يحسبهم الجاهل أغنياء من التعفف

السلام عليكم

انهارده بجد مش عارفة اتكلم اقول ايه بجد

أد ايه احنا بجد بقينا مش حاسيين بقيمه النعم اللى فى ايدينا وبنتبطر عليها

كل واحد فينا بس اهم حاجه عنده نفسه ثم نفسه مبقناش حتى حاسيين بالناس اللى حوالينا ولا نعرف جيرانا عاملين ايه

منعرفش عايشيين ازاى بياكلوا ويشربوا ولا مش لاقيين بيتعالجواولا مش طايليين عايشيين اصلا ولا ميتيين

ازاى تبقى ست كبيرة ضريرة وحدش بيخدمها

لا اولادها ولا جيرانها

بجد مش عارفة ولادها دول بيجيلهم نوم بليل ازاى وهما سايبهم امهم كده

المسجد بيديها 10 جنية فى الشهر تعيش منهم !!! ودخلها كله على بعضه 60 جنية

60 جنيه بتاكل ولا تشرب ولا بتتعالج منهم

واحنا عندنا كل حاجه ومش عاجبنا !! والست راضيه جدا بحالها وبتلتمس العذر لولادها اللى سايبنها كده

بجد الست دى بطلة انها عايشة فى الظروف دى وبتحمد ربنا وبتشكر فضله على نعمه الكتير عليها

ياريتنا حتى ربعها فى الرضا ده

دى حتى كلمة ربنا طالعة منها مختلفه عن اى حد بيقولها !!

الست دى مجرد حالة من مئات الحالات واكتر كمان من الناس حوالينا وعايششيين وسطينا واحنا مش حاسيين

ياريت فعلا نبص حوالينا ونساعد الناس اللى زيها وموجودين كتييير ونتعلم منها الرضا ده

انا بجد اتأثرت بيها جدا زى ناس كتيير اتأثرت بس يكون النتيجه بعد ما تشوفها تأثر يتبعه تغيير ايجابى فى تصرفاتنا وحياتنا مش نسيان وتلاهى فى الدنيا تااانى

واسيبكم مع الست البطلة دى وهى بتحكى حالها ومش بتشكى




ربنا معاها ومع اللى زيها وربنا يهدى ولادها يروحوا يزورها ويساعدوها والناس تحس شوية بالنعم اللى هما فيها ويساعدوا غيرهم

يارب لك الحمد كما ينبغى لجلال وجهك وعظيم سلطانك

ازاى نفرق بين لحم الخنزير واللحوم الاخرى ؟؟؟

السلام عليكم ورحمة الله وبركاتة

ازيكوا يا جماعة عاملين اية يارب تكونوا بخيييير

وربنا يوفق اللى بيمتحنوا زى حلاتى كده ومتكعبلين فى المزاكرة واللى مش بيمتحنوا برضه ربنا يوفقهم (:

ـــــــــــــــــــــــــــــــــــــــــــــــــــــــــــــــــــــــــــــــــ

انهارده لقيتلكم كلام مهم اوى عن ازاى نفرق بين لحم الخنزير واللحوم الاخرى

بجد الحكاية دى مهمة جدا لان الخنازير تلات تربعها ادبحت وممكن جدا تنزل الاسواق على انها لحوم عادية

وبما اننا مش بناكله فانا جبتلكم الطرق المختلفه اللى نقدر نعرفه بيها وميضحكش علينا

ياريت يا جماعة تنشروا الصور دى


ومتنسوووش تدعولى


فى رعاية الله

ارض بما قسمَ اللهُ لكَ تكنْ أغنى الناسِ

السلام عليكم ورحمة الله وبركاتة

ازيكوا جميعا ؟؟يارب تكونوا بخير

كتير مننا بيفكر دايما انه معاه القليل وغيره معاه الكتير

وكل واحد باصص للى فى ايد غيره

ودايما نسمع اللى بيقول مثلا :

 بس لو كنت غنى شويه

 انا ناقصانى السعاده وراحه البال

 بس لو كنت جميله شويه كان زمانى اتخطبت

 مش كان زمانى متجوزه دلوقتى

 انا ايه اللى خلانى اتجوز دانا كنت فى بيت ابويا ملكة

 بس لو كان عندى اطفال

 جتها نيله اللى عايزة خلف تيجى تتفرج

يعنى من الاخر محدش عاجبه حاله 

مع ان لو كل واحد فكر فى اللى ايده هو بس هيلاقى عنده نعم كتير اوى ربنا اداهاله وتستهال اننا نحمد الله عليها ونشكره كتيييييير عليها

وهيبقى سعيد وفى حاله رضا وسلام داخلى مع نفسه

بخصوص الموضوع ده كتب الشيخ الرائع/عائض القرضى كلام مقنع جدا وجميل جدا

هو من كتابه لا تحزن والكتاب ده انا بجد حبيته جدا فيه كل حاجه باسلوب مقنع ومريح ورائع جدا وفيه كذا حاجه فيه شدتينى وحابه ابقى اتناقش معاكوا فيها باذن الله

