .

كنت لسه ما جبتش سبرتو عشان التخدير فقلت اجيب وانا فى السكه و دخلت اول محل بقوله : عندك سبرتو احمر ؟! قام بصلى كده وقاللى : سبرتو !!! احنا ناس بنصلى وبنعرف ربنا سبرتو ايه ؟؟ و اخذ يقهقه كثيرا
رحت لواحد تانى : عندك سبرتو احمر ؟! فابتسم ابتسامه عريضه وقاللى : لا طبعا !! مش فاهمه طبعا ليه يعنى محسسنى انى هاخده اشربه !!!
روحت منغير ما اجيب سبرتووكلى حزن على مصير الضفدعه المجهول وكلمت بابا فى التلفون بصوت اقرب للبكاء : يا بابا هاتلى معاك سبرتو احمر عشان مش قادره اتفاهم مع الضفدعه ! وتبعا لم أسلم من بعض التريقه من نوعيه : تحبى اجبلها اكل كمان ؟؟ أنا : هو انا هاربيها هات سبرتو بس ومتنساش .

شويه كده وبابا جه وجاب السبرتو معاه والضفدعه لسه قاعده فى العلبه اللى حطيتها فيها وهى جوه الكيس برضه وقمت كبيتلها سبرتو من الازازه جوه العلبه وبرضه غرقت قطنه وحطيتها لها زياده تاكيد يعنى عشان أضمن انها مش هاتصحى ابدا وانا بشرحها .

سيبتها عشر دقايق كده و رحت فاتحه العلبه بعد كده لقيتها يعينى مزرقه كده ومسبهله عالاخر!! قلت ايه ده دى ماتت ولا ايه ؟!! زعلت اوى اوى كان نفسى تموت على ايدى مش قبل ما اعمل فيها حاجه كده .

بدأت اشرحها بدون أمل وعماله اقطع فيها براحتى بقى مهى مش عايشه يعنى مش هتحس بحاجه.

بعد ما وصلت للقلب كده , لقيت المفأجاه .......قلبها لسه بينبض هيييييييييييه لسه عايشه , فرحت اوى اوى اكنى كنت بعملها عمليه قلب مفتوح ونجحت .

ازدادت الحماسه جوايا وشلت بقى الكبد والقلب والمعده والمرىء والمراره وكله كله وشوفت اللى عايزه اشوفه وفضيتها عالاخر .

بعد ما خلصت لميت اثار الجريمه دى بسرعه ورميت الضفدعه ولا اكن حاجه حصلت , بس لسه بقى عايزه اجيب واحده تانيه عشان ابقى جاهزه من الاول بالسبرتو والذى منه , مانا خلاص بقيت خبره فى الضفاديع .

وكل ضفدعه وانتوا بخير ..........

الرجاله ماتوا فى الحرب خلاص......

انهارده بس صدقت ان الرجاله ماتوا فى حرب اكتوبر

بعد اللى سمعته من واحده صاحبتى وهى بتحكى الموقف اللى شافته بعينيها واللى بتقسم انه لو كان اتحكالها مكنتش صدقته

أنا نفسى مش متخيله ازاى ده حصل

بجد انا اتضايقت واتنكدت ان ده بيحصلنا

ليه بقت الاخلاقيات فى النازل وقله الادب فى الطالع ؟؟

ده اكييد غضب من ربنا علينا عشان بعدنا عن دينا ؟

لو مكنش كده هيبقى ليه ؟

انا فعلا مش لاقيه كلام اقوله بس هسيبكوا مع اللى البنت حكته بلسانها :