وده كلامه فى الجزئيه دى

عليكَ أن تقْنع بما قُسِمَ لك من جسمٍ ومالٍ وولدٍ وسكنٍ وموهبةٍ ، وهذا منطقُ القرآن ﴿ فَخُذْ مَا آتَيْتُكَ وَكُن مِّنَ الشَّاكِرِينَ ﴾  إنَّ غالبَ علماءِ السلفِ وأكثر الجيلِ الأولِ كانوا فقراء لم يكنْ لديهم أُعطياتٌ ولا مساكنُ بهيةٌ ، ولا مراكبُ ، ولا حشمٌ ، ومع ذلك أثْروُا الحياة وأسعدوا أنفسهم والإنسانية ، لأنهم وجّهوا ما آتاهمُ اللهُ من خيرٍ في سبيلِهِ الصحيحِ ، فَبُورِكَ لهم في أعمارِهم وأوقاتِهم ومواهبهم ، ويقابلُ هذا الصنفُ المباركُ مَلأٌ أُعطوا من الأموالِ والأولادِ والنعمِ ، فكانتْ سببَ شقائِهم وتعاستِهم ، لأنهم انحرفوا عن الفطرةِ السويَّةِ والمنهجِ الحقِّ وهذا برهانٌ ساطعٌ على أن الأشياءَ ليستْ كلَّ شيءٍ ، انظرْ إلى من حمل شهاداتٍ عالميَّةً لكنهُ نكرةٌ من النكراتِ في عطائهِ وفهمهِ وأثرهِ ، بينما آخرون عندهم علمٌ محدودٌ ، وقدْ جعلوا منه نهراً دافقاً بالنفعِ والإصلاحِ والعمارِ .

إن كنت تريدُ السعادةُ فارضَ بصورتِك التي ركبَّك اللهُ فيها ، وارض بوضعكِ الأسري ، وصوتِك ، ومستوى فهمِك ، ودخلِك ، بل إنَّ بعض المربّين الزهادِ يذهبون إلى أبعدِ من ذلك فيقولون لك : ارض بأقلَّ ممَّا أنت فيهِ ودون ما أنت عليهِ .

هاك قائمةً رائعةً مليئةً باللامعين الذين بخسوا حظوظهُمُ الدنيوية :

عطاءُ بنُ رباح عالمُ الدنيا في عهدهِ ، مولى أسودُ أفطسُ أشَلُّ مفلفلُ الشعرِ .

الأحنفُ بنُ قيس ، حليمُ العربِ قاطبةً ، نحيفُ الجِسْمِ ، أحْدَبُ الظهرِ ، أحنى الساقين ، ضعيفُ البنيةِ .

الأعمش محدِّثُ الدنيا ، من الموالي ، ضعيفُ البصرِ ، فقيرُ ذاتِ اليدِ ، ممزقُ الثيابِ ، رثُ الهيئةِ والمنزلِ .

بل الأنبياء الكرامُ صلواتُ اللهِ وسلامُهُ عليهم ، كلٌّ منهم رعى الغنَمَ ، وكان داودُ حَدَّاداً ، وزكريا نجاراً ، وإدريس خياطاً ، وهم صفوةُ الناسِ وخَيْرُ البشرِ .

إذاً فقيمتُك مواهبُك ، وعملُك الصالحُ ، ونفعُك ، وخلقك ، فلا تأس على ما فات من جمالٍ أو مالٍ أو عيالٍ ، وارض بقسمِة اللهِ ﴿ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا ﴾ .

****************************************

يعنى لو كل انسان فكر فى استغلال امكانياته كويس هيوصل للى هو عايزه واحسن كمان بسهوله جدا ان شاء الله

واتمنى اكون افدتكم ومستنية ارائكم

عااااااااااجل من حكمدار العاصمه !!

تحديث :حبيت بس أقولكم انى غيرت اسم المدونه من رودى هانم الى ألوان الحياه عشان احس انه بيعبر عن محتوى المدونه لانى بكتب فى كل الالوان ولان الاسم الاولانى كتبته وانا لسه بعمل المدونه ومفكرتش فى اسم ساعتها يعنى  فطلع كده وخلاص انا كنت ناويه اغير اللينك كمان بس قولت بلاش عشان ميبقاش فيه لغبطه والناس تعرفنى ومحدش يجى يقولى انتى مييييييييين ؟؟

بس كده ........

____________________

سيداتى انساتى سادتى :

اسعد الله صباحكم ومساؤكم

نعلمكم انه فى اليوم 20/4/2009  قام بعض الارهابين بقطع كل كابلات النت وشبكات التليفون المحمول والتليفونات الارضيه وشبكات الكهرباء فى جميع انحاء العالم  سواء كابلات بحريه بتجنيد الضفادع البشريه والاسماك المتوحشه او كابلات بريه جويه زراعيه صحروايه كله كله ولم يكتفوا بذلك بل قاموا بتدمير كل محطات البنزين اللى يقدروا عليها وفى طريقهم لتدمير كل الطرق الصالحه لسير السيارات  والقطارات  ولن يكون هناك اى وسيله اتصال اخرى  سوى  السفر على الجمال او المشى وسوف يتم تدبير جمل لكل مواطن حتى يتم تيسير عمليه الانتقال وفى شريط مسجل للجماعه الارهابيه -جماعه العوده للبدائيه- بررت الجماعه موقفها برغبتها فى العوده لحياه البدائيه واجبار الشعوب على التخلى عن وسائل التكنولوجيا الحديثه لما لها من اضرار الانعزال عن العالم الحقيقى وتقليل الترابط الاسرى واضرار ماديه حيث تسنزف اغلب دخول المواطنين فى وصلات النت والسيبر الساعه بجنيه ونص وكروت الشحن المختلفه وسوف يكون هذا اليوم هو اخر يوم للتعامل مع العالم الالكترونى هذا وقد اعذر من انذر واى حد هيحاول يوصل النت بتاعه او يتكلم فى التليفون باى طريقه من الطرق الملتويه هنعرفه شغله

انتهى البياااااان

ايه رأيكوا فى البيان ده ؟؟؟

تخيلوا فعلا لو قمنا يوم من النوم ملقيناش اى وسيله اتصال الكترونيه ولقينا مفيش نت ولا تليفون ولا اى حاجه ؟

طب لو قالولكم ان انهارده اخر يوم هتستخدم فيه الحاجات دى وانها ادامك لحد مهله معينه هتعمل ايه فى المهله دى ؟؟

هنعمل ايه مع الناس اللى بنتعامل معاها عالنت بس ما احنا مش هنعرف نكلمهم تانى

ولا اللى بنكلمهم عالتليفون بس هنوصلهم ازاى ؟؟

هل كل واحد هيقدر يتأقلم مع حياته الجديده ؟ وهل الوقت هيبقى ممل فعلا ؟؟

وهل فعلا احنا قصرنا فى حياتنا الحقيقيه والحياه الالكترونيه احتلت اهتمام اكبر عندنا ؟

وهل احنا فعلا أساءنا استخدان التكنولوجيا ؟؟

انا عن نفسى مش متخيله وضع زى ده ممكن اعمل فيه ايه ؟

بس حاسه ان الحياه هتبقى ضيقه اوى ؟؟

انتوا ايه رأيكوا ؟ وكل واحد هيعمل ايه لو ده حصل ؟؟

كويس ان النت شغال عشان اعرف اسئلكم وتردوا عليا :D

ايه رأيكوا تفضفضولى ؟؟

السلام عليكم ورحمه الله وبركاته

كيف حالكم جميعا ؟؟

جايه انهارده وجايبلكم فكره اتمنى ان تحوز -حلوه تحوز دىD:- رضاكم 

دلوقتى يا جماعه انا بدأت تظهرلى  تمحورات  فى سخصيتى وقلت لازم اجربها عليكوا

يعنى فى كتير من اصحابى بقوا دايما بيجوا يحكولى على مشاكلهم او حتى مش مشاكل بتبقى فضفضات وده لاحساسهم انى مريحه مثلا فى الكلام او بخفف عنهم كتير فيحبوا يجوا يستشيرونى

وبجد دى حاجه بتخلينى فى قمه  السعاده بجد ان حد يحكيلى عن اى حاجه وانا احاول اساعده ولو بمجرد الكلام واقتراح حلول مناسبه او حتى انى اخليه يفك عن نفسه الضيق شويه

ده غير انى فعلا بستمتع بالاجتماعيات وانى داينا بحب اقرا المشاكل وافكرلها فى حلول وبحب برضه اقرا فى علم النفس كتير

وبما انى بعتبر الالم النفسى ولو بسيط بيبقى اكثر تأثيرا على الانسان من الالم العضوى

ومن هنا جت لى الفكره دى

وهى انى حابه اعمل ركن هادىء للفضفضات واى مشاكل او حتى اى حاجه ولو بسيطه مضايقه اى حد يكتبها وانا بخبراتى الصغيره ومؤهلاتى المتواضعه دى احاول اساعده

فانا بفكر اعمل مدونه تانيه لو حابين الفكره تبدءوا تبعتولى مشاكلكم وانا انشرها وباذن الله اقدر احلها 

وممكن عشان ميبقاش حد محرج انه يتكلم عن مشكلته ممكن تبعتولى المشاكل على شكل تعليقات بغير معرف او انا ممكن اعمل التعليقات بموافقتى وتعليقات المشاكل والفضفضات موافقش عليها وانشرها عالمدونه كبوست عادى بدون ذكر اسم صاحب المشكله وتبعا هيبقى مرحب بتعليقات المشاهدين قصدى المستمعين يوووووه تعليقلتكم يعنى وتقدروا تشاركونى فى حل المشاكل والفضفضات

انا بصراحه لسه ما استقريتش على طريقه الارسال او التواصل لانى مستنيه ارائكم الاول فى الفكره لانها ليكوا وانتوا اللى هتنشطوها واللى عنده اى اقتراحات  جديده ياريت يقولها واللى مش عاجبه الفكره خالص يقول برضه وانا لو لقيتكم كتير مش موافقين هرجع الشزلونج للراجل واخد القسط اللى دفعته وأمرى لله

فى رعايه الله وأمنه........