بسم الله الرحمن الرحيم
كنت بسمع الكلمة دى كتيييييييييير اوى
بس مفهمتهاش غير النهارده بجد
(( ماتوا الرجالة فى حرب 1973 ))
بجد
والله العظيم شئ محزن جدا
مصر واللى اولادها كانوا معروفين بالجدعنة والاخلاق والرجولة
معرفش ايه حصلهم
لنخوة انعدمت مبقيتش تلاقى راجل فى الزمن ده
والموقف ده حصلي النهارده
كنت راكبة الميكروباص عودة من الجامعة وبعد رحلة شاقة فى المترو
وحصل شد ما بين اتنين .. واحدة كبيرة فى السن قد جدتى ،، والتاني راجل عادى
الخناقة كانت ما بينهم هما الاتنين فقط لا غير
الست دى قاعدة جنبى
معرفش فجأه
لقيت شاب عمره ما بين ال 20 و ال 25
قام شاتم الست دى شتيمة قذرة
قامت الست شاتماه شتيمة اقذر
قام قالها ....... ده يبقي جوزك
قامت قالتله بس يا ...... يا ابن الـ ........
لقيت الراجل قالها متغلطيش ف امى
ده انا هربيكى
والاقى الراجل نزل فى الست ضرب
والناس تهدى فيه وهو لو طال يخرملها عين كان عمل
الست مسكتتش وهاااات يا صويت و قلعت النضارة وشمرت اكمامها و فضلت تضرب فيه وتشتم
انا كنت جمبها كل اللى قدرت اعمله انى مسكتها بجد وكنت بشدها وكنت عمالة اقول اعوذ بالله من الشيطان الرجيم واقولها اهدى يا امى
لست كانت عمالة تقولى حاسبى كده بس بجد مكانش ينفع اسيبها كانت هتتبهدل
لمهم الواد مسبهاش
واول مرة ف حياتى اسمع واحد بيشتم ف دينه .. ايه ده هو فى ناس كده بجد
وبما ان الرجالة كانت ماسكة ايده لقيت الراجل طالع برجله معرفش ازاى و هات يا ضرب ف وشها و ف جسمها
بجد كان نفسي اخد الست دى ف حضنى انا مش عارفة ازاى فى بنى ادم كده
انا راجعة البيت وايدى واقفة تماما مش قادرة احركها و مليانة كدمات زرقة والله وخربشة
فما بالكوا بيها
وهى انسانة كبيرة فى السن
والبنى ادم ده مش راضي يعتقها
هل بجد وصلت بيه البجاحة لكده ؟
فعلا انا مستغربة اوى
وحزينة اوى اوى اوى
والست بعد ده كله لما هديت
فضلت تحسبن وتعيط
وانا اقولها معلش يا امى حقك عليا يا امى
والاقى الحقير ده نازل عليها ضرب تانى
انا بجد معرفش اتكلمت ازاى بس لقيت نفسي بقوله ميصحش كده ع فكرة عيب اوى اللى انت بتعمله ده
كل اللى انا فاكراه انى لقيت ناس بتضحك عليا
الحمد لله ان الواد مقلبش عليا
بس قسما بالله انا فعلا كان نفسي انزل فيه ضرب وخاصة اننا كنا اتعلمنا ان فى كذا منطقة ضعيفة فى الجسم بتضعف اللى قدامك اوى وممكن كمان تخدره لمدة بس لو الضربة طلعت صح
بس بجد كنت خايفة اوى
الست وهيا بتعيط جنبى والناس ماسكة الراجل
بجد صوتها والبهدلة اللى شافتها والله خلونى اعيط جنبها
كيد الناس دى مش بشر عادية
مينفعش ده يكون انسان
والله انا مش مصدقة ان ده حصل ولو حد كان حكهولى مكنمتش هصدق
انا اعرف ان مش من الرجولة ولا الدين ولا الاخلاق ولا اى الانسانية انى امد ايدى ع واحدة
وكمان كبيرة فى السن !!!!!!
لا تعليق
(( فعلا لقد استنوق الجمل !! )


خلص كلام البنت وخلص كلامى انا كمان

هو احنا أصحاب بجد ؟؟

السؤال ده بيدور فى دماغى كتير أوى.ناس كتير لما تسألها عن الصداقه الحقيقيه يقولك :صداقه مين يا عمونا متصلى عالنبى احنا فى زمن المصالح , واللى يقولك : لاااااااااا الصداقه دى كانت زمانلكن دلوقتى بقت تحفه أثريه تتحط فى المتحف وندفع التذكره عشان ندخل نتفرج عليها .
طيب لما كل الناس كده , زمايلنا وجيرانا وكل اللى حوالينا شايفين ان الصداقه بقت عمله نادره فى الزمن ده ,لما احنا نبقى مش لاقيين الصديق الجدع اللى بجد , اللى يبقى موجود وقت الخنقه والضيق قبل وقت الهزار والتهييس , وفى نفس الوقت غيرنا برضه مش لاقيه . امال مين اللى لاقيه ؟؟وكده يبقى العيب فين ؟؟كده العيب يبقى فينا وجوانا , ليه دايما بنقول انا مش لاقى الصديق اللى بجد , اللى يفهمنى ويقف جنبى , اللى اول ما ابقى مضايق يبقى هو الوحيد اللى ادامى , المفروض نقول : انا مش الصديق اللى ممكن اللى حواليا يحتاجوه .

ليه الثقه انعدمت بين الناس ؟؟ليه المصالح الشخصيه عمت الناس ؟ وليه الكل اقتنع بمبدأ يلا نفسى ؟

ليه كل واحد بقى شايل للتانى سكينه ورا ضهره ومستعد يطعن أخوه فى اى فرصه وفى نفس الوقت متوقع طعنه مشابهه من أخوه ؟؟
وليه بقى الخبت والمكر متوقع قبل ما يكون الحب والتسامح متوقع ؟ليه كل انسان بيعتبر نفسه مجنى عليه وانه ملاك طاهر لا يمكن يكون الجانى ؟ليه كل واحد ميقدرش ظروف اللى ادامه قبل ما يحكم عليه بانه ظالم وجانى ومفترى ؟

بستعجب كتيير على زمن بقت الطيبه فيه عيب والطيب بقى الانسان الاهبل اللى فى نظر الناس ممكن يضحك عليه بسهوله , لأ لازم يبقى الخبث فى دمنا عشان الناس تقول علينا مدردحين وفاهمين الدنيا

بستعجب اكتر على زمن بقى الايثار فيه شىء مريب مشفتوش ومسمعتش عنه غير فى الروايات والافلام زى قصص الحب الاسطوريه.

وبستعجب أكتر وأكتر على زمن فيه الصديق الوفى بقى كنز مفقود ,والصداقه خزينه ومحدش لاقى مفتاحها ولا حتى عارف أرقامها .

عيد سعيد

كل سنه وانتوا طيبين وعالسفره ملمومين وعالكحك والبسكويت مخلصين