تصدقوا ان الانسان الطيب مش أهبل !!!

ازيكوا يا جماعة عاملين ايه كلكوا يارب تكونوا بخير يارب............

بعتذر عن اغيابى وعدم متابعتى ليكم بس مشغوليات والله

ان شاء هحاول اتابعكم أول بأول باذن الله

ندخل فى الموضوع بقى وكفاية رغى عليكوا
ـــــــــــــــــــــــــــــــــــــــــــــــــــــــــ

والله الشخص الطيب ده مظلوم معانا أوى دايما تلاقيه موصوف بالعبط والهبل والسذاجة او انه مش ابن الزمن ده على اساس انه مولود سنه 1899 وجه بآلة الزمن عندنا مثلا

بقى الشخص اللى بيعامل غيره كويس بحسن نية وصفاء وايثار يبقى اهبل والانسان الخبيث اللئيم اللى بيضحك على مخاليق ربنا يبقى هو ده الفلتة اللى محصلش وده اللى نعجب بيه ؟؟ سبحان الله بجد على ده زمن مقلوب

مش عارفة ليه كلنا او معظمنا بنستغرب الانسان الطيب اوى واحيانا كمان بنتريق عليه عشان خدم حد او جه على نفسه عشان يساعد غيره ونقول لاااااااااا ده أهبل

مع ان الطيبه والهبل ملهمش علاقة لغويا ولا سلوكيا ولا باى نوع تانى من انواع العلاقات

من كتر مانا مستغربة من ارتباط المعنى ده فى ذهن الناس جيت على نفسى اوى واتحركت من مكانى وقمت كمان جبت المعجم الوسيط -اللى عمرى ما فتحته ولا فكرت افتحه شان اشوف فيه كلمه واقفه معايا-عشان اشوف ايه علاقه الطيبة بالهبل لقيت الآتى:

(هـ .ب.ل) : فلان......أى فقد عقله وتمييزه

(ط.ي.ب): كل ما خلا من الأذى والخبث

اهو يا جماعة ملهمش علاقة خااااااااااالث المعنى الاول يعنى الانسان بيكون عقليا غير متزن عنده خلل عنده هسهس يعنى بيكلم نفسه وهو مااااااشى

التانيه يعنى شخص كريم محترم لا بيتخابث ولا بيتلائم على حد وعمره ما كلم نفسه وهو ماشى فى الشاعر ولا بيغنى انا عندى شعره ساعة ترووح وساعة تيجى.......

بقى بذمتكم دى فيها ايه تزعل الناس منه او تخليهم يسخروا منه ويتهموه بفقدان العقل وانهم هم اللى جايبين الديب من قفاه

ده حتى البنى آدم الطيب دلوقتى من كتر اللى بتقاله بقى بيحب ينفى عن نفسه التمهة ولو حد مدح فيه فيه طيبته تلاقيه بيقول انا طيب اه لكن مش عبيط

طيب وهو حد جاب سيرة عبط لا سمح الله ...........

خلاص بقت الاخلاقيات الجميلة وصمة عار بنحاول نداريها ؟؟

ليه منمدحش الطيب لطيبته وحبه للخير وحبه مساعدتنا ولا احنا لازم ناخد على دماغنا ونتعامل مع ناس ميعرفوش يعنى ايه خير ولا يعنى ايه مساعدة او ايثار ونرجع نقول اييييييييه دنيا فين ايام الناس الطيبين والزمن الجميل ؟؟

اهم الناس الطيبين ركبوا آلة الزمن ورجعوا تانى عاجبكوا كده.............

بين الآباء والأبناء

امبارح وانا فى الكلية لقيت واحدة صبحتى مسنتحه كده ومسبهلة على غير عادتها فقل متجيش برضة اسيبها فى حالها لازم اروح انكشها شويه واعرف مالها , المهم مكدبتش خبر وروحتلها



أنا : ايه يا بنتى مالك كده ضاربه الوش الخشب كل ده عشان هنشرح فرافييير وارانب الترم ده , عادى يعنى لا داعى للقلق كلنا هيغمن علينا فى اول سكشن ده قدرنااااا



هى : لا عادى انا مستغنيه عن العشر درجات بتوعهم اصل الحكايه مش ناقصة



انا : قولتييييييلى بقى ايه هى الحكاية اللى مش ناقصة دى



هى :مفيش !!



انا :ايه يا بت انتى يابت !!قولى قولى متخافش سرك فى بير مخروم ان شاء الله .



هى :دماغى وجعتنى من كتر التفكير مش عارفة اعمل ايه ؟



انا :فى اية ؟!!



هى : فى اى حاجه وكل حاجه مش عارفة اخد اى قرار فى اتفه الامور فى حياتى , حاسه انى تايهه مش عارفة ابقى ازاى ؟عايزة اعمل اللى يرضى ربنا ويرضينى ويرضى اللى حواليا

انا : وايه اللى مخليكى مش عارفة تاخدى قرار ؟؟

هى : مجربتش قبل كدة اخد اتصرف فى حياتى بطريقتى , من وانا صغيرة ولحد دلوقتى كمان وماما وبابا هما اللى بيتصرفوا فى كل شئونى ولما كنت بطلب انى أنا اللى اتصرف فى حاجة بيبقى دايما الرد انى هيضحك عليا ومش هاعرف اعمل حاجه وهما ادرى

انا :معظم أبهاتنا وامهاتنا بيحبوا يكونوا المسئولين عننا مهما كبرنا لاننا فى نظرهم بنفضل صغيريين وهما بيفضلوا اكثر خبرة مننا

هى : بس انا نفسى اجرب واغلط واتعلم , مهما اما كانوا فى سننا كانوا بيجربوا عشان كده اخدوا الخبرة دى ، امال احنا هنتعلم امتى ناخد قراراتنا بنفسنا ومش بيدونا الفرصة نعبر عن نفسنا برؤيتنا احنا مش برؤيتهم هما ؟؟

انا : مهو ده برضة نابع من حبهم لينا وانهم مش عايزينا نقع فى نفس غلطاتهم زمان فالهدف صح وان كان فى بعض الاوقات الاسلوب غلط

هى : انتى عندك حق بس مهو الاسلوب ده هو اهم حاجه وحسب الاسلوب بختلف رد فعل الشخص يعنى لو كان الاسلوب مقنع اكيد هقتنع وهنفذ اللى هما عايزينه برضا وقناعه منى انما اسلوب العافيه اللى بيتبعه اغلب الاباء مع اولادهم ده بيزيدهم عند وبيعملوا الحاجه وهما حاسين انها مفروضه عليهم حتى لو كانت صح فيها ايه لما الام بدل ما تهدد بنتها مثلا انها لو عملت كذا مثلا هتوريها وهتسوى وهتخلى مهى لو قعدت معاها وفهمتها المزايا والعيوب وسابتلها حرية الاختيار فى الاخر هيبقى افضل كتيير

انا : هرجع واقولك ان برضه الام بتخاف على بنتها وهتخاف انها تختار غلط وبعدين اللى انتى بتكلميه فيه ده مشاكل جيل بحاله من الابناء مه جيل كامل من الاباء ومتهيألى اما نبقى زيهم كده هنخاف على ولادنا برضه بس اعتقد انه هيبقى مع اختلاف الالوب اللى ميخليهمش يفقدوا الثقه بنفسهم وعموما يعنى متأزميش نفسك وخدى الموضوع بالتدريج يعنى تقدرى تتناقشى معاهم بهدوء وتحاولى تزودى مساحه حريتك وتوسعى قرارتك

هى : ياريت بجد اقدر اوصل لحل يريحنى ادعيلى بس انتى

انا : ربنا معاكى ومعانا يستى , يلا اسيبك انا بقى عشان عندى سكشن بعيد عنك

هى : عندك سكشن فيراااااااان ولا ايييييه ؟؟

انا : لااااااا حرام عليكى يا شيخة لسه بدرى يا بارده انتى

هى : طويب عموما مسيرك هتقابليهم روحى بقى عشان مش تتاخرى

انا :طيب سلام بقى

هى : سلام

مشيت انا بقى وبتها تكمل سنتحة ورحت لقيت مفيش سكشن حمدت ربنا وانا فى السكة للبيت قعدت افتكر الحوار اللى دار بينى وبينها .ياترى فعلا سيطرة الام والاب على افعال اولادهم صح ولا غلط , بيفيدهم ولا بيضرهم ؟؟امتى فعلا بيحسوا انهم خلاص اتعلموا ويقدروا يعتمدوا على نفسهم ؟

انتوا ايه رأيكوا بقى فى المناقشه والكلام ده ؟؟؟

زياره لمعرض الكتاب

اول امبارح اللى هو 4/2/2009 كان يوم ممتع جدا بالنسبه لى بجد استمتعت بيه جدا وكان نفسى يطول اكتر من كده لانه كان زياره للقاهره ومعرض الكتاب وطبعا دى تعتبر اول مره اروحها وانا كبيره فكانت حاجه مشوقه بالنسبه لى

بعد ما دوخنا _انا واخويا_فى المقارنه بين المواصلات المختلفه عشان نختار حاجه نروح بيها تكون سريع وامنه فى نفس ذات الوقت استقرينا عالقطر اللى بيروح للقاهره مباشره من غير ما يقف فى النص

كنا فى محطه سيدى جابر مستنين قطر الساعه 7 من الساعه 6.30 وده طبعا نتيجه لالحاح ماما فى النزول بدرى وبالتالى كنا اول ناس فى المحطه

جه القطر وركبناه وكنا رقم كرسينا 57/58 _متسالوش ايه اهميه المعلومه دى عشان هتعرفوا بعدين_وبجد السفر فى القطر ده ممتع جدا عن اى طريق تانى يعنى قدرنا نتفرج عالطريق والمدن المختلفه من الشباك وبجد المناظر كانت روعه فعلا ولسه المساحات المزروعه كتيره وجميله والبيوت الصغيره ادام المزارع والهوا النقى بجد احسن كتير من عماراتنا العاليه وهوانا الملوث والزحمه والخنقه وطبعا اى سفر لازمله السندوتشات والميه وجريده الدستور اللى متقلش اهميه عن الاكل والشرب بالنسبه لاخويا واللى مفرقتهوش طول المشوار

وصلنا القاهره الساعه 10 وده لان القطر اتملكع فى السكه وكنا ممكن نوصل قبل كده بكتير واول منزلنا حجزنا رحله العوده على قطر السابعه مساء

بعد كده روحنا نشوف هنركب ايه عشان نوصل ادام الباب الرئيسى للمعرض وربنا رزقنا بمينى باص ابن حلال ركبناه ووصلنا هناك واول منزلنا كنت انا متفقه مع بنات صحباتى من هناك يقابلونى عند البوابه الرئيسيه

وعلى الرغم من تاكيدات ماما على اخويا انه ميبش ايدى طول الرحله الا انه اول ما وصلنا فص ملح وداب وراح يدور على صاحبه وسابنى

بعد ما تم الاتصال بينى وبين البنات وفضلنا نص ساعه نوصف لبعض احنا لابسين ايه وانا ولا شايفاهم ولا هما شايفينى اكتشفت انى واقفه الناحيه التانيه خالص عند البوابه 5/6 وهما عند البوابه الرئيسيه
بعد كده دخلت اقابلهم واتقابلنا فى نص المسافه

لفينا شويه فى المعرض وطبعا كبير جدا وهما بقى كانوا عارفين مداخله ومخارجه وكل حاجه اكنهم بيباتوا فيه وبالتالى كنت انا ماشيه على اساس معلوماتهم

بعد كده اتجهنا للمقهى الثقافى عشان نحضر الندوه لبعظيمه بتاعه د/نبيل فاروق ود/احمد خالد توفيق ود/تامر ابراهيم ود/محمد سليمان عبد الملك وكانت فعلا ندوه قيمه اوى دارت حول عنصر الاثاره فى الادب العربى وانه ايام زمان كانت الاثاره موجوده بس مش بالمقدار الموجود دلوقتى لان زمان كان ايقاع الحياه بطىء وبالتالى كانوا محتاجين يشغلوا وقتهم بقصص ايقاعها بطىء انما دلوقتى مثلا محدش هيصبر على قصه ايقاعها بطىء لان ظهرت حاجات كتير تشغل الفراغ زى النت والتلفزيون وحاجات كتير نقدرنشغل بيها وقت فراغنا فاصبح عنصر الاثاره والسرعه بارز اكتر .

وطبعا كان الندوه زحمه جدا وعرفت بعد كده ان دى اعلى ندوه من ناحيه نسبه الحضور تم تنظيمها خلال ايام المعرض

بعد كده بدانا نكمل جولتنا وروحنا سور الازبكيه بجد مكان تحفه فعلا مليان كتب قيمه جدا ومراجع علميه ورخيصه فى نفس الوقت اشترينا بعض الكتب والروايات والقصص الاجنبيه

بعد كده اتجهنا للمؤسسه العربيه اللى بتصدر روايات نبيل فاروق واحمد خالد توفيق وكتاب تانيين كتير واشترينا روايات كتييييييييير لان ده نوع القرايه اللى بيستهوينى اللى جانب المجالات الاجتماعيه والعلميه والدينيه

وكانت المفأجاه اننا لقينا د/نبيل فاروق ادام باب المؤسسه وكانت فرصه كويسه اوى اننا نقدر نقف معاه شويه واخدت توقيعه على اربع روايات واخدناله صورتين جامدين كمان

كملنا تجولنا فى المعرض الواسع ده اللى مبيخلصش واشترينا كتب كتير وبعد كده كنت بدور على روايه يوتوبيا ومش لاقياها وكتاب خالد كساب بس لقيت اخويا بيكلمنى كانت الساعه بقت 5.30 وكان بيقولى استعد عشان نمشى وكان بيقولى انه واقف دلوقتى ادام خالد كساب واحمد خالد توفيق

وانا رايحه عشان اقابله كنا ادام دار ميريت ببص ادامى لقيت احمد خالد توفيق ادامى انا هو وخالد كساب ومحمد فتحى وهو صحفى شاب بيكتب لجريده الدستور وكتب برضه روايات كتير وكان هو اللى بيقدم الندوه اللى حضرناها الصبح وبالتالى لقيت اخويا واقف ادامى وانا بكلمه فى التلفون عشان اعرف مكانه
وكانت بجد مسك الختام للرحله انى جبت يوتوبيا واخدت توقيع د/احمد خالد توفيق وبرضه وقفنا نتكلم معاه شويه

بدأنا رحله العوده وكانت الساعه بقت 6 وادامنا ساعه عشان نلحق القطر وطبعا هو المعرض مكنش بعيد اوى عن المحطه بس احنا مكناش عارفين المواصلات هتبقى عامله ازاى ولا نركب ايه ولا اى حاجه

وقفنا شويه وبرضه الحمد لله ربنا رزقنا بمينى باص ابن حلال وصلنا المحطه وركبنا القطر وبرضه لقينا مكانا رقم 57/58 وفى نفس الزوايه اخر كرسيين فى القطر زى ما كنا رايحيين تماما فكانت صدفه لذيذه وكان المكان محجوز لنا

وصلنا فى امان الله الساعه 9 عشان تعرفوا ان قطر الصبح كان بيتملكع فى السكه وكانت فعلا رحله جميله اوى واتمنى تتكر تانى

عارفه انى رغيت عليكوا كتير اوى بس حبيت اعرفكوا تفاصيل يومى الجميل لانى كنت مبسوطه اوى ساعتها

واسيبكوا بقى مع شويه صور

دى واحنا رايحيين الصبح فى القطر

وده طبعا د/ نبيل فاروق

ودى د/احمد خالد توفيق

وده عبد الملك عسول اوى مقدرناش نسيبه فى حاله وهو بيلعب ادامنا كده

وكل معرض وانتوا طيبين :)

وهنيالك يا فاعل الخير _و_ الثواب !!

اولا من قبل ما ندخل فى الموضوع

مكنتش عارفه اسميه ايه

مش عارفه اسمها هنيالك يا فاعل الخير الثواب اللى هتاخده يعنى

ولا هنيالك يا فاعل الخير والثواب


اصلى مجربتش اشحت قبل كده D:

ما علينا يعنى متخدوش فى بالكم

نبدأ بقى

ـــــــــــــــــــــــــــــــــــــــــــــــ


السلام عليكم



ازيكوا يا جماعه عاملين ايه ؟ يارب تكونوا بخير

كان فيه حاجه بقالها مده شغالانى ومش لاقيه لها اجابه

هعرضها عليكوا من خلال موقف حصلى قريب

من مده كده كنت لسه جايه من بره وداخله بيتنا

لقيت الباب خبط

وغالبا ماما بتقولى متفتحيش لحد لان عندنا بيبقى فيه مندوبين مبيعات رخمين وناس غريبه كده بتخبط

وبما ان مفيش بواب ولا أمن عالعماره فاحنا مش بنفتح لاى مندوبين مبيعات

فانا اما الباب خبط الاول مفتحتش

لكن لما لقيت اللى عالباب مستمر برضه انه يضرب الجرس فكرت يمكن تكون واحده جارتنا عايزه حاجه او كده

فتحت لقيت واحده واقفه

هى كانت شكلها عادى يعنى مش مبهدل ولا حاجه

انا كنت لسه برضه بحسبها واحده ساكنه معانا

بس انا لقيتها بتعيط وقربت من الباب اوى اكنها هتدخل

انا اصلا خفت منها

وفضلت تحكيلى على حاله وفاه وحد اتوفى وهى معهاش فلوس

فانا بصراحه مكنتش عارفه اتصرف لانى كنت قلقانه منها اصلا وفى نفس الوقت كانت صعبانه عليا

انا اصلا مكنتش سامعه هى بتقول ايه بس لانى كنت وقتها مركزه فى انى مش عارفه هى بتضحك عليا ولا نصابه ولا ايه؟؟؟

اقفل الباب ولا ادخل اساعدها؟؟

طب مانا لو دخلت ممكن تدخل ورايا ولا حاجه وفكرت كمان انها ممكن تكون بتمثل عليا

المهم انى قلتلها انا اسفه بس مفيش حد موجود دلوقتى

اللى استغربتله بقى انها مثلا مزودتش فى الكلام لا دى قاللتى حاضر حاضر واختفت

وده اللى ضايقنى اوى وحسيت انها كانت محتاجه فعلا وانى مش ساعدتها وانى كنت قاسيه اوى لان غالبا الناس اللى بيطلبوا مساعده بيبقوا كثيرى المحايله

بس هى كانت بتقول انها ساكنه فى منطقه تعتبر بيعيده عننا شويه

معقول تكون لفت عالبيوت دى كلها لحد ما وصلتلنا ومحدش ساعدها

انا بجد ببقى محتاره فعلا ادام الناس دى

هما فعلا بيبقوا محتاجين ولا بيبقوا بيمثلوا؟؟

يعنى الناس اللى بتبقى فى الشوارع قاعده تطلب المساعده

بتبقى فعلا محتاجه ؟؟

طيب ليه ميشتغلوش اى حاجه معقوله فيه حد يقعد طول اليوم يطلب المساعده من الناس

ويوميا كمان

هى دى بقت وظيفتهم

طيب والناس اللى بتمشى تنادى فى الشوارع واحيانا بالميكروفونات كمان

معايا ابن مريض وكذا كذا كذا

دول برضه بيبقوا محتاجين ؟

دول احيانا بيبقوا مأجرين تاكسى وحاطين الميكروفون فوق وبينادوا

معقوله دى يعنى ؟؟

ده حتى اى انسان محتاج بيبقى محرج يقول انه محتاج

ومفيش حد بيحب يقلل من نفسه بل بالعكس كله بيبقى عايز يظهر فى احسن صوره واحسن حاله

ده حتى بابا مره بيحكيلنا

انه مره كان فى المحطه

فلقى واحده بتطلب منه فلوس عشان تسافر لجوزها فى بلد تانيه

قام بابا مساعدها

بعديها باسبوع لقى نفس الست بتطلب منه فلوس عشان تسافر لجوزها

قام بابا قالها هو انتى لسه مسافرتيش؟؟؟

تفتكروا الناس دى محتاجه مساعدتنا ليهم ولا لا ؟؟

عدنااااااااااااااااااا

خلاوييييييييييص

الحمدلله خلصت امتحانات اخيرا

بعد عناء شهرين ونص تقريبا

بجد افتقدكم جميعا

وانتوا اكيد نسيتوا شكلى اصلا

دانا اصلا مكنتش بدخل عندى


معلش ان شاء الله هلف عليكوا كلكوا اقرا كل اللى كتبتوه فى غيابى

_________________________________________

المهم مطولش عليكوا

لا طولى......

انهارده وانا نايمه بعد الامتحان قعدت افتكر وانا صغيره _هو فيه حد بيفتكر وهو نايم يا بت _معلش عدوها
المهم

قعدت افتكر وانا صغيره حاجات كده رفنعه يمكن مكنتش هافتكرها لو كانت حصلت لى وانا كبيره

يعنى مثلا مره وانا وانا فى الحضانه

كانوا حطينلنا لعب كتيره اوى

مرصوصه

بنلعب بيها يوم الخميس بس

ولعب معينه كمان عشان العلب الغاليه متبوظش

واللى يبوظ لعبه كان بيبقى يا ويله يا سواد ليله

فاكره اول يوم فى اولى ابتدائى

كنت رايحه بقى لابسه اليونيفرم الجديد

ومعايا مصروفى وسندوتشاتى فى شنطى وشنطتى على ضهرى

فاكره ميس منى بتاعه العربى كنت بحبها وكنت بتقعد تحفظنا النصوص بطريقه حلو اوى

كنت بحفظ بسرعه اوى وانا صغيره

كان يبقى بابا بيحفظ اخويا الكبير وانا قاعده القط منهم واحفظ قبليه

دلوقتى طبعا كله ضايع فى الزهايمر اكيد


عشان كده دايما بينصحوا بحفظ القرآن فى السن الصغيره

عشان كده كمان المفروض فى مدارس الابتدائى وقبل كده كمان

يستغلوا الميزه الرهيبه دى فى الاطفال

ويحفظوهم ويدربوهم على مهارات كتيره من صغرهم

فاما يكبروا تكبر معاهم وعمرهم ما ينسوا حاجه ابدا

و ده طبعا لازم يكون بمراعاه مواهب كل طفل وميوله

يعنى اللى بيحب العلوم والرياضه ينموه فى المجال ده والللى بيحب الخرايط والجغرافيا يحفظوه الخرايط والاماكن باسلوب سهل وجميل

عشان عمره ما يتنسى

انا بقى اصلا برغى عليكوا كل الرغى ده ليه

عشان تشوفوا الفديو ده









اهى الطفله دى اما تكبر هتبقى بوصله متحركه

عمرها ما هتنسى اى مكان وهتبقى ضليعه فى الجغرافيا

وهتنمى موهبتها لما تكبر كمان لو هى حبت المجال ده

ذاكره الاطفال دى بجد كنز لازم نستغلها كويس لصالح مستقبلهم وحياتهم

بدل الزهايمر اللى احنا فيه ده...